Максим Иванов тунӑ сӑн

Сӗнтӗрвӑрри районӗнчи Хуракасси шкулӗнче 1961 ҫулхи чӳкӗн 5-мӗшӗнче пулнӑ пушарта вилнӗ ачасемпе вӗрентекенсен ячӗпе часавай ҫӗклӗҫ. Ку инкекре 106 ачан тата 4 вӗрентекенӗн пурнӑҫӗ татӑлнӑ. Вӗсене тӑванла вилтӑпринче пытарнӑ.

Часавай тӑвасси пирки пӗлтӗр чӳк уйӑхӗнчех калаҫма пуҫланӑ, вырӑнне сӑвапланӑ та. РФ Патшалӑх Думин депутачӗ пулӑшма шантарнӑ. Анчах ӗҫ пӑчланнӑ. Кӑҫал юпа уйӑхӗнче тин пӗрремӗш кирпӗче хунӑ. Халӗ унта иртен пуҫласа каҫчен ӗҫсем пыраҫҫӗ. Часавая ҫитес ҫул ҫулла туса пӗтермелле.

novyefoto.ru сайтри сӑн

Роспотребнадзор Йӗпреҫ районӗнчи Березовка шкулӗнче плана кӗртмен тӗрӗслев ирттернӗ. Ҫитменлӗхсене тупса палӑртнӑ.

Ачасене палӑртнӑ менюпа килӗшӳллӗн ҫитермен, ирхи апатра порцисем виҫерен пӗчӗкрех пулнӑ. Кунсӑр пуҫне ачасене кашни кун сӗт юр-варӗ, улма-ҫырла паман. Апат блокӗнче ҫимӗҫсене маркировкӑсӑр упранӑ.

Роспотребнадзор шкул директорне 3 пин тенкӗлӗх штрафлама йышӑннӑ. Шкула вара асӑрхаттару ҫырса панӑ.

Чӑваш Енре юлашки ҫулсенче фельдшерпа акушер пункчӗсене нумай ҫӗнетрӗҫ. Ҫӗнӗрен туса лартнӑскерсене кӗрсе тухма кӑмӑллӑ.

Ҫав вӑхӑтрах вӗсенче эмел тавраш сутмаҫҫӗ. Кун пирки «Контактра» халӑх ушкӑнӗнчи «Чувашская Республика» ушкӑнра та сӑмах хускатнӑ.

Алексей Григорьев ятлӑ ҫын ҫырнӑ тӑрӑх, Сӗнтӗрвӑрри районӗнчи Сӗнтӗрпуҫ ялӗнче эмел сутассине «виҫҫӗмӗш ҫул ӗнтӗ йӗркелеймеҫҫӗ». Вӑл палӑртнӑ тӑрӑх, ватӑ ҫынсен тата ялта пурӑнакансен хулари аптекӑсене кайма тивет.

Хастар арҫын палӑртнӑ тӑрӑх, кӑҫалхи кӑрлач уйӑхӗнче саккуна улшӑну кӗртнӗ. Фельдшерпа акушер пункчӗсенче эмел сутма лицензи илмелле мар.

Чӑваш Енӗн Сывлӑх сыхлав министерстви ыйтӑва тишкерме шантарнӑ.

Ҫӗмӗрле ҫывӑхӗнче Сӑр юханшывӗ урлӑ каҫмалли понтон кӗпере илнӗ. Хальлӗхе унта каҫса ҫӳреме ҫук. Кун пирки Чӑваш Енри шыравпа ҫӑлав служби пӗлтерет.

Понтон кӗпер Ҫӗмӗрле хулипе Чулхула облаҫӗнчи Навата ҫыхӑнтарнӑ. Хӗл лариччен ҫав вырӑнтан каҫмалли кӗпер пулмӗ. Юханшыв пӑрпа витӗнсен тин хӗллехи каҫӑ пулӗ.

Яндекс.дзен сайтри сӑн

Красноармейски районӗнче пурӑнакан кинемей тахҫан вилнӗ ывӑлӗшӗн компенсаци илес тенӗ. Анчах ултавҫӑсен серепине лекнине кайран тин ӑнланнӑ.

Юпа уйӑхӗнче ун патне палламан ҫын шӑнкӑравланӑ. Хайхискер каланӑ тӑрӑх, ывӑлӗ пурӑннӑ чухне ултавҫӑсен аллине лекнӗ, халӗ лешсене тытса чарнӑ. Куншӑн амӑшне 200 пин тенкӗ компенсаци параҫҫӗ-мӗн. Анчах 7,5 процентне ҫар ҫыннисене пулӑшмашкӑн куҫарса памалла имӗш.

Хӗрарӑм 15 пин тенкӗ куҫарса парсанах палламан ҫын телефонне тытма пӑрахнӑ.

fs01.cap.ru сӑнӳкерчӗкӗ

Чӑваш Енри виҫӗ управляющи компани лицензисӗр юлнӑ.

Нумай хваттерлӗ ҫуртсене тытса тӑракан предприятисенчен 152-шӗн ӗҫлеме ирӗк илнӗ лицензийӗ 2023 ҫулхи кӑрлач уйӑхӗн 11-мӗшӗнче тухать. Вӗсем унчченхи лицензие 2018 ҫулхи кӑрлач уйӑхӗн 1-мӗшӗччен илнӗ.

Лицензи вӑхӑтне тӑсса пама ыйтса Чӑваш Енӗн патшалӑх ҫурт-йӗр инспекцине 124 заявлени ҫитернӗ. Чӳк уйӑхӗн 1-мӗшӗ тӗлне 33 компанин заявленине пӑхса тухма ӗлкӗрнӗ, вӗсенчен виҫҫӗшне лицензи вӑхӑтне тӑсса паман. Кунта ҫак управляющи компанисем лекнӗ: «Платина 21» управляющи компани, «Монолитсервис» тата «Хотэй» тулли мар яваплӑ обществӑсем.

yarnovosti.com сайтри сӑн

Республикӑра сиренӑсем мӗнле ӗҫленине черетлӗ хутчен тӗрӗслӗҫ. Ку чӳк уйӑхӗн 8-мӗшӗнче пулӗ. Инкеклӗ лару-тӑру министерстви пӗлтернӗ тӑрӑх, ку тӗрӗслев планпа килӗшӳллӗн иртӗ. Ҫавӑнпа ҫынсене лӑпкӑ пулма ыйтаҫҫӗ.

Сиренӑсем 10 сехет те 40 минутра янӑрӗҫ. "Внимание всем!" - ҫапла сӑмахсем янӑрӗҫ ун чухне.

Сӑмах май, сиренӑсене пуш уйӑхӗн 2-мӗшӗнче тата утӑ уйӑхӗн 20-мӗшӗнче тӗрӗсленӗ.

"Про Город" сайтӗнчи сӑн

Патӑрьел районӗсем каллех туйра вӑйлӑ савӑннӑ. Вӗсен савӑнӑҫне полицейскисем те асӑрханӑ.

Туй ҫыннисем машинӑпа пынӑ чухне ҫул-йӗр правилисене пӑснӑ. Юрӑ-кӗвӗ хытӑ янӑранӑ, сигнал кӑшкӑртнӑ. Ҫитменнине, машинӑсен патшалӑх номерӗ пулман. Хайхискерсем транспорт хирӗҫ килекен ҫул ҫине тухса кайнӑ, ытти машинӑна ҫул айккинелле хӗснӗ.

Туйри тӗп машина люкӗнчен арҫын пуҫне кӑларса шампань эрехӗн кӗленчисене пенӗ.

Халӗ йӗрке хуралҫисем кун тӗлӗшпе тӗрӗслев ирттереҫҫӗ.

ШӖМ тунӑ сӑн

Ҫу уйӑхӗн 26-мӗшӗнче Шупашкар районӗнчи Ҫатракассинче ларакан ВАЗ-2114 машина ҫухалнӑ, ҫӗртмен 17-мӗшӗнче Шупашкарти 9-мӗш Пилӗкҫуллӑх проспектӗнчи парковкӑран ҫавнашкал модельлӗ машина "ураланнӑ".

Вӑрра 4 уйӑхран тупнӑ. Вӑл - Шупашкар районӗнчи Ҫатракассинче пурӑнакан 36 ҫулти арҫын. Хайхискер йӑлтах каласа кӑтартнӑ. Пӗрремӗш машинӑн запчаҫӗсене кӑларнӑ та ҫунтарса янӑ. Ун чухне вӑл ӳсӗр пулнӑ. Тепӗр машинипе арҫын Мускав облаҫне ларса тухса кайнӑ. Вӑл унта ӗҫленӗ. Ӑна йӗрке хуралҫисем ӗҫ вырӑнӗнче тытса чарнӑ.

Ун тӗлӗшпе пуҫиле ӗҫ пуҫарнӑ.

cap.ru сӑнӳкерчӗкӗ

Сӗнтӗрвӑрри районӗнчи Хуракассинче пысӑк инкек пулнӑранпа 61 ҫул ҫитнӗ. Шӑп та лӑп 61 ҫул каялла, чӳкӗн 5-мӗшӗнче, шкулта пушар тухнӑ.

Ҫав кун Октябрь революцине халалланӑ уяв пынӑ. Физика пӳлӗмӗнчен тухнӑ ҫулӑм акт залӗнче хӑвӑртах сарӑлнӑ. Ачасем, вӗрентекенсем чӳречерен урама тухма хӑтланнӑ, кӑшкӑрашнӑ. Часах тӑрри йӑтӑнса аннӑ та ҫуйхашу шӑпланнӑ...

Паян Хуракассинче инкекре вилнисене асӑнса лартнӑ палӑк умӗнче митинг иртнӗ. Ку хӑрушӑ инкекре вилнӗ 106 ачана тата 4 вӗрентекене асӑннӑ.