Вишенер (выр. Вишенеры) — Чӑваш Республикин Хӗрлӗ Чутай районӗнчи ял. Питӗркасси ял тӑрӑхне кӗрет. Сӑр юханшывӗн сылтӑм ҫыранӗнче вырнаҫнӑ.

Географи

Республикӑн тӗп хулине, Шупашкара ҫитме 113 километр, район центрне — Хӗрлӗ Чутай ялне ҫитме — 7 километр, чи ҫывӑх чукун ҫул станцине ҫитме — 37 километр. Ял Сӑр юханшывӗн сылтӑм ҫыранӗнче вырнаҫнӑ.

Истори

XIX ӗмӗрте яла Хӗрлӗ Чутай ҫыннисем никӗсленӗ. 1924 ҫулччен выҫҫӑлкӑ статуслӑ пулнӑ, ун хыҫҫӑн ӑна ял шайне куҫарнӑ.

Администраципе территори пайланӑвӗ тӗлӗшпе XIX ӗмӗртен пуҫласа 1920 ҫулччен Вишенер Кӑрмӑш уесӗн Кӑрмӑш тата Хӗрлӗ Чутай вулӑсӗсене кӗнӗ. 1920–1927 ҫулсенче ял Етӗрне уесӗн Хӗрлӗ Чутай вулӑсне кӗнӗ. 1927 ҫулта Хӗрлӗ Чутай районне кӗнӗ, 1962-1965 ҫулсенче ҫеҫ Ҫӗмӗрле районӗнче шутланнӑ. 1965 ҫултанпа ял каллех Хӗрлӗ Чутай районне кӗрет.

1931 ҫулта ялта «Ударник» колхоз йӗркеленӗ. Ҫынсен тӗп ӗҫӗсем ҫӗр ӗҫӗ, выльӑх-чӗрлӗх ӗрчетесси тата тӗрлӗ ал ӗҫӗ пулнӑ.

Халӑх йышӗ

Ҫулсем тӑрӑх ялти халӑх йышӗн улшӑнӑвӗ:

• 1884 ҫулта 21 арҫын тата 20 хӗрарӑм пурӑннӑ.
• 1897 ҫулхи ҫырав тӑрӑх: 12 кил, 31 арҫын тата 35 хӗрарӑм.
• 1926 ҫулта: 42 кил, 86 арҫын тата 74 хӗрарӑм.
• 1939 ҫулта: 85 арҫын тата 105 хӗрарӑм.
• 1979 ҫулта: 81 арҫын тата 102 хӗрарӑм.
• 2002 ҫулхи ҫырав тӑрӑх: 46 кил, 55 ҫын (22 арҫын тата 33 хӗрарӑм).
• 2010 ҫулхи ҫырав тӑрӑх: 21 уйрӑм кил хуҫалӑхӗ, 36 ҫын (17 арҫын тата 19 хӗрарӑм).

Ялти халӑх — чӑвашсем.

Инфраструктура

Ялта общество апатланӑвӗн предприятийӗ ӗҫлет.

Паллӑ ҫыннисем

• Ахтеркин Михаил Семёнович (1924–?), Тӑван Ҫӗршывӑн Аслӑ вӑрҫине хутшӑннӑскер;
• Мидушкин Егор Максимович (1922–1999), Тӑван Ҫӗршывӑн Аслӑ вӑрҫине хутшӑннӑскер;
• Михопаров Иван Михайлович (1924–?), Тӑван Ҫӗршывӑн Аслӑ вӑрҫине хутшӑннӑскер.