Сайта кӗр | Регистраци | Сайта кӗрсен унпа туллин усӑ курма пулӗ
 -10.0 °C
Епле пысӑк юхан шыв та пӗчӗк шывран пуҫланать.
[ваттисен сӑмахӗ]
 

Хыпарсем: саламсем

Республикӑра
inforeactor.ru сӑнӳкерчӗкӗ
inforeactor.ru сӑнӳкерчӗкӗ

Чӑваш Ен Элтеперӗ Михаил Игнатьев Чӑваш Енӗн ҫӑлав службин ӗҫченӗсем тата ветеранӗсене професси уявӗпе саламланӑ.

«Ҫын пурнӑҫне ҫӑласси – питӗ пӗлтерӗшлӗ те пархатарлӑ тивӗҫ. Эсир инкеке лекнисене пулӑшма чӑн малтан пырса ҫитетӗр, ҫут ҫанталӑк витӗмӗпе пулакан хӑрушлӑхсемпе хастарлӑн кӗрешетӗр, техногенлӑ аварисен сиенӗсене вӑхӑтра сирсе яратӑр, экономикӑпа социаллӑ пурнӑҫ тата коммуналлӑ хуҫалӑх сферисенчи организацисемпе предприятисен кал-кал ӗҫне тивӗҫтеретӗр», — тенӗ республика ертӳҫи хӑйӗн саламӗнче.

Унта вӑл ҫӑлавҫӑсен профессири пысӑк ӑсталӑхне, темле кӑткӑс лару-тӑрура та ҫухалса кайманнине ҫийӗнчех тӗрӗс те вырӑнлӑ йышӑнусем тума пӗлнине, вӗсен хӑюлӑхпа хастарлӑхне палӑртнӑ.

 

Апат-ҫимӗҫ
Cap.ru порталти сӑнӳкерчӗк
Cap.ru порталти сӑнӳкерчӗк

Шупашкарти 1-мӗш ҫӑкӑр савучӗ нумаях пулмасть 85 ҫулхине савӑнӑҫлӑ лару-тӑрура уявланӑ. Юбиляр-предприятие саламлама тӳре-шарапа депутатсем йышлӑн пуҫтарӑннӑ.

Республикӑри сумлӑ предприяти уявне хутшӑннӑ Чӑваш Ен Элтеперӗ Михаил Игнатьев савута ырласа Инстаграмра та ҫырса хунӑ. «Пӗр йыш, пӗр ҫемье пек ӗҫлет Шупашкарти 1-мӗш ҫӑкӑр савучӗ», — тенӗ Михаил Игнатьев. Предприятире хӑй темиҫе хут та пулнине, мухтавлӑ коллективра тӑрӑшакан чылай ҫынна палланине асӑнса хӑварнӑ.

Предприяти, чӑн та, самана саккӑрла ҫаптарнӑ вӑхӑтра та ҫухалса кайман. Савута Елена Бадаева чылай ҫул ӑнӑҫлӑ ертсе пырать. Маттур чӑваш хӗрарӑмӗ тахҫанах тивӗҫлӗ канура пулин те юратнӑ ӗҫе чунтан парӑнса пурнӑҫлать кӑна мар, самана таппипе тан утать. Ҫавна май савут продукцийӗн ассортименчӗ те, техӗм шӑршӑллӑ та кӑпӑшка ҫӑкӑр-булкӑна сутасси те ӑнӑҫлӑ пулса пырать.

Хыпар ҫӑлкуҫӗ: https://www.instagram.com/p/B5vNNbpqdSk/
 

Спорт

«Хальхинче эпир унчченхинчен ытларах хатӗрленнӗччӗ. 2018 ҫулта пире вуннӑмӗш мар, пинмӗш пай ҫитмерӗ. Ҫавӑ пире ҫирӗплетрӗ, Штутгарта эпир ылтӑн илме кайрӑмӑр», – тенӗ Владислав Поляшов ӗнер Чӑваш Ен Правительство ҫуртӗнчи тӗлпулура.

Аса илтерер: арҫынсен Раҫҫейри командин йышӗнче пулнӑ Владислав Поляшов тата ҫав ушкӑн Германире нумаях пулмасть иртнӗ 2019 ҫулхи тӗнче чемпионатӗнче ҫӗнтернӗ. Ылтӑн медале тивӗҫнӗ ятпа маларах спортсменсене ҫӗршыв Президенчӗ Владимир Путин саламланӑччӗ. «Раҫҫейӗн спорт гимнастикинче многоборье енӗпе эсир пуҫласа пъедесталӑн ҫӳлти картлашки ҫине хӑпарма пултартӑр», — мухтанӑччӗ Раҫҫей Президенчӗ спортсменсен ячӗпе янӑ саламлӑ телеграммӑра.

Ӗнер ЧР Правительство ҫуртӗнче Чӑваш Ен спортсменне Михаил Игнатьев Элтепер саламланӑ.

 

Персона

Чӑваш режиссерӗ «Ҫӗршыв умӗнчи тава тивӗҫлӗ ӗҫсемшӗн» IV степеньлӗ ордена тивӗҫнӗ. Сӑмах СССР халӑх артисчӗ Валерий Яковлев пирки пырать.

Ӑна тӑван ҫӗршыв культурине тата ӳнерне аталантарас енӗпе пысӑк тӳпе хывнӑшӑн тата нумай ҫул тухӑҫлӑ тӑрӑшса ӗҫленӗшӗн Владимир Путин хавхалантарма йышӑннӑ. Хушӑва вӑл юпа уйӑхӗн 4-мӗшӗнче алӑ пуснӑ.

Валерий Яковлева (вӑл — Чӑваш патшалӑх академи драма театрӗн илемлӗх ертӳҫи тата тӗп режиссерӗ) пысӑк наградӑпа РФ культура министрӗ Владимир Мединский телеграмма янӑ, чунтан саламланине палӑртнӑ.

Аса илтерер: авӑн уйӑхӗн 25-мӗшӗнче Шӑмӑршӑ районӗнче СССР халӑх артисчӗпе Валерий Яковлевпа тӗлпулу иртнӗччӗ. Мероприятие пултаруллӑ ҫыннӑн 80 ҫулхине халалланӑччӗ.

 

Спорт
Владислав Поляшов
Владислав Поляшов

Раҫҫей Президенчӗ Владимир Путин Владислав Поляшова гимнаста тата арҫынсен ҫӗршыври командине 2019 ҫулхи тӗнче чемпионатӗнче ҫӗнтернӗ ятпа саламланӑ.

Владислав Поляшов — олимп резервӗллӗ 6-мӗш спорт шкулӗн воспитанникӗ, Раҫҫей спорт мастерӗ. Вӑл спорт гимнастики енӗпе Раҫҫейӗн командин йышӗнче пулнӑ. Ӑмӑрту Германири Штутгарт хулинче иртнӗ.

«Хисеплӗ Никита Владимирович, Артур Грачьевич, Давид Сагитович, Иван Алексеевич, Денис Михайлович и Владислав Сергеевич! Штутгартри тӗнче чемпионатӗнче эсир чӑн-чӑн триумфаторсем, Раҫҫейӗн спорт гимнастикинче многоборье енӗпе эсир пуҫласа пъедесталӑн ҫӳлти картлашки ҫине хӑпарма пултартӑр. Сире, сирӗн тренерсене тата наставниксене паллӑ пулӑмпа чунтан саламлатӑп», — тесе ҫырнӑ.

 

Персона

Раҫҫей ертӳҫин пресс-секретарӗ Дмитрий Песков РФ Президенчӗ Владимир Путин ҫуралнӑ кунне тӑванӗсемпе тата тусӗсемпе уявлассине пӗлтернӗ. Ют ҫӗршыври ӗҫтешӗсем те саламлаҫҫӗ ӑна. Ҫапла ҫырать «Новости» информаци агентстви.

Тунтикун, юпа уйӑхӗн 7-мӗшӗнче, Раҫҫей Президенчӗ хӑйӗн 67 ҫулхине уявлать.

«Кӑнтӑрла хыҫҫӑн пӗтӗмлетӳлллӗ хыпар пӗлтерӗпӗр. Паян ирхи вуннӑран вӑл ют ҫӗршыври ӗҫтешӗсенчен салам йышӑнать», — каланӑ пресс-секретарь.

Ют ҫӗршывсенчи ӗҫтешсем саламланӑ вӑхӑтрах ӗҫпе ҫыхӑннӑ ыйтусене хускатнӑ. Ҫапла паян кӑнтӑрлаччен Путин ӗҫ пиркиех шухӑшланӑ.

Маларах Владимир Путин Президента Дмитрий Медведев премьер-министр саламланӑ. Вӑл ӑна Раҫҫей ырлӑхӗшӗн ӗҫлеме ырлӑх-сывлӑх суннӑ.

 

Персона
cap.ru сайтри сӑн
cap.ru сайтри сӑн

Юпа уйӑхӗн 3-мӗшӗнче Шупашкарта пурӑнакан Анна Быстрова сумлӑ юбилейне – 100 ҫулне – паллӑ тунӑ. Мускав район администрацийӗн пуҫлӑхӗн ҫумӗ юбиляра саламлама килнӗ, РФ Президенчӗ Владимир Путин янӑ саламлӑ ҫырӑва тыттарнӑ.

Анна Быстрова Тверь облаҫӗнче 1919 ҫулхи юпа уйӑхӗн 3-мӗшӗнче ҫуралнӑ. Шкулта 5 класс вӗренсен вӑл Ржев хулине тухса кайнӑ, унта ҫар савутне ӗҫлеме вырнаҫнӑ. Тӑван ҫӗршывӑн Аслӑ вӑрҫи пуҫлансан савута Улатӑра куҫарса килнӗ. Ҫапла майпа Анна Быстрова Чӑваш Ене лекнӗ.

Кинемей – тыл ӗҫченӗ. Ӑна «1941-1945 ҫулсенче Тӑван ҫӗршывӑн Аслӑ вӑрҫи вӑхӑтӗнче тӑрӑшса ӗҫленӗшӗн» медальпе чысланӑ.

Хыпар ҫӑлкуҫӗ: https://pg21.ru/news/60002
 

Республикӑра

Ҫурла уйӑхӗн вӗҫӗнче Хусанта «WorldSkills» 45-мӗш тӗнче чемпионачӗ иртнине Чӑваш халӑх сайчӗ пӗлтернӗччӗ. Аса илтерер, унта Шупашкарти Евгений Краснов медальона тивӗҫнӗччӗ.

Каччӑна Чӑваш Ен Элтеперӗ Михаил Игнатьев Инстаграмра саламланӑччӗ. «Евгения саламлатӑп тата унӑн ашшӗ-амӑшӗпе педагогӗсене профессионал хатӗрленӗшӗн тав тӑватӑп!», — тесе ҫырнӑччӗ вӑл Инстаграмри хӑйӗн страницинче.

Халӗ Михаил Игнатьев Элтепер Евгений Краснова 40 пин тенкӗ преми пама йышӑннӑ. Ҫавӑн ҫинчен калакан хушӑва республика ертӳҫи паян алӑ пуснӑ. Документа ЧР влаҫ органӗсен официаллӑ порталӗнче вырнаҫтарнӑ.

Евгений Краснов — Шупашкарти апатлану технологийӗпе коммерцин техникумӗн производство вӗрентӗвӗн мастерӗ. Чемпионта вӑл Раҫҫейӗн наци командин йышӗнче, «Кондитер ӗҫӗ» компетенцире, хутшӑннӑ. Ку енӗпе 23 ҫын тупӑшнӑ. Конкурссенче Евгений 700 ытла балл пухнӑ.

 

Персона

Тутарстанри Аксу районӗнчи Мюд поселокӗнче пурӑнакан чӑваша район пуҫлӑхӗ Камиль Гилманов саламланӑ.

Ирина Степанова патне пуҫлӑх килнех кайнӑ. Ирина Михайловна тӑван ен историне тӗпченипе паллӑ иккен. «Вӑл районти кашни ял хӑҫан тата мӗнле йӗркеленсе кайнине, вӗсене кам йӗркеленине тата мӗнле аталанса пынине тарӑн тӗпчесе кӗнекесем ҫырса кӑларать», — хыпарланӑ вырӑнти «Ял пурнӑҫӗ» хаҫатра.

Ирина Степанова тӑрӑшнипе 15 кӗнеке пичетленнӗ. Вӑл малашне те тӗпчев ӗҫӗпе тӑрӑшасшӑн. Ҫакӑн пирки хӗрарӑм район пуҫлӑхне пӗлтернӗ.

Пӗлтерӗшлӗ ӗҫшӗн Ирина Степановӑна «Чӑваш Республикин культурӑн тава тивӗҫлӗ ӗҫченӗ» хисеплӗ ят панӑ. Аксу район ертӳҫи Камиль Гилманов вара Ирина Степановӑна Тав ҫырӑвӗпе чысланӑ.

Хыпар ҫӑлкуҫӗ: https://vk.com/wall-184839447_221
 

Чӑвашлӑх

Чӑваш халӑх сайчӗ паян хӑйӗн 14 ҫулне уявлать! Ҫакӑнпа эпир — ҫак пӗрлӗхе йӗркелекенсем тата ӑна аталантарма пулӑшакансем — сире пурсӑра та саламлатпӑр!

Хӑйӗн кун-ҫулне Чӑваш халӑх сайчӗ 2005 ҫулта пуҫланӑ. Авӑнӑн 7-мӗшне вара ҫак пӗрлӗхӗн ҫуралнӑ кунӗ тесе йышӑннӑ. Ҫак вӑхӑт хушшинче сахал мар ӗҫ пурнӑҫланӑ: нумай-нумай сайт хута янӑ, май ҫитнӗ таран чӑваш культурине аталантарма пулӑшнӑ.

Кӑҫалхи чи пӗлтерӗшлӗ ӗҫсенчен пӗри вӑл — Чӑваш чӗлхи лабораторине йӗркелесе яни. Вӑл та, паллах, Чӑваш халӑх сайтне йӗркеленӗренпех ӗҫлеме пуҫланӑ. Сӑмахсарсене электронлатасси, чӑваш чӗлхине компьютерта аталантарасси — ҫаксене пурне те пӗрлӗхе йӗркеленӗренпех тума пуҫланӑ. Анчах та шӑп та кӑҫал эпир ҫак ӗҫсене уйрӑммӑн проектпа палӑртма пуҫлас терӗмӗр. Сӑмах май, паянхи кунхи тӗп ӗҫсенчен пӗри — икчӗлхеллӗ корпуса пуянлатасси — ӑнӑҫлӑн пурнӑҫланса пырать. Чӑвашла-вырӑсла пуплевӗшсен йышӗ унта 100 пинрен иртрӗ (ку хыпара ҫырнӑ тӗле 101,9 пин)!

Чӑваш халӑх сайтне пулӑшакансене пурне те тепӗр хут пысӑк тав сӑмахӗ калатпӑр! Уяв ячӗпе!

 

Страницӑсем: 1, 2, 3, [4], 5, 6, 7, 8, 9, 10, 11, 12, 13, 14, 15
Orphus

Баннерсем

Шутлавҫӑсем

2 Хурал кӗтесӗ (чат)

Ҫанталӑк

Шупашкарта ҫывӑх вӑхӑтра (21.01.2021 21:00) тӗтреллӗ ҫанталӑк, атмосфера пусӑмӗ 750 - 752 мм, -11 - -13 градус сивӗ пулӗ, ҫил 3-5 м/ҫ хӑвӑртлӑхпа кӑнтӑр-хӗвеланӑҫ енчен вӗрӗ.

Гороскоп

СурӑхВӑкӑрЙӗкӗрешРакАрӑсланХӗрТарасаСкорпионУхӑҫӑТу качакиШывтӑканПулӑсем
Сурӑх: Тахçанах кĕтнĕ тупăш пулмĕ. Пĕр вăхăт мĕн пуррипе çырлахма тивĕ. Эрне варринче сывлăхпа çыхăннă кирек мĕнле диагностика процедури те вырăнлă пулĕ. Туссем валли вăхăт ытларах уйăрăр.

Кӑрлач, 21

1924
97
Ленин Владимир Ильич, ХХ ӗмӗрти паллӑ политиксенчен пӗри вилнӗ.
1975
46
Волков Леонид Валерьевич, экономика ӑслӑлӑхӗсен кандидачӗ, ӑслӑлӑх тата общество ӗҫченӗ ҫуралнӑ.
Пулӑм хуш...Пулӑм хуш...

Ыйтӑм

Чӑваш халӑх сайтӗнче цензура пулмалла-и?
Ҫук, хуть те мӗнле материала ирӗклӗн вырнаҫтармалла
Паллах, пулмалла, унсӑр ӑпӑр-тапӑр япала лартма пулать!
Ку ыйтӑва редакци татса памалла
Пулмалла, анчах виҫеллӗ
Маншӑн ҫавах
Эпир Facebook-ра 1370+
 
 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org