Сайта кӗр | Регистраци | Сайта кӗрсен унпа туллин усӑ курма пулӗ
 +4.3 °C
Пӗччен йывӑҫ час тӳнет.
[ваттисен сӑмахӗ]
 

Виталий Станьял: Тӗрлӗ тӗслӗ пурнӑҫпа вилӗм

Виталий Станьял08.01.2023 14:372724 хут пӑхнӑ

(«Хӗрлӗ кӗпеллӗ телей» драмӑна вуласан - «Тӑван Атӑл», 2022, 12)

Икӗ пайлӑ, вунӑ курӑнуллӑ драмӑри ӗҫсем пӗтсе ларнӑ ялта 1994 ҫул хыҫҫӑн пулса иртеҫҫӗ. Ҫухалса пыракан ялсен шӑпи Арсений Тарасов прозинче («Сутнӑ пӳртри юлашки каҫ» калавра, сӑмахран) тахҫанах палӑрнӑчччӗ. Каллех ҫав тема, ҫав ырату.

«Ялӗнче пӗр чӗрӗ чун юлман. Эпӗ те Ульха пур. Тата кам? Ӳсӗр Палля ӗнтӗ. Тата манӑн икӗ сурӑх»,-тет ватӑлса ҫитнӗ Ҫарахви карчӑк. Унӑн юратнӑ упӑшки Элекҫей вӑрҫӑра нимӗҫ тыткӑнне лекнӗ, хӑтӑлса тухсан каллех тӑшманпа ҫапӑҫнӑ. Пурнӑҫ ӗмӗр тӑршшӗпех пусса тӑнӑ ӑна. Колхоз председателӗ, саккунлӑ вӑрӑ, партийцӑ Палля «ҫӑварлӑхланман» Элекҫее, ҫӑхав ҫырса, тепӗр хут тӗрмене тыттарса ярать.

Саманан йӗксӗк йытти Палля. Ӑна ашшӗ пӑхман. Ҫарахви амӑшне качча илейменнишӗн арӑмӗпе ачи айӑплӑ, имӗш. Ашшӗне кулак тесе Ҫӗпӗре ӑсатнӑ чухне Палля интернатра пурӑннӑ. Вӗсен кил-ҫуртне колхоза панӑ. Кайран ҫав пӳртре Ҫӑрахвисен ҫемйи пурӑнмалла пулса тухнӑ. Хӑй колхоз председателӗ чухне Элекҫейпе Ҫарахвие урӑх яла кӑларса яма хӑтланнӑ. Вӗсен ывӑлӗ Гриша Палля Никантӑрне Куҫмапа харкашнӑ чухне чарма хӑтланнӑ. Никантӑра ӗненсе, судра Гриша айӑпа хӑй ҫине илнӗ, мӗншӗн тесен лешӗ мотоцикл пама шантарнӑ. Таврӑнсан Гриша ултавҫӑ Никантӑра лайӑх тавӑрнӑ, каллех тӗрмене лекнӗ. Вӑл ирӗке тухать, таврӑнать, анчах унӑн амӑшӗпе пӗрле юлма май килмест.

Б.Н.Ельцинӑн 926-мӗш «...о порядке возврата гражданам незаконно конфискованного и изъятого...» указӗ тухнӑ хыҫҫӑн Палля пӗччен карчӑка ҫуртран кӑларса ывӑтасшӑн. Нӗрсӗр этемӗн ӗмӗчӗ тулмасть. Унӑн виллине карта ҫумӗнче тупаҫҫӗ. Шӑм-шаккине выҫӑ йытӑсем кӑшласа пӗтернӗ. Ҫапла драмӑри ӗҫ-пулӑм ӗрти-тымарӗ.

Хайлавра чуна тыткӑнлаканӗ - Ҫарахви карчӑк сӑнарӗ, унӑн чунлӑхӗ, ӗненӗвӗ, шухӑшӗсем. Вӑл тӗп сӑнар. Тӗнче тӗрӗслӗхӗ унпа виҫӗнет. Пулни-иртни, суяпа чӑнни ун тавра ҫаврӑнать.

Ялта икӗ ҫын юлчӗҫ. Ыттисем - Палля хӳрешки ҫатта Кантюк, телейне тупайман чарусӑр Майккапа Зина тахҫанах вилнӗ. Тӑнран тайӑлас карчӑк ял ишӗлчӗксем ӑшӗнчен тупса килнӗ Пукане кӑна чипер хӗр-юрӑҫ пулса юлать.

Вилнӗ ҫынсен манӑҫми мӗлкисем килеҫҫӗ. Сӑнарсем чӗрӗлеҫҫӗ, Пукане калаҫать. Телей кӗпи тӑхӑнаҫҫӗ. Капла кӑтартни юмахсемпе тӗнче литературинче ӗмӗртенпех курӑнать. Мистика е фантастика, таймӑк-шаймӑк-и ҫакӑ? Жанр тӗсӗ енчен философи публицистика, ӗрет-нисеп, лирика, хоррор, экшен тата тем те аса килчӗ. Анчах драмӑн ятарлӑ вӑрттӑнлӑхӗ-хуҫкаланчӑкӗ вулаканшӑн (лартса парсан - кураканшӑн та) пӗлтерӗшлех мар пулин те, драмӑра ытарлӑ, палӑртуллӑ (символла) пӗлтерӗш пурах. Умри элем пекех вӑл, тейӗпӗр. Этем хакне, тивӗҫне, ҫынлӑхне, асӑмне вилӗм умӗнче хакланин палли. Лайӑх пурӑннӑ чухне ҫын хӑй вилӗмӗ ҫинчен сайра шухӑшлать. Инкеке лексен, йывӑр чирлесен, ватӑлсан ҫав шухӑшсем никама та сиктерсе хӑвармаҫҫӗ. Эппин, чӑн пурнӑҫран йӑлтах. Каласа панин мелӗ кӑна юмахларах.

Вилӗм умӗнче пурте танах. «Ҫӗр ҫинче пурте килет те каять, тупӑнать те ҫухалать». Вӑл никама та сиктерсе хӑвармасть. Пуян-и, чухӑн-и, кахал-и, ӳрӗк-и, ватӑ е ҫамрӑк - уяса тӑмасть. Вилӗм ҫын пурнӑҫне тӳрӗ хак паракан тӗкӗр. Ҫынсем вилнӗ этеме кирек хӑҫан та харкаммӑн хак хураҫҫӗ - кам пулнӑ та мӗнле пулнӑ, таса пурӑннӑ-и, ырӑ е усалпа пӑтраннӑ-и - тараса ҫине хурса виҫменни кӑна! Драмӑра этем кӑмӑлӗн паха енӗсене ҫынри тискерлӗхпе хирӗҫлетсе кӑтартнӑ. Сӑваплӑ-и тӑшмана тавӑрни е тӗрӗсси айвансен шӑпи кӑна? Айӑплӑ-и Гришапа ашшӗ тӗрӗслӗхе хӳтӗленӗшӗн? Вӗсене асӑнакан та, кӗтекен те юлмарӗ. Вӑрӑсем вӗсем вӑрра асӑнаҫҫӗ, пире мар. Вулаканшӑн пуҫа ватмали драмӑра пайтах.

Хӗрлӗ тӗс телее пӗлтерет-мӗн. Мӗншӗн хӗрлӗ тӗс - ӑнсӑртран-им? Телейӗ мӗн-ха тата? Пулнӑ-и вӑл е ҫук та-и? Ҫухатсан ҫеҫ телее хаклама пуҫлатпӑр. Унччен вӑл пуррине сисменни пайтах. «Элекҫей питӗ туянса парасшӑнччӗ хӗрлӗ кӗпе - пурнӑҫа йӳнеҫтереймерӗмӗр-ҫке. Хӗрлӗ тӗс вӑл - савӑнӑҫ, илем», - тет капӑр хӗрлӗ кӗпе тӑхӑнтартнӑ Пуканене (хуҫисем Шӑракут ҫеҫ тенӗ Эсмеральдӑна) Ҫарахви карчӑк. Ҫукран чӗрӗлсе тӑрать пурнӑҫ тӑвакансене мухтакан хурлӑхлӑ та асамлӑ вӑй.

Чӑнласа ҫыравҫӑ пулма турӑ (ҫутҫанталӑк) пани кирлӗ, чун хевти пулмалла, теҫҫӗ. Пӑтраннӑ вӑхӑтра вӑл кирлех марри сиксе тухрӗ. Сӑмах илемне (эстетикине) ӑнланмасӑрах кӗрекене кӗрсе ларакансем тупӑнчӗҫ. Хисеплӗ ят, грант, орден илеҫҫӗ. Хӑйсем - ҫын хыҫҫӑн чӗркелекенсем ҫеҫ, ют сӑмахпа каласан - копирайторсем. Тултарса лартрӗҫ ҫавсем ҫӳлӗксене. Укҫаллисем пичетленеҫҫӗ, тепӗр чухне чухӑна юлнӑ талантсемех вӗсене юсаса параҫҫӗ. Тем тӗрли те пур тӗнчере. Пӗличчен пӗлменни.

Арсений Тарасовӑн сӑмах туйӑмӗ, пӗлӳ-ӑнлану шайӗ, ҫыру таланчӗ пысӑкки мана пӗрре те иккӗлентермест. Вӑл литературӑшӑн, культурӑшӑн ҫуралнӑ. Ҫӗнӗ литература тумалла, тет Арсений Алексеевич. Тӗнче литературинче пурнӑҫа тӗшӗлесе пӑхман меслет хӑварман ӗнтӗ. Ҫӗннине шыраса тупайманран пур ӑпӑр-тапӑр йӑтӑнса анчӗ халӑх умне. Пурнӑҫа хамӑр вӑхӑт аталанӑвӗ чухлӗ тӗрӗс те кирлӗ чухлӗ кӑтартса парсан тем пекехчӗ!

Патшалӑх пире пулӑшмалла,-теҫҫӗ ҫыравҫӑсем. Талантлисене, чӑнах та, пулӑшмалла. Чӑвашӑн критик мар, йӗркеллӗ рецензент та ҫук пулсан, кам пӗлет кам талантлине? Талантсӑррисене ҫиелте ярӑнма тӗрӗс критика ҫукки шӑпах лайӑх вӗт! Тӗрлӗ комиссисене ҫавӑрма та йывӑр мар. Ман шутпа, ҫапах та, патшалӑх ӑмӑртусем (конкурссем) ирттерни лайӑхах. Чӑваш драматургийӗн конкурсӗнче «Хӗрлӗ кӗпеллӗ телей» мала тухнӑ. Тивӗҫлипе. Ытларах пулсанччӗ мала тухнисем!

 
Редакцирен: Статьяна вырнаҫтарни редакци автор шухӑшӗпе килӗшнине пӗлтермест.

Комментари:

Малай // 2562.75.4107
2023.01.09 23:27
Акапасар, эс пӗтӗм пурнӑҫӗнче чӑвашсемшӗн тӑрӑшнӑ сумлӑ Станьял пирки ҫапла лӗпӗртетсе курнӑҫланса ларан пулсан хӑвна та ҫав чӑвашран пӑрӑннӑ манкуртсен шутне кӗртме пултаран. Пире сан пек пуш пучах каҫрашкасем кирлӗ мар. Станьяла вӗрентме хӑтланан, хӑвна вӗрент малтан, мӗншӗн 400 пин тесе суйса ҫыран, ҫыран пулсан тӗрӗс цифра кӑтарт. Чӑваш халӑхӗн йышӗ чакнӑ тесе ятарласа ӳстерсе, пысӑклатса кӑтартса чӑваш наци ҫинчен суя элек саран. Ку - фейк. Куншан сана суда пама пулать.
Вулани // 2888.14.0743
2023.01.10 12:28

"Партийца" - драмара сапла!
Николай Максимов // 3307.97.0645
2023.01.10 15:40
Пьеси лайăхах-тăр. Шел, хальлĕхе курман-вуламан-ха. Анчах шухăшĕпе сюжечĕ, Станъял статйине вуласан, тахçанхи-тахçанхи-тахçанхи пек туйăнать. Арççи вара литературăра çĕнĕ курăм кăтартма пултаракан автор.
Микула // 1077.37.9691
2023.01.10 15:53
Пур вӑхӑта- уйрӑм кӗреке .(Микула)
Agabazar // 4156.32.1630
2023.01.11 13:48
Agabazar
Малай ачам,

чăваш халăхĕн йышĕ чакать пулсан, куншăн чăвашсен намăсланма кирлĕ мар.

Ыттисем намăсланччăр. Чăваш халăхне çул кăтартса ертсе пыратпăр текенсем намăслаччăр.

Ертсе çавăтса пыракансем вара пур, çук мар.

Мĕн чухлĕ чакнине тепĕр хут тĕрслерĕм — 369 пин чухлĕ. 369 000. Тăватçĕртен вăл питех уйралса тăмасть. Çавракалатсан шăпах 400 000 пулать.

Ну ун чухлех мар, 369 000 çеç текелесе савăнма пултаратăн. Манран ку тĕлĕшпе чару çук.

Тата ман шутпа, Станьяла Акапасартан «хÿтĕлекен» çын ним тума та кирлĕ мар.

Акапасарсемпе «çапăçассин» вĕçне тăрса юлсан, пурнăç пĕтет вара.
Евразиец // 1855.68.3619
2023.01.13 19:37
Эх, Малай, Малай, Малай... Вăхăт çитсе пырать-им? Çурри çармăс, çурри чăваш пуль эсĕ.
Малай // 1020.95.9003
2023.01.18 20:12
Эп Ҫармӑс пулса Ҫармӑссен йышне хӑватлатма хирӗҫ мар, эп тутарсен еннерех ҫав.Унти чӑвашсем мансӑрах хватлӑ. Кунтисем ниепле те ҫаплах ҫырмаран тухаймаҫҫӗ. Тӗлӗнсе каятӑп, нимле ӑнтӑлу та ҫук. Эстрадинче те пулин мунча такмакӗсем, тата айванла юрату кӑна. Вӗсене тӑнласа ман хамӑн чӑваш пулас килмест.
Agabazar // 2989.67.1410
2023.02.14 20:12
Agabazar
Çармăссен шутне кĕрсе çармăссене хăватлăлатать иккен-ха ку... Тролль темерĕн!...
Малай // 2911.64.7332
2023.02.15 14:02
Ҫармӑссем юмӑҫсем нумай, почтӑна илме пултарас, ҫавӑнпа унта тасарах пурнӑҫ. Кунта усал вӑйсем ярса илнӗ чӑвашлӑха, кунта ырри ҫӗнтереймест
Agabazar // 1051.05.1784
2023.02.15 17:33
Agabazar
Ай-уй, эс кунтах-им-ха?

Страницӑсем: 1, 2

Комментариле

Сирӗн ятӑp:
Анлӑлатса ҫырни:
B T U T Ячӗ1 Ячӗ2 Ячӗ3 # X2 X2 Ӳкерчӗк http://
WWW:
ӐӑӖӗҪҫӲӳ
Пурӗ кӗртнӗ: 0 симв. Чи пысӑк виҫе: 1200 симв.
Сирӗн чӑвашла ҫырма май паракан сарӑм (раскладка) ҫук пулсан ӑна КУНТАН илме пултаратӑр.
 

Эсир усӑ курма пултаракан Wiki тэгсем:

__...__ - сӑмаха каҫӑ евӗр тӑвасси.

__aaa|...__ - сӑмахӑн каҫине тепӗр сӑмахпа хатӗрлесси («...» вырӑнне «ааа» пулӗ).

__https://chuvash.org|...__ - сӑмах ҫине тулаш каҫӑ лартасси.

**...** - хулӑм шрифтпа палӑртасси.

~~...~~ - тайлӑк шрифтпа палӑртасси.

___...___ - аялтан чӗрнӗ йӗрпе палӑртасси.

Orphus

Ытти чӗлхесем

Баннерсем

Шутлавҫӑсем