ШӖМ тунӑ сӑн

Шупашкар хулинчи пӗр пульницӑра сипленнӗ арҫын медицина ӗҫченне тапӑннӑ. Кун пек тискерлӗ тӗслӗх токсикологи уйрӑмӗнче пулса иртнӗ.

46 ҫулти пациент хӗрӗнкӗ пулнӑ. Хӑйне алӑра тытайманскер медсестрана хӗнеме пуҫланӑ. Ҫакна пула тухтӑрсен ятарлӑ пускӑча пусса йӗрке хуралҫисене чӗнме тивнӗ. Сигнал хулари тӗп хурал пульчӗ ҫине килнӗ, кун хыҫҫӑн пульницӑна Росгварди ӗҫченӗсем ҫитнӗ.

Вӗсем арҫынна тытса чарнӑ, ӗҫ-пуҫа малалла уҫӑмлатма полици уйрӑмне илсе кайнӑ.

Халӗ ку тӗслӗх тӗлӗшпе тӗрӗслев малалла пырать.

russian.rt.com сайтри сӑн

Шупашкар хулинче пурӑнакан арҫын ултавҫӑсене 3 миллион тенкӗ хӑйӗн аллипех тыттарса янӑ.

Ку укҫа унӑн ҫурт хӑпартма пухнӑскер пулнӑ. Пӗррехинче ун патне палламан ҫын шӑнкӑравласа шлагбаум илме сӗннӗ. Килте шӑпах стройка пынипе арҫын килӗшнӗ, пӗр иккӗленмесӗрех смс-ҫырупа килнӗ кода каланӑ.

Анчах кун хыҫҫӑн ӑна палламан ҫынсем шӑнкӑравласа ултавҫӑсен аллине лекнӗ тесе хӑратма тытӑннӑ, ыйтӑва татса пама хӑйсем панӑ номерпе шӑнкӑравлама хушнӑ. Ҫапла вӑл «Роскомнадзор», «банк», «ФСБ» ӗҫченӗсемпе калаҫнӑ. Ӑна Украина ҫынни валли ун ячӗпе доверенноҫ хатӗрленӗ, ун урлӑ террористсен организацийӗсене укҫа куҫараҫҫӗ тесе ӗнентернӗ.

Кун хыҫҫӑн арҫын пухнӑ пӗтӗм укҫине «деклараци тума» курьер урлӑ парса янӑ. Ку тӗслӗх тӗлӗшпе пуҫиле ӗҫ пуҫарнӑ.

cap.ru сайтри сӑн

Шупашкар хула пуҫлӑхӗ Станислав Трофимов юр ирӗлтермелли станци строительстви мӗнле пынипе паллашнӑ. Ӗҫсен 79 процентне пурнӑҫланӑ.

Станцие «Промтрактор» савута хирӗҫ, Трактор тӑвакансен проспектӗнче, хута яраҫҫӗ. Вӑл хулари ҫивӗч ыйтӑва – юр илсе тухассине – татса памалла.

Станцире пысӑк производствӑллӑ икӗ «Вулкан» горелка лартӗҫ. Вӗсем кирек мӗнле ҫанталӑкра та юра пӗр чарӑнмасӑр ирӗлтерӗҫ.

Палӑртса хӑварар: станцие 7,5 гектар ҫӗр ҫинче хута яраҫҫӗ. Малтанах контракт 565 миллион тенкӗлӗх пулнӑ, кайран кӑштах тӳрлетӳсем кӗртнӗ: халӗ – 592,5 миллион тенкӗлӗх. Планпа пӑхса хунӑ тӑрӑх, юр ирӗлтерекен станцие каҫал юпа уйӑхӗн 30-мӗшӗччен туса пӗтермелле.

ivanovonews.ru сайтри сӑн

Ыран, утӑ уйӑхӗн 18-мӗшӗнче, Шупашкар хулинче сирена янӑрӗ. Анчах пур ҫӗрте те мар – Мускав ҫыран хӗрринче тата Юрӑ уйӗнче кӑна.

Ҫак сасса илтсен ан хӑрӑр: ку – планра палӑртнӑ тӗрӗслев. Шупашкар хула администрацийӗ пӗлтернӗ тӑрӑх, сирена 10 сехетрен пуҫласа 11 сехетчен янӑрӗ. Ҫапла майпа нумаях пулмасть Мускав ҫыран хӗрринче тата Юрӑ уйӗнче вырнаҫтарнӑ сирена хатӗрӗсене тӗрӗслеҫҫӗ. Ҫынсене лӑпкӑ пулма ыйтаҫҫӗ.

Сӑмах май, унти сиренӑсене пӗр уйӑх каялла тӗрӗсленӗ ӗнтӗ.

dnrnews.ru сайтри сӑн

Шупашкар хулинче пурӑнакан 63 ҫулти арҫын чикӗ леш енчен «Тойота» маркӑллӑ минивэн туянма ӗмӗтленнӗ. Халӑх тетелӗнче хӑйне кирлӗ машинӑна сутни пирки пӗлтерӳ те тупнӑ.

Сутуҫӑ ӑна машинӑн сӑнӳкерчӗкӗсене тата докуменчӗсене кӑтартнӑ. Кун хыҫҫӑн Шупашкар арҫыннин иккӗленӳ юлман – вӑл килӗшӳ тума тата машинӑна Чӑваш Ене илсе ҫитерме тесе лешӗ каланӑ счет ҫине 2 миллион ытла тенкӗ куҫарнӑ.

Кун хыҫҫӑнах сутуҫӑ ҫыхӑнӑва тухма пӑрахнӑ. Паллах, Чӑваш Ене нимӗнле машина та килмен. Ултав серепине лекнине ӑнлансан арҫын полицие пулӑшу ыйтма кайнӑ.

Ҫурла уйӑхӗн 1-мӗшӗнчен Шупашкар хулинче 42-мӗш автобус «Хӗвеллӗ» микрорайона ҫитӗ.

Халӗ вӑл Ленин Комсомолӗн урамӗнчен Промтрактор еннелле пӑрӑнать. Ҫитес уйӑхран вара «Солнечный» микрорайона кӗрӗ. Ҫавӑн пекех автобус Максим Горький проспектне кайма пӑрахӗ. Вӑл Павлов мичман урамӗнчен Университет урамне кайӗ, унтан – Миначев тата Лукин урамне.

Маршрут ҫинче автобус шучӗ сахалланӗ. Хальхи вӑхӑтра 10 транспорт ҫӳрет, пӗрре – резервра. Улшӑнусем хыҫҫӑн вара маршрут ҫинче 9 автобус пулӗ, пӗрре – резервра.

Ҫӗнӗ Шупашкар ҫынни хваттерсӗр юлас мар тесе унти тасамарлӑхран хӑтӑлнӑ, коммуналлӑ тӑкаксемшӗн пухӑннӑ парӑма татнӑ.

Хваттер хуҫи унта социаллӑ найм мелӗпе пурӑннӑ. Унта антисанитари пулнӑран, парӑм пухӑннӑран хула администрацийӗ арҫынна хваттертен кӑларса ярасшӑн пулнӑ. Унран кӳршисем те шар курнӑ: хваттерти тасамарлӑха пула вӗсем те нушаланнӑ. Ҫынсем ҫавна май ҫӑхавсем ҫырнӑ, коммунальщиксем килсе тӗрӗслев ирттернӗ те актсем ҫырнӑ.

Хваттерте пурӑнакан ҫын суд тавӑҫне йышӑнман. Вӑл хваттертех юлас килнине пӗлтернӗ. Хӑйхискер ӑнлантарнӑ тӑрӑх, унта ашшӗ пурӑннӑ, лешӗ вара эрех ӗҫме юратнӑ. Вӑл вара ашшӗ вилсен унта пурӑнма куҫнӑ.

Суд пуличчен арҫын хваттерте тирпейленӗ, парӑмсене татнӑ. Ҫапла вӑл унтах юлнӑ.

Шупашкар хулинче ретротроллейбуспа пӗрремӗш хут экскурси ирттернӗ.

Nordtroll NTR-120MTr троллейбус пирвайхи хут 1997 ҫулхи ҫурла уйӑхӗн 26-мӗшӗнче Ҫӗнӗ Шупашкар хулинче ӗҫлеме пуҫланӑ. Кун пек экземпляр пирӗн кунччен пӗрре кӑна упранса юлнӑ. Халӗ ав вӑл Шупашкар хулинче экскурси маршручӗ ҫине тухнӑ. Троллейбус Чукун ҫул вокзалӗнчен ҫула тухса Ленин проспекчӗпе Модӑсен ҫуртне ҫитнӗ, малалла Мускав проспекчӗпе кайса «Раща» патӗнчен ҫаврӑннӑ та каялла «Мега Молл» таран ҫитнӗ. Унтан Гагарин урамне ҫаврӑнса вокзалта чарӑннӑ. Гид вырӑнӗнче Чӑваш транспорт управленийӗн кадрсен пайӗн пуҫлӑхӗ Елена Горбатина пулнӑ.

Палӑртмалла: троллейбуса ун чухне лайӑх туса кӑларнӑ, салонри ҫынсем хӗллехи шартлама сивӗсенче ан шӑнччӑр тесе вӑйлӑ кӑмакасем лартнӑ.

Шупашкар хулинчи ҫемьене «Ашшӗ-амӑшӗн мухтавӗ» орден медальне панӑ. Тӗрӗсрех каласан, вӗсене чысласси пирки малтанах хушу тухнӑ. Халӗ вара орден медальне утӑ уйӑхӗн 8-мӗшӗнче, Ҫемье тата юратупа шанчӑклӑх кунӗнче, алӑран тыттарнӑ.

Сӑмах – Терентьевсем пирки. Валерипе Анна пилӗк ачана воспитани параҫҫӗ: виҫӗ ывӑл та икӗ хӗр. Вӗсене «Ашшӗ-амӑшӗн мухтавӗ» орден медалӗпе чысласси пирки Раҫҫей президенчӗ пуш уйӑхӗн 30-мӗшӗнче хушӑва алӑ пуснӑ.

Палӑртса хӑварар: Валерий Николаевич «ЭКРА» предприятин ӑслӑлӑхпа производство департаментне ертсе пырать. Пушӑ вӑхӑтра спортпа кӑсӑкланать, юрӑ-кӗвве юратать, гитара калать. Анна Зафуровна – кил ӑшшин управҫи, ҫав вӑхӑтрах ӗҫлесе те ӗлкӗрет.

gelpriboy.ru сайтри сӑн

Пухнӑ укҫа-тенкине ултавҫӑсене курьер урлӑ парса яраҫҫӗ. Кун пекки – анлӑ сарӑлнӑ тӗслӗх. Шупашкарти тивӗҫлӗ канури ҫынна вара укҫана 5-мӗш хутран пеме ӳкӗте кӗртнӗ.

64 ҫулти арҫын патне «коммуналлӑ служба ӗҫченӗ» шӑнкӑравланӑ. Вӑл ҫурт чатне кӗме сӗннӗ те каҫӑ ярса панӑ. Кайран вара ӑна палламан ҫынсем ун ячӗпе доверенноҫ хатӗрленине ӗнентернӗ. Ҫак ӗҫе кам тунине палӑртмашкӑн пӗтӗм укҫана деклараци тумалла имӗш.

Арҫын ултавҫӑсем каланипе 20 950 евро тата 1000 доллар укҫана хутаҫа чиксе 5-мӗш хутри хваттер чӳречинчен аялалла пенӗ. Унта вара ӑна курьер илсе кайнӑ.

Кӗҫех ҫак ӗҫ-пуҫ пирки арҫыннӑн аппӑшӗ, чикӗ леш енче пурӑнаканскер, пӗлнӗ. Вӑл пӗлӗшӗсене шӑллӗне полицие илсе кайма ыйтнӑ. Ҫапла хӑть арҫыннӑн 2 миллион тенкине упраса хӑварма май килнӗ.

Ку тӗслӗх тӗлӗшпе пуҫиле ӗҫ пуҫарнӑ.