Юлашки кунсенче республикӑра кӑшӑлвируспа чирлекенсем нумайланса пыраҫҫӗ. Ӗнерхи кун тӗлне 97 койка ҫеҫ пушӑ пулнӑ. Кун пирки ЧР сывлӑх сыхлавӗн министрӗн тивӗҫӗсене пурнӑҫлакан Алексей Кизилов пӗлтернӗ.
Ҫӗртме уйӑхӗнче 13 пульницӑра чирлисем валли 1497 койка хатӗрленӗ. Аса илтерер: ҫӗртмен 18-мӗшӗнче Хулари 2-мӗш пульница ковид-госпиталь пек ӗҫлеме пуҫланӑ. Шупашкар районӗн пульници те халӗ кӑшӑлвируслисене йышӑнать.
Ӗнерхи кун тӗлне стационарта 1400 ҫын сипленнӗ. 363 ҫын хӑйне йывӑр туять. 18 пациент ИВЛпа сывлать.
Кӑшӑлвирус сарӑлнӑран Сӗрпӳ, Вӑрнар районӗн тӗп пульницисем, Ҫӗнӗ Шупашкар хулин пульници те ковид-госпиталь пек ӗҫлеме хатӗр. Вӗсенче 570 койка хатӗрлӗҫ, 18 реанимаци койки пулӗ.
Ӗнер, Республика кунӗнче, Шупашкара шыв ҫийӗн ҫӳрекен «Валдай» карап килсе ҫитнӗ. Хӗрлӗ тата сарӑ шарсемпе капӑрлатнӑскере тӳре-шара тата хула ҫыннисем кӗтсе илнӗ.
Карап Шупашкартан Хусана ҫӳреме тытӑнӗ. Анчах, «Советская Чувашия» хаҫат Инстаграмра хыпарланӑ тӑрӑх, халех мар, кӑшт каярах. Регламентпа ҫыхӑннӑ ӗҫ-пуҫа йӗркелеме пӗр уйӑхран кая мар иртӗ. «Валдай» хальлӗхе Шупашкарти юханшыв порчӗн причалӗсенчен пӗринче ларӗ.
Каярахпа караппа туристсене Хусана турттарма тытӑнӗҫ. Ҫул укҫи 800 тенкӗ пулӗ. Хусана карап 3 сехетре илсе ҫитерӗ. Сӗнтӗрвӑрри тата Куславкка хулисенче малтанласа вӑл чарӑнмӗ, мӗншӗн тесен унта причалсене хатӗрлесе ҫитермен.
Шупашкарти тӗп пляжра каллех ҫын путса вилнӗ. Хальхинче – ҫамрӑк арҫын. Кун пирки «Про Город» хаҫата халӑх корреспонденчӗ пӗлтернӗ.
Арҫын паян, ҫӗртме уйӑхӗн 24-мӗшӗнче, путса вилнӗ. Унӑн виллине 18 сехет те 40 минутра ҫыран хӗррине кӑларнӑ. Следстви комитечӗ кун тӗлӗшпе следстви умӗнхи тӗрӗслев ирттерет.
Аса илтерер: ҫак кунсенче унта 12 ҫулти хӗрача путса вилнӗ. Пляжра вӑл амӑшӗпе тата аппӑшӗпе пулнӑ.
Шупашкарти халӑха социаллӑ пулӑшу кӳрекен комплекслӑ центр ҫынсене тӗрлӗ енлӗ пулӑшу кӳрет. Пӗччен ватӑсене социаллӑ ӗҫченсем киле кайса пулӑшаҫҫӗ. Ачаллӑ ҫемьесемпе тата йывӑрлӑха лекнӗ хӗрарӑмсемпе те ӗҫлеҫҫӗ. Ӳрӗк ватӑсем центра пырса тӗрлӗ ал ӗҫӗпе аппаланаҫҫӗ, зарядка тӑваҫҫӗ, тӗрлӗ мероприятие хутшӑнаҫҫӗ.
Нумаях пулмасть центрта килсӗр-ҫуртсӑр ҫынна пулӑшнӑ. Асӑннӑ арҫын Шупашкара Челепир облаҫӗнчен килнӗ. Унӑн ҫумӗнче нимле документ та пулман. Паспорта та вӑл ҫухатнӑ. Шупашкарти комплекслӑ центр ӗҫченӗсем ҫав этеме паспорт тата пенси страхованийӗн свидетельствине туса пама пулӑшнӑ.
Чӑваш Ен митрополийӗпе Шупашкар епархийӗпе калаҫса татӑлса ҫав ҫына Улатӑрти арҫынсен мӑнастирне пурӑнма ӑсатнӑ.
Шупашкарта пурӑнакан 32 ҫулти хӗрарӑм ултавҫӑсене 1 миллион ытла тенкӗ куҫарса панӑ. Укҫи хӑйӗн те мар, кредитсем илнӗ вӑл.
Ун патне палламан ҫын шӑнкӑравланӑ, банкӑн хӑрушсӑрлӑх ӗҫченӗ имӗш вӑл. Ҫак хӗрарӑм ячӗпе такам креди илесшӗн-мӗн, ахӑртнех, ултавҫӑсем. Арҫын операцие пӑрахӑҫлама сӗннӗ.
Вӑл каласа пынипе хӗрарӑм кредитсем илнӗ, пӗтӗм укҫана тӗрлӗ счет ҫине куҫарнӑ. Хайхискер укҫана каялла тавӑрса парассине шантарнӑ. Ҫапла вӑл ултавҫа 1,1 миллион ытла тенкӗ куҫарса панӑ.
Паян Шупашкарта ултӑ ҫулхи велосипедист машина урапи айне лекнӗ.
Шар курнӑ ача урамра пӗччен, аслисемсӗр, ярӑннӑ. Кун пирки Чӑваш Енӗн Шалти ӗҫсен министерствинче пӗлтернӗ.
Инкек Декабристсен урамӗнчи 33-мӗш урам картишӗнче 16 сехет те 20 минутра пулса иртнӗ.
Шар курнӑ ачана пульницӑна илсе кайнӑ.
Инкек сӑлтавне ҫул-йӗр хӑрушсӑрлӑхӗн патшалӑх инспекцийӗн тӗпчевҫисем тӗпчӗҫ.
Кӑҫал ака уйӑхӗнче «Солнечный» микрорайона 14-мӗш маршрутпа ҫӳрекен троллейбуса ярасси пирки пӗлтернӗччӗ. Анчах транспорта унта халӗ те яман-ха.
Кайран троллейбуса ҫу уйӑхӗн 10-мӗшӗ тӗлне яма палӑртнӑ. Ун чухне те яман. Тинех троллейбус ҫӗнӗ микрорайона ҫӳреме тытӑнӗ. Республика кунӗ ячӗпе троллейбус маршрутне тӑсӗҫ.
Уявра Шупашкара 60 ҫӗнӗ троллейбуса савӑнӑҫлӑ лару-тӑрура парӗҫ. Вӗсенчен 16-шӗ – автономлӑ мелпе ҫӳрекенсем.
Шупашкарти 2-мӗш хула пульници каллех ковид-госпиталь пек ӗҫлеме пуҫланӑ. Кун пирки Роспотребнадзорӑн Чӑваш Енри управленийӗн пуҫлӑхӗн ҫумӗ Вера Головач пӗлтернӗ.
Вӑл каланӑ тӑрӑх, кӑшӑлвиурспа чирлекенсем нумайланса пыраҫҫӗ, ҫавна май хушма койкӑсем хатӗрлеҫҫӗ. Паянхи кун тӗлне республикӑра 1302 койка пулнӑ, вӗсенчен 94-шӗ ҫеҫ пушӑ.
Танлаштармашкӑн: ҫӗртмен 10-мӗшӗ тӗлне республикӑра кӑшӑлвируспа чирлекенсем валли 1160 койка пулнӑ, вӗсенчен 241-шӗ пушӑ тӑнӑ. Малашне Шупашкарти 2-мӗш хула пульницинче кӑшӑлвируспа чирлисене талӑкӗпех йышӑнӗҫ.
Шупашкарти троллейбуссенче икӗ хӗрарӑм аманнӑ. Кунта сӑмах пӗр троллейбус ҫинчен пымасть. Вӗсен маршручӗсем расна.
«Ҫӗнӗ хула» микрорайонтан Университет урамне ҫӳрекен 3-мӗш троллейбусра салонри пассажир аманнӑ. Троллейбуса кӗтмен ҫӗртен хӑвӑрт чарнӑ, хӗрарӑм тытӑнса ӗлкӗреймен — суранланнӑ. Ӑна Васкавлӑ медицина пулӑшӑвӗн пульницине илсе кайнӑ. Инкек транспорт мичман Павлов урамӗпе пынӑ чухне пулса иртнӗ.
Ҫӗртме уйӑхӗн 18-мӗшӗнче 8-мӗш маршрутри троллейбусра (вӑл Хӗветухӑҫ проходнойран Кӑнтӑр посёлокне каять) кондуктор шар курнӑ. Салонта персе аннӑ хӗрарӑма хулари 1-мӗш клиника пульницине ӑсатнӑ.
Шупашкарта пурӑнакан пӗр ҫемье ҫак кунсенче тӑван тӗпренчӗкне чутах ҫухатман. Пӑтӑрмах ҫӗртме уйӑхӗн 16-мӗшӗнче 15 сехет те 35 минутра пулнине «Ҫыхӑнура» форумра паян пӗлтернӗ.
Шупашкарти Тӗп пляжн сылтӑм енче 10 ҫулти ача шӑтӑка лекнӗ, путма пуҫланӑ. Инкек пирки ҫӑлавҫӑсене хӗрачан амӑшӗ пӗлтернӗ. Вӗсем ачана шывран туртса кӑларнӑ.
Ҫӗртме уйӑхӗн 18-мӗшӗ тӗлне илсен пирӗн республикӑра шыва путса 6 ҫын вилнӗ, ҫав шутра икӗ ача пурнӑҫӗ татӑлнӑ. Вӑрнар районӗнче 6 ҫулхи арҫын ача велосипедпа пӗве ҫывӑхӗнче ярӑннӑ чух шыв кӗрсе ӳкнӗ, ҫӗртмен 7-мӗшӗнче Шупашкарти Афанасьев урамӗ тӗлӗнчи пляжра 14-ри яш Атӑла путнӑ.
+9.3 °C