Ӗнер, __Муркаш район__ судӗнче __Илле Иванова__ экстремизм енӗпе айӑплас тӗлӗшпе виҫҫӗмӗш лару иртнӗ. Пӗрремӗшӗ __/news/2935.html_ҫӑвӑн 24-мӗшӗнче пулнӑччӗ__, иккӗмӗшӗ — ҫӗртмен 4-мӗшӗнче.

Аса илтеретпӗр: Илле Иванова «Сӗтев» хаҫатра пичетленнӗ «Покажи мне свой язык, и я скажу — кто ты» статьяшӑн явап тыттарасшӑн. Пуҫилле ӗҫе Сергей Трихалкин судья ертсе пырать, ҫыруҫи — Наталья Павлова. Патшалӑх айӑплавҫи — Алексей Чернов. Илле Иванова хӳтӗлекенсем: Николай Столбов, Николай Лукианов тата __Борис Чиндыков__ ҫыравҫӑ. Тимӗр Акташ журналист пӗлтернипе __Эдуард Мочалов__ та инҫе марччӗ — вӑл ҫурт умӗнче пӗчченле пикет йӗркеленӗ иккен. Суд пӳлӗмӗнче тата Юрий Сан ҫыравҫӑ, Юрий Кузнецов пенсионер, Шупашкартан килнӗ журналист тата видео-оператор пулнӑ. Илле Иванов чӑвашла калаҫнӑран унӑн сӑмахӗсене вырӑсла Ольга Шарипова куҫарса пынӑ.

Тимӗр Акташ каласа панӑ тӑрӑх ӗҫе пикенсенех айӑпланакан маларах иртнӗ ларусенчи протоколсене пӗтӗмпех тӗплӗ ҫырманнине, вӗсенче йӑнӑшсем пуррине пӗлтернӗ — ҫак кӑлтӑксене тӳрлетме сӗннӗ. Ҫавӑн пекех калаҫакансене лайӑхрах илтме пултӑр тесе вӑл пӳлӗме микрофонпа тивӗҫтерни аван пулӗччӗ тенӗ. Ку сӗнӳсене судья йышӑнса ӗҫ ҫумне хушнӑ. Хӳтӗлевҫӗ ку хутӗнче те вырӑсларан чӑвашла куҫарма ыйтнӑ, анчах судья килӗшмен — айӑпланакан вырӑсла та лайӑх пӗлет имӗш. Пӳлӗмре ларакансем пӗлтернӗ тӑрӑх судья хӑй чӑвашла пӗлни курӑнать — хӑш чух вӑл та чӑвашла сӑмахсем перкелесе янӑ тет.

Ку ларура Илле Иванов ҫеҫ калаҫнӑ — вӑл тӗрлӗ саккунсене тӗпе хурса чӑваш чӗлхи вырӑс чӗлхипе тан пулнине пӗлтернӗ. Чӑваш чӗлхипе пӗр чӑрмавсӑр усӑ курма унӑн ирӗк пурри пирки каланӑ.

Ӗҫ вӑхӑчӗ вӗҫленнине шута илсе ӗнерхи лару вӗҫленнӗ, теприне ҫӗртмен 13-мӗшӗнче ирттересси пирки пӗлтернӗ.

Тимӗр Акташ пӗлтернипе судри икӗ ен (айӑплаканпа айӑпланакан) те хӑйсене йӗркеллӗ тытнӑ — пӗр-пӗрне хисеплеменни курӑнман. Ҫак ӗҫ вӗҫленнӗ тӗле те ӗҫ-пуҫ ҫаплах пырсан суд тӗрӗс йышӑну тупасса шанать вӑл.

__http://fotki.yandex.ru/users/kzilsu1957/album/344367/_**Сӑнсем**__ (10)