Ҫӑлкуҫ: cap.ru

Тӑвайри тӑлӑхсем, ашшӗ-амӑшӗсӗр юлнӑскерсем, хваттерлӗ пулса тӑраҫҫӗ. Кун пирки Тӑвай муниципаллӑ округӗн официаллӑ сайчӗ хыпарлать.

Тӑвай муниципаллӑ округӗн ертӳҫин тивӗҫӗсене вӑхӑтлӑха пурнӑҫлакан Олег Ломоносов ашшӗ-амӑшӗн хӳттисӗр юлнӑ тепӗр ҫамрӑка кӗҫнерникун хваттер ҫӗраҫҫипе тивӗҫтернӗ. Ҫӗнӗ хваттерлӗ пулса тӑнӑскере вӑл ҫак савӑнӑҫлӑ пулӑмпа саламланӑ, малашнехи пурнӑҫра ӑнӑҫу суннӑ.

Муниципаллӑ округӑн сайчӗ хыпарланӑ тӑрӑх хваттерте хӑтлӑ пурнӑҫ валли мӗнпур условисене хатӗрленӗ.

Сӑмах май, Тӑвай тӑрӑхӗнче тӑлӑхсене хваттерпе тивӗҫтерес ӗҫ планпа килӗшӳллӗн пырать тесе хыпарлаҫҫӗ. Кӑҫал виҫҫӗшне хваттерпе тивӗҫтернӗ, тепӗр иккӗшне ҫурт-йӗр туянма сертификат панӑ. Ҫулталӑк вӗҫӗччен черетре тӑракан тепӗр ҫамрӑка пурӑнмалли ҫурт-йӗрпе тивӗҫтересшӗн.

Ҫӑлкуҫ: cap.ru

Кӗҫнерникун Етӗрне муниципаллӑ округӗнчи Урпаш вӑтам шкулне ҫул ҫитменнисемпе ӗҫлекен аслӑ инспектор Смирнова Ю.А. ҫитнӗ. Етӗрне муниципаллӑ округӗнчи ҫул ҫитменнисемпе тата право тӗлӗшӗнчен ӗҫлекен Данилова С.В. яваплӑ секретарьпе пӗрле вӑл шкул ачисене вырӑнти преступность пирки каласа панӑ.

Шкула ҫитнӗ хӑнасем уйрӑмах пысӑк тимлӗхе эрех-сӑрапа тата вейппа ашкӑнни ӳсекен организма мӗнле сиен кӳни пирки тимлӗх уйӑрнӑ. Унсӑр пуҫне мопедпа, скутерпа тата мотоциклпа ярӑннӑ чухне мӗнле яваплӑх пулни ҫинчен каласа панӑ. Йӗркене пӑсса ярӑнсан ҫакӑ вӗсен ашшӗ-амӑшне мӗн чухлӗ штраф тӳлеттерме пултарни пирки асӑннӑ.

Калаҫу вӑхӑтӗнче, паллах, ҫирӗпленнӗ йӗркене пӑхӑнмалли ҫинчен те каланӑ, ҫакӑ ашшӗ-амӑшӗн ятне те, шкул ятне те ямӗ тенӗ.

ШӖМ тунӑ сӑн

Авӑн уйӑхӗн пуҫламӑшӗнче полицие хыпар ҫитнӗ: Патӑрьел тата Комсомольски муниципаллӑ округӗсенче такам ҫул ҫинчи 70 ытла палла касса кайнӑ, тӗпӗсем кӑна юлнӑ. Ҫапла 30 ҫухрӑм ҫинчи паллӑсем ҫухалнӑ.

Ҫакна кам тунине палӑртма полицейскисене сехет те кирлӗ пулман - паллӑсене тиесе кайнӑ Газеле тупса палӑртнӑ. Ҫак ӗҫе Самар облаҫӗнче пурӑнакан арҫын тума пултарнине палӑрнӑ. Вӑл вӗсене тимӗр-тӑмӑра кайса пама шутланӑ иккен.

Арҫын тӗлӗшпе пуҫиле ӗҫ пуҫарнӑ.

"Лиза Алерт" архивӗнчи сӑн

«Лиза Алерт» шыравпа ҫӑлав отрячӗн хастарӗсем Шупашкарти 37 ҫулти арҫынн пиллӗкмӗш кун шыраҫҫӗ. Дмитрий Вячеславович Герасимов юпа уйӑхӗн 15-мӗшӗнче килтен тухса кайнӑ та таврӑнман.

Вӑл 175 сантиметр ҫӳллӗш, куҫӗ кӑвак, ҫӳҫӗ тӗттӗм. Килтен кайнӑ чухне тӗттӗм кӑвак куртка, кӑвак джинс шӑлавар, сӑрӑ кроссовка тӑхӑннӑ.

Дмитрий Герасимов пирки мӗн те пулин пӗлетӗр тӗк ҫак номерсеме шӑнкӑравлама ыйтаҫҫӗ: 8(800)700-54-52 е 112. Лиза Алерт» инфоргӗ Ольга (Рыба), 89278443533.

www.cap.ru сӑнӳкерчӗкӗ

Чӑваш Енӗн Верховнӑй сучӗн председателӗ пулма Анатолий Петрова ҫирӗплетнӗ.

Ӑна тата ытти судьяна федерацин Чӑваш Енри инспекторӗ Григорий Сергеев юпа уйӑхӗн 17-мӗшӗнче удостоверенисем панӑ.

Анатолий Петрова тепӗр вӑхӑтлӑха Чӑваш Енӗн Верховнӑй сучӗн председателӗнче хӑварасси ҫинчен калакан Хушӑва Раҫҫей Президенчӗ Владимир Путин авӑн уйӑхӗн 27-мӗшӗнче алӑ пуснӑ.

Анатолий Петров суд тытӑмӗнче 1997 ҫултанпа ӗҫлет. 1997-2003 ҫулсенче вӑл Шупашкар хулинчи Калинин районӗнче судра судья пулнӑ, унтан суд председателӗн ҫумӗ пулма шаннӑ. 2003 ҫулта Чӑваш Республикин Верховнӑй сучӗн судйи пулса ӗҫлеме тытӑннӑ. 2013-2017 ҫулсенче унта председателӗн заместителӗнче тӑрӑшнӑ. Кайран ӑна председатель тивӗҫне пурнӑҫлама шаннӑ.

cap.ru сӑнӳкерчӗкӗ

Ҫитес ҫул пирӗн республикӑра «Воин» (чӑв. Ҫар ҫынни) ҫарпа спорт хатӗрленӗвӗн центрӗ уҫӑлӗ.

Унта 14 ҫултан аслӑрах ҫамрӑксем ҫата кирлӗ тӗрлӗ япалана хӑнӑхӗҫ, ҫав шутра — инженер хатӗрленӗвӗ, мина ӗҫне. Вӗренӳ вӑхӑчӗ 3 эрнерен пуҫласа 3 уйӑх таран пырӗ.

Республикӑра ҫарпа спорт хатӗрленӗвӗн центрӗ кирли пирки республика Элтеперӗ Олег Николаев Чӑваш Енӗн Патшалӑх Канашне янӑ Ҫырура асӑнса хӑварнӑ.

Ун пек центрсем, сӑмах май каласан, ытти ҫӗре те пулӗҫ.

forum.na-svyazi.ru сайтри сӑн

Паянхи ир тӗлне Чӑваш Енре 22 пин ҫын ҫутӑсӑр пулнине пӗлтернӗ. Аса илтерер: ӗнер вӑйлӑ ҫил ҫурт тӑррисене сӳнӗ, йывӑҫсене тӳнтернӗ.

Хальхи вӑхӑтра 8 муниципалитетри хӑш-пӗр ялта ҫутӑ ҫук. Пӗтӗмпе 9 пин ҫуртра /вӗсенче 22 пин ҫын пурӑнать/ электроэнерги пӗтнӗ. Кунсӑр пуҫне социаллӑ тытӑмри 30 объектра ҫутӑ ҫук. Хальхи вӑхӑтра бригадӑсем ӗҫлеҫҫӗ.

ЧР Элтеперӗ Олег Николаев пӗлтернӗ тӑрӑх, ҫитес вӑхӑтра япӑх ҫанталӑк мӗн чухлӗ тӑкак кӳнине шутлӗҫ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн темиҫе специалисчӗ ҫак кунсенче Чулхула облаҫӗнчи Городец хулинче ӗҫлеме вӗренет.

Асӑннӑ центрта «Маленькая мама» (чӑв. Пӗчӗк амӑшӗ) пурнӑҫа кӗрет. Вӑл — ҫул ҫитмен амӑшӗсене пулӑшмалли проект.

Городецра ҫӗршывӑн тӗрлӗ кӗтесӗнчи специалистсем пухӑннӑ. Вӗсене Йывӑр лару-тӑрури ачасене пулӑшмалли фонд специалисчӗсем вӗрентеҫҫӗ.

cap.ru сӑнӳкерчӗкӗ

Тӑвайри 1-мӗш ача пахчине ҫӳрекен шӑпӑрлансем микро ешӗл ҫимӗҫ ӳстереҫҫӗ, вӑрӑсене вӗренеҫҫӗ. Унта Сергей Михайлов пулӑшнипе агролаборатори уҫӑлнӑ.

Агролаборатори ачасене хими, экологи, физика вӑрттӑнлӑхӗсемпе паллаштарӗ. Пӗчӗкскерсем ансат сӑнавсем ирттерӗҫ. Ҫакӑ вӗсене тӗпчев ӗҫӗпе кӑсӑкланма та хӗтӗртӗ.

t.me/chuv_prok сайтри сӑн

Паян вӑйлӑ ҫиле пула тӗрлӗ тӑрӑхра шар курнӑ. Шупашкарти тата Патӑрьел тӑрӑхӗнчи пӑтӑрмахсем пирки пӗлтернӗччӗ ӗнтӗ.

Муркаш муниципаллӑ округӗнчи Шурчара шкул тӑррин пӗр пайӗ хӑйпӑннӑ. Сӗнтӗрвӑрринче Ярославль урамӗнчи нумай хваттерлӗ ҫурт тӑрринчен темиҫе шифер вӗҫсе ӳкнӗ. Прокуратура вырӑнти влаҫа юсав ӗҫӗсене ҫийӗнчех тума ыйтнӑ.

Палӑртмалла: хӑш-пӗр тӑрӑхра вӑйлӑ ҫиле пула электричество сӳннӗ. Паян каҫ тӗлне республикӑри 12 пине яхӑн ҫын ҫутӑсӑр юлнӑ.