Сайта кӗр | Регистраци | Сайта кӗрсен унпа туллин усӑ курма пулӗ
 +12.0 °C
Ырӑ тус укҫаран хаклӑрах.
[ваттисен сӑмахӗ]
 

Аçтахар Плотников: Адыгайӑри Рузаннӑн паттӑрла ӗҫӗ

Аçтахар Плотников10.07.2017 11:482674 хут пӑхнӑ

Ҫӗртме уйӑхӗ вӗҫӗнче 11-мӗш класс вӗренсе пӗтерекенсем хӑйсен аттестачӗсене илеҫҫӗ. Пурнӑҫӑн аслӑ ҫулӗ ҫине тухма паракан ҫак пӗрремӗш документа хальхи вӑхӑтра чыслӑн та чаплӑ уяв ирттерсе параҫҫӗ. Унашкал уяв Адыгей Республикинче те иртнӗ, ҫамрӑксене аттестатсем панӑ. Рузанна Туко ятлӑ хӗр сцена ҫине тухсан вара республикӑра пысӑк пӑтӑрмах сиксе тухнӑ — вӑл хӑйпе пӗрле вӗреннӗ тепӗр хӗре ылтӑн медале панипе килӗшменни пирки пурте илтмелле каланӑ. Ахаль-махаль хӗр пирки сӑмах пырсан ку пӑтӑрмах пирки Раҫҫейри МИХсем анлӑн ҫутатмӗччӗҫ-ха та. Лешӗ вара, иккен, тӳре-шара хӗрӗ. Ҫавна май амӑшӗ хӑйӗн тӗпренчӗкӗ валли ылтӑн медаль туса панӑ пулать. Ку Рузаннӑна килӗшмен, вӑл тӳре-шара хӗрӗ ылтӑн медале тивӗҫ пулманни пирки каланӑ. «Эпир ҫулталӑкӗ-ҫулталӑкӗпе тӑрӑшса вӗрентӗмӗр, тӑрӑшрӑмӑр, хӑшӗ-пӗри вара уроксене ҫӳремесӗрех ылтӑн медаль илеҫҫӗ», — тенӗ хастар хӗр.

Ӗлӗк, совет самани вӑхӑтӗнче, Павлик Морозов пек ачасене ҫӗклетчӗҫ, вӗсен ӗҫне тӗслӗх пек лартатчӗҫ (тӗрӗс астӑватӑп пулсан, вӑл хӑйӗн ашшӗне, кулаксен йышне кӗрекенскере, тӗрмене ларттарнӑ, ӑна ҫавӑншӑн кулаксем персе вӗлернӗ). Е Петӗр Хусанкайӑн «Таня» поэмӑри сӑнарӑн прототипне Зоя Космодемьянскаяна аса илме пулать. Ӑна та совет пропаганди вӑйлӑ ҫӗклетчӗ, тӗслӗх илме сӗнетчӗ.

Хальхи вӑхӑтра ман шутпа Рузанна Тукӑна ҫавнашкал ҫӗклемелле, вӗсен паттӑрлӑхне пропагандӑламалла. Паянхи куна илсен Адыгей Респуубликин ҫамрӑк хӗрӗн ӗҫне чӑн та паттӑрлисен йышне ним мар кӗртме пулать — леш хӗрӗ ахаль-махаль ҫын ачи пулнине пӑхса тӑмасӑрах тӗрӗсмарлӑха ҫиеле кӑларма хӑват ҫитернӗ. Ман шутпа унашкал хӗрсем, вӑрҫӑ тухсан та тӑван ҫӗршыва хӳтӗлессинче малти ретсенче пулӗҫ, суя патриотизм кӑтартакан тӗрлӗ кадет шкулӗсен вӗренекенӗсем вара вӗсен хыҫӗнче пытанса тӑрӗҫ.

Паянхи пурнӑҫра пирӗнтен ытларахӑшӗ хальхи йӗркесене улӑштарма ҫук тесе пурӑнать. Пысӑк пукан йышӑнакан тӳре-шарана хирӗҫ те кайма май ҫук, хура халӑхран нимӗн те килмест тесе шухӑшлать. Рузаннӑн хастарлӑхӗ вара паянхи пурнӑҫра урӑхла те тума пултарнине кӑтартса пачӗ — хыпарлав хатӗрӗсем пӗлтернӗ тӑрӑх йӗркене пӑсса илнӗ медале леш хӗр каялла тавӑрса панӑ, амӑшне те ӑшӑ вырӑнтан кӑларса ҫапнӑ. Ҫапла май Раҫҫей патшалӑхӗ йӗркене пӑсса ӗҫлекен пӗр тӳре-шараран хӑтӑлма пултарчӗ!

Аван-и? Паллах лайӑх. Шӑп та лӑп ҫав хӗрарӑм пек тӳре-шарасене пулах пирӗн Раҫҫей чӑхӑмласа аталанать. Ҫавӑнпа та йӗрке пӑсакан тӳре-шарана е ытти пуҫлӑха тӳрре кӑларма хӑрамалла мар, чӑн сӑмаха хӑюллӑ каламалла! Пытарса тӑни вара тӳре-шара е пуҫлӑх йӗркене пӑснинчен нихӑш енчен те лайӑхрах мар. Апла-тӑк, хӑрар мар! Хӑюллӑ пулар! Рузаннӑн тӗслӗхӗпе хавхаланар!

 

Комментариле

Сирӗн ятӑp:
Анлӑлатса ҫырни:
B T U T Ячӗ1 Ячӗ2 Ячӗ3 # X2 X2 Ӳкерчӗк http://
WWW:
ӐӑӖӗҪҫӲӳ

Пурӗ кӗртнӗ: 0 симв. Чи пысӑк виҫе: 1200 симв.
Сирӗн чӑвашла ҫырма май паракан сарӑм (раскладка) ҫук пулсан ӑна КУНТАН илме пултаратӑр.

Эсир усӑ курма пултаракан Wiki тэгсем:

__...__ - сӑмаха каҫӑ евӗр тӑвасси.

__aaa|...__ - сӑмахӑн каҫине тепӗр сӑмахпа хатӗрлесси («...» вырӑнне «ааа» пулӗ).

__https://chuvash.org|...__ - сӑмах ҫине тулаш каҫӑ лартасси.

**...** - хулӑм шрифтпа палӑртасси.

~~...~~ - тайлӑк шрифтпа палӑртасси.

___...___ - аялтан чӗрнӗ йӗрпе палӑртасси.


Orphus

Баннерсем

Шутлавҫӑсем

 
Сайт пирки | Пулӑшу | Статистика
(c) 2005-2018 Chuvash.Org
Сайтри материалсене (ытти ҫӑлкуҫсенчен илнисемсӗр пуҫне) CreativeCommons Attribution-ShareAlike 3.0 лицензипе килӗшӳллӗн усӑ курма пулать. Сайтпа ҫыхӑннӑ ыйтусене кунта ярӑр: site(a)chuvash.org
заказать цветы с доставкой, с доставкой