Тӑвай районӗнче М-12 «Хӗвелтухӑҫ» ҫула тунӑ чухне ваннӑ ҫула юсама тытӑннӑ. Асӑннӑ ӗҫе «Энӗш» тата «Тӑвай-Чутей-Аслӑ Кайбицы» ҫулӑн Тӑвай районӗнчи пайӗнче пурнӑҫлаҫҫӗ.
«Энӗш» ҫул ҫинчи 5 пин тӑваткал метр ытла лаптӑк ҫинчи кивӗ асфальта илсе ҫӗнннине сарӗҫ, «Тӑвай-Чутей-Аслӑ Кайбицы» ҫул ҫинче – 35 пин тӑваткал метр.
Юсав ӗҫне пурнӑҫлаканни — «Автодор» предприяти. ӖҪе пурнӑҫланине саплаштармалли тӑкака «М-12» ҫулӑн проектне тунӑ чухне пӑхса хӑварнӑ.
Шупашкар муниципалллӑ округӗнчи Ишлейри пульницӑна тӗпрен юсасшӑн.
Район пульницин тӗп корпусне тӗплӗн юсакан палӑртма аукцион ирттерессине пӗлтернӗ. Контрактӑн пуҫламӑш хакӗ — 123,3 млн тенкӗ. Ҫӗнтерӳҫӗне ака уйӑхӗн 25-мӗшӗнче палӑртмалла.
Медицина учрежденийӗн ҫурчӗ Ишлейри Совет урамӗнчи 31-мӗш ҫуртра вырнаҫнӑ. Тӗплӗ юсав ирттернӗ май ҫутӑ пӑралукне, шыв тата тытӑмне, вентиляцие улӑштармалла.
Подрядчикӑн пульницӑна чӳк уйӑхӗн вӗҫӗччен юсаса пӗтермелле.
Шупашкарти аэропортӑн ҫӗнетнӗ терминалне ҫӗртме уйӑхӗнче ҫӗнетесшӗн. Вӑл вӑхӑта аэровокзалӑн 85 процентне юсаса пӗтересшӗн.
Калӑпӑшлӑ юсав ӗҫӗ виҫӗ ҫула яхӑн пырать. Реконструкции вӗҫлеме палӑртнӑ вӑхӑта темиҫе хутчен те куҫарнӑ. Вӗҫсе каймалли зонӑна кӑҫалхи ҫулла уҫасшӑн. Пассажирсене регистрацилемелли, багажа автоматика мелӗпе йышӑнмалли, паспорт тӗрӗслевӗн, тӗрӗслев, стерильлӗ зонӑсене ӗҫлеттерсе ярасшӑн.
Хӗрлӗ Чутайӗнчи истори ҫуртне юсаса ҫӗнетме палӑртнӑ. Икӗ хутлӑ йывӑҫ шкул ҫуртне реставрацилессин проекчӗ патшалӑх экспертизи витӗр тухнӑ. Ӑна Пӗрлехи патшалӑх реестрӗнче пӗлтӗрхи раштав уйӑхӗн 13-мӗшӗнче регистрациленӗ.
Культура эткерлӗхӗн объекчӗн адресӗ – Хӗрлӗ Чутайӗнчи Совет урамӗнчи 5б ҫурт.
Вӑл ҫурт XIX ӗмӗр вӗҫӗнче – XX ӗмӗр пуҫламӑшӗнче хӑпартса лартнӑ общество ҫурт-йӗрӗн паха тӗслӗхӗ шутланать. Хальхи вӑхӑтра икӗ хутлӑ ҫуртпа усӑ курмаҫҫӗ.
Реставраци вӑхӑтӗнче ҫурта юсаса ҫӗнетӗҫ, анчах унӑн малтанхи сӑнне упраса хӑварӗҫ.
Шупашкарти Арбитраж сучӗн ҫуртне тӗпрен юсасшӑн. Ҫав ҫурт хулари Ленин проспектӗнчи 4-мӗш ҫуртра вырнаҫнӑ. Вӑл республика пӗлтерӗшлӗ культура эткерлӗхӗн объекчӗ шутланать. Реставраципе ҫыхӑннӑ ӗҫсем нумаях пулмасть патшалӑх экспертизи витӗр тухнӑ.
Тӑватӑ хутлӑ кирпӗч ҫурта 1954 ҫулта хӑпартнӑ. Малтан ӑна Электроаппаратура завочӗн общежитийӗ тесе тунӑ. Проект авторӗ – паллӑ чӑваш архитекторӗ Феофан Сергеев.
Чӑваш Енӗн Арбитраж сучӗ ҫав ҫуртра 1991 ҫултанпа ӗҫлет. Ун валли хӑй вӑхӑтӗнче шалти планировкӑна тата кӗмелли алӑка улӑштарнӑ.
«М-7» автоҫулӑн Горьки ҫул пӑрӑнчӑкӗнчен пуҫласа Кӳкеҫе ҫитичченхи участокне килес ҫул юсас шанчӑк пур. Кун пирки республика Элтеперӗ Олег Николаев палӑртса хӑварнӑ.
Асӑннӑ лаптӑка юсаса ҫӗнетессипе ҫыхӑннӑ проект пур иккен. Объекта пилӗк ҫулхи плана кӗртнӗ.
«Ҫул-йӗрҫӗсемпе кашни тӗл пулмассеренех юсав ӗҫне пуҫӑнма ыйтса вӗсене васкататӑп. Унти пӑкӑ ҫынсене самай кансӗрлеҫҫӗ. Ку ыйтупа кӑҫал мар пулсан килес ҫул ӗҫлеме тытӑнатпӑрах тесе шухӑшлатӑп», — тенӗ республика ертӳҫи.
Чӑваш Енре спортӑн хӗллехи тӗсӗсен центрӗнче иртнӗ эрнере биатлонистсене пемелли ҫӗнӗ оборудовани вырнаҫтарма тытӑннӑ. Асӑннӑ центр Олимп резервӗн 2-мӗш спорт шкулӗ ҫумӗнче шутланать.
Центрта 30 электромеханика мишеньне (вӑл Финляндире туса кӑларнӑскер) вырнаҫтарнӑ. Ун йышшисем 50 ҫӗршыври 200 ытла стадионта пур иккен.
Спортӑн хӗллехи тӗсӗсен центрӗнче ҫавӑн пекех йӗлтӗр роллер трассине тӑвасси малалла пырать. Ҫав ҫул 4 километр тӑршшӗ пулӗ. Вӑл трасса биатлонӑн тата йӗлтӗрҫӗсен пур енлӗ ӑмӑртӑвне ирттерме май парӗ. Объектра триатлонистсемпе велосипедистсем тренировкӑсем ирттерейӗҫ. Ӗҫе 2024 ҫулхи юпа уйӑхӗн 31-мӗшӗ тӗлне вӗҫлемелле.
Чӑваш Енре биатлон центрне тума май килменнишӗн пӑшӑрханса Татьяна Акимова биатлонистка калани пирки 6 ҫул каялла Дмитрий Губерниев спорт комментарторӗ тӳрӗ эфирта темиҫе хутчен те асӑнса хӑварнӑччӗ. Дмитрий Губерниев ҫавӑн чухне каланӑ тӑрӑх, ун патне ачасем те пулӑшу ыйтса ҫыраҫҫӗ.
Шупашкарти А.Г. Николаев ячӗллӗ аэропорта килес ҫул юсаса пӗтерӗҫ. Кун пирки Чӑваш Ен Элтеперӗ Олег Николаев ӗнер тӳрӗ эфир вӑхӑтӗнче пӗлтернӗ.
Аса илтерер: реконструкцие пуҫланӑ чухне ӗҫе кӑҫал вӗҫлессине палӑртнӑччӗ. Анчах кайран самана улшӑнса кайрӗ, пирӗн ҫӗршыв тӗлӗшпе тӗрлӗ санкци йышӑнчӗҫ.
«Юсава кӑҫал вӗҫлесшӗнччӗ. Анчах, пӗрремӗшӗнчен, санкци витӗмне пула оборудование тата документацие улӑштарма тиврӗ, иккӗмӗшӗнчен, ҫӗнӗрен туса лартма киввине юсассинчен ҫӑмӑлтарах», — тесе ӑнлантарнӑ Олег Николаев.
Шупашкарти аэропорта юсаса пӗтерме тепӗр 2 миллиарда яхӑн тенкӗ укҫа кирлӗ. Тата тӗрӗсрех каласан, 1,75 миллиард тенкӗ.
Вӑл укҫа сывлӑш гаваньне юсаса ҫӗнетме кирлӗ. Перронӑн тата руль ҫулӗн пӗр пайне аэропорт территорийӗн юсаса ҫӗнетмелле. Аэропорта 2024 ҫулта ҫӗнетсе пӗтермелле. Тӑкаксен виҫи 1,75 миллиард тенкӗпе танлашӗ. Кун пирки ТАСС информаци агентстви хыпарланӑ.
Шуашкарти культура эткерлӗхӗн ҫурчӗ шутланакан объетсенчен пӗрне кӗҫех юсаса пӗтерӗҫ.
Республикӑн Культура министерствинче пӗлтернӗ тӑрӑх, телеграфпа «Чувашия» (чӑв. Чӑваш Ен) госиница ҫуртне 1962 ҫулта тунӑ. Ӑна малтанласа комплекслӑ сооружени тесе палӑртнӑ. Вӑл ҫыхӑну ҫуртӗнчен, 300 вырӑнлӑх хӑна ҫурчӗпе ресторантан, телеграфран, 50 хватретен тата ача пахчинчен тӑмалла пулнӑ. Анчах шухӑшланине пурнӑҫа кӗртме май килмен. Ҫурт хӑна ҫуртӗнчен тата телеграф ҫуртӗнчен (унта почта тата «Ростелеком» вырнаҫнӑ).
Юсав ӗҫне кӑҫалхи ҫу уйӑхӗнче пуҫӑннӑ.
+13.3 °C