Пĕр енчен ӳстереççĕ, тепĕр енчен касаççĕ тесе вăрçа-вăрçа ĕçлесе ларать хысна тытăмĕнче тăрăшакан пĕлĕшĕм. Иртнинче вăл йĕрсе ярасси патне çитнĕскер ман пата шăнкăравлать. Чунне уçас тенĕ ĕнтĕ-ха мăнтарăн.

«Пирĕн ĕçе паян пысăк шайри тӳре-шара килчĕ, – ăнлантарать тусăм. – Вĕсем пире халĕ эпир мĕн тери ырлăхра пурăнни пирки каласа кăтартма тытăнчĕç. Ĕç укçине аван тӳлеççĕ, пурнăçĕ пыл та çу имĕш». Çук-ха, хăйсен пурнăçĕ пирки каламан лешсем пыл та çу тесе. Курнăçма пынă хысна тытăмĕнчи çав ĕçченсем çавăн пек ыр курса пурăннине палăртнă.

Пыл та çу пурăнатпăр тенипе тусăм ниепле те килĕшме пултарайман. Ачине пĕчченех ÿстерет. Ывăлĕ – студент. Кашни кун ăна çул укçи те, кăнтăрла апатланма та парса ямалла. Пĕр ставка çурăпа ĕçленине кура тупăшран илекен налук тытăннă хыççăн алла 14 пин тенкĕ илет-мĕн те, укçи пĕрех çитсе пымасть. «Икĕ çул каялла эпĕ хальхинчен ытларах илнĕ. Хваттершĕн ун чух 2 пин тенкĕ тӳленĕ. Паян хваттер укçи 4 пин тенкĕрен иртет», – тӳсеймен сăмах чĕнмесĕр пĕлĕшĕм.

«Пĕлетĕн-и, мĕнлерех куçпа тата сăнпа пăхса ман çине сиксе ӳкрĕç!» – йĕрсе яманни тусăмăн. Тĕлпулăва пынă тӳре-шара пурнăç лайăххи пирки аса илтерни, тусăм тем аташса ларни пирки иккĕленнине палăртни çитмен, кайран, вĕсем тухса кайсан, унăн пуçлăхĕ ăна «тăн кĕртнĕ». Пуçлăхсене пули-пулми ыйтупа минретсе ларнишĕн. Ăна та, çемçе пукан çинче ларакан çынна, пысăк пуçлăхсем умĕнче лайăх мар лару-тăрăва кĕртсе ӳкернишĕн.

Тепĕр пĕлĕшĕм вара республика Элтеперĕ Михаил Игнатьев хăйсемпе тĕлпулма пыриччен пуçлăх вĕсене ĕç укçи 12 пин тенкĕ илни пирки йăл кулса калама хушнине пĕлтернĕччĕ. «Вăл укçана эп тытса та курман!» – тарăхса калаçрĕ пĕлĕшĕм. Пĕлместĕп, Михаил Игнатьев пырсан хайхисен ĕç укçийĕпе кăсăкланнă-ши, кусем вара 12 пин илетпĕр тесе йăл кулса суйнă-ши - кăна ыйтса пĕлеймерĕм-ха хальлĕхе...