Чӑваш Енри ача ҫурчӗсем ӳлӗмрен пӗр орган тытӑмӗнче пулӗҫ. Кун пирки республикӑн Элтеперӗ ҫумӗнчи ятарлӑ канашӑн ӗнерхи ларӑвӗнче сӳтсе явнӑ. Унта Ачалӑх вунӑҫуллӑхӗпе ҫыхӑннӑ мероприятисем пирки калаҫнӑ. Опекӑпа попечительство органӗсене 2024 ҫулччен пӗр органа пӑхӑнмалла тӑвасси пирки те сӑмах хускатнӑ.
Ларура палӑртнӑ тӑрӑх, юлашки 15 ҫулта пирӗн республикӑра тӑлӑх тата ашшӗ-амӑшӗн хӳттисӗр юлнӑ ачасен йышӗ икӗ хутчен чакнӑ. Паян ун пек ачасен йышӗ 2,4 пинпе танлашать. Тӑлӑхсене тата ашшӗ-амӑшӗн хӳттисӗр юлнисене ҫемьене илесси те икӗ хута яхӑн ӳснӗ.
Паян пирӗн республикӑра тӑлӑх ачасен пилӗк организацийӗ ӗҫлет. Вӗсенчен виҫҫӗшӗ (Пӑрачкаври ача ҫурчӗ, Шупашкарти тата Ҫӗмӗрлери тӑлӑх тата ашшӗ-амӑшӗн хӳттисӗр юлнӑ ачасен центрӗсем) Чӑваш Енӗн Вӗрентӳпе ҫамрӑксен политикин министерствине пӑхӑнса тӑраҫҫӗ, «Малютка» ача ҫурчӗ — Сывлӑх сыхлав министерствине, Кӳкеҫри ӑсран аталанса ҫитеймен ачасен интернат-ҫурчӗ — Ӗҫ тата социаллӑ хӳтлӗх министерствине. Вӗсене ӳлӗмрен пӗр орган тытӑмне куҫарасшӑн.
Шупашкарти "Университет" микрорайонта ыран ҫӗнӗ ача пахчи уҫӑлӗ. Вӑл "Маленькие академики" /чӑв. "Пӗчӗк академиксем"/ ятлӑ. Вӑл Кураков бульварӗнчи 1-мӗш ҫуртра вырнаҫӗ.
Чӑннипе, ача пахчи ҫулталӑк кая юлса уҫӑлать. Унӑн пӗлтӗр кӗркуннех ачасене йышӑнмалла пулнӑ. Анчах подрядчик объекта вӑхӑтра туса пӗтермен.
Виҫӗ хутлӑ ача пахчине ҫулталӑк ҫурӑран аслӑрах 250 шӑпӑрлан ҫӳрӗ. Унта 14 ушкӑн йӗркелӗҫ. Ачасен бассейнра чӑмпӑлтатма та май пулӗ.
Чӳк уйӑхӗн 26-мӗшӗнче ҫуралнисене тӗрленӗ кипке парнелесси йӑлана кӗнӗ. Ку акци пирӗн республикӑра виҫҫӗмӗш хут иртнӗ. Ҫак кун ҫуралнисем "Тӗрӗре ҫуралнисем" акцие хутшӑнакансем пулса тӑраҫҫӗ.
Кӑҫал чӳкӗн 26-мӗшӗнче пепкелӗх центрӗнче 10 ача ҫуралнӑ: 6 арҫын ачапа 4 хӗрача.
Ҫӗнӗ Шупашкарти перинаталь центрӗнче 5 пепке кун ҫути курнӑ. Чӑваш тӗррин кунӗнче ҫуралнисене пурне те чӑваш тӗрриллӗ кипке парнеленӗ.
Василий Чапаевӑн мӑнукӗн ачи вилнӗ. Чӑваш наци музейӗ пӗлтернӗ тӑрӑх, Евгения Чапаевӑн чӗри чӳк уйӑхӗн 26-мӗшӗнче тапма чарӑннӑ.
Евгения Артуровна 62 ҫулта пулнӑ. Вӑл Мускавра пурӑннӑ пулсан та Чӑваш Енпе тачӑ ҫыхӑну тытнӑ. Шупашкартах унӑн хӗрӗ Василиса ҫуралнӑ, кунтах мӑнукӗ Андрей кун ҫути курнӑ, ачана пирӗн хулара тӗне кӗртнӗ.
Евгения Артуровна Чӑваш Ене тӑтӑшах килнӗ. Вӑл «Василек» калавсен пуххине кӑларнӑ, «Мой неизвестный Чапаев» кӗнекене кун ҫути кӑтартнӑ.
Евгения Артуровна юлашки хутчен Шупашкарта ҫу уйӑхӗн 28-мӗшӗнче пулнӑ, В.И.Чапаев ячӗллӗ музея ҫитнӗ. Ӑна ҫӗнетнине курса ӑшӑ сӑмахсем ҫырса хӑварнӑ.
Кӑҫал ҫу уйӑхӗнче Шупашкарта пурӑнакан 26 ҫулти арҫын вӑхӑтлӑх киленӳ шыраса ултавҫӑсен аллине лекнӗ. Вӑл киленӳ кӳрекен хӗре чӗнсе 26 пин тенкӗ куҫарса панӑ. Анчах тӗлпулӑва лешӗ килмен. Кун хыҫҫӑн арҫын хӑйне улталанине ӑнланнӑ.
Чӑваш Енри полицейскисем ҫав ултавҫа тупнӑ. Вӑхӑтлӑх киленӳ сӗнсе укҫа сӑптӑракан ҫын хӗрарӑм та мар, арҫын иккен. Хайхискер Пермь крайӗнче пурӑнакан 34 ҫулти арҫын. Вӑл айӑпне йышӑннӑ, ӑна укҫа-тенкӗ ставкӑсен вӑййине выляма кирлӗ пулнӑ.
Паян, чӳк уйӑхӗн 28-мӗшӗнче, Шупашкарта автобуспа троллейбус инкеке лекнӗ.
Пӑтӑрмах пирки «Руль умӗнче» форумра пӗлтернӗ.
Инкеке куракансем каланӑ тӑрӑх, 45-ӗш маршрутпа ҫӳрекен автобус 20-мӗш маршрутпа хутлакан троллейбуспа ҫапӑннӑ. Инкек хулари Чапаев поселокӗнче пулса иртнӗ.
Пӑтӑрмахра ҫынсем аманни пирки шарламан.
Чӳк уйӑхӗн 25-мӗшӗнче Шупашкарти «Ромашка» лавкка патӗнчи ҫул ҫаврӑмӗнче троллейбуспа маршрутка ҫапӑнни пирки эпир пӗлтернӗччӗ.
Шупашкарта пурӑнакан 65 ҫулти хӗрарӑм йӗрке хуралҫисене преступнике тытма пулӑшатӑп тесе шутланӑ. Анчах вӑл хӑй преступниксен аллине лекнӗ.
Ун патне палламан хӗрарӑм шӑнкӑравланӑ. Вӑл йӗрке хуралӗнче ӗҫлет-мӗн. Хайхискер каланӑ тӑрӑх, ҫак хӗрарӑм ячӗпе доверенноҫ пур, унпа хӑть кам та кредит илме пултарать.
Унтан Шупашкар хӗрарӑмӗпе "банк ӗҫченӗ" ҫыхӑннӑ. Вӑл ӑна банкран укҫине илсе урӑх счет ҫине куҫарма ӳкӗте кӗртнӗ. Ку преступник йӗрӗ ҫине ӳкме кирлӗ-мӗн. Ҫапла пирӗн ентеш 1 миллион та 197 пин тенкӗ куҫарнӑ.
Кун тӗлӗшпе пуҫиле ӗҫ пуҫарнӑ.
Чӳк уйӑхӗн 25-мӗшӗнче Шупашкарти «Ромашка» лавкка патӗнчи ҫул ҫаврӑмӗнче троллейбуспа маршрутка ҫапӑннӑ.
Инкек 14 сехет иртсен пулса иртнӗ. 2-мӗш маршрутпа ҫӳрекен троллейбус дистанцие пӑхӑнман пирки малта пыракан 44-мӗш маршрутка ҫине пырса кӗнӗ. Троллейбуса 34 ҫулти арҫын тытса пынӑ.
Инкек вӑхӑтӗнче троллейбус салонӗнче 15 пассажир пулнӑ, маршруткӑра — ҫиччӗн. Маршруткӑра ларса пынӑ 38 ҫулти хӗрарӑма тухтӑр пулӑшӑвӗ кирлӗ пулса тухнӑ. Анчах пульницӑра выртмаллах аманман вӑл.
Ӗнер, чӳк уйӑхӗн 25-мӗшӗнче, И.Я. Яковлев ячӗллӗ Чӑваш патшалӑх педагогика университечӗн ветеранӗ Людмила Теплова пурнӑҫран уйрӑлса кайнӑ. Вӑл 85 ҫулта пулнӑ.
Хӗрарӑм хӑйӗн пурнӑҫӗн 44 ҫулне педагогика университетне халалланӑ. Вӑл биологи наукисен кандидачӗ, доцент, Чӑваш Республикин халӑх вӗрентӗвӗн тава тивӗҫлӗ ӗҫченӗ, республикӑн хисеплӗ экологӗ пулнӑ.
Людмила Петровна 1937 ҫулхи авӑн уйӑхӗн 15-мӗшенче Шупашкарта ҫуралнӑ.1961 ҫулта Чӑваш пединститучӗн биологипе хими факультетӗнчен вӗренсе тухнӑ, 1965 ҫулта – СССР Наукӑсен академийӗн Хусанти филиалӗн Биологи институтӗнчен вӗренсе тухнӑ.
Паян, чӳк уйӑхӗн 26-мӗшӗнче, кӑнтӑрла Шупашкарта троллейбус ҫуннӑ. Вӑл 6-мӗш маршрутпа ҫӳрекенскер пулнӑ.
Троллейбус кивви мар, ҫӗнниех. Вӑл "Олимпийский" чарӑну патне ҫитсен ҫунма пуҫланӑ. Ҫав вӑхӑтра салонра пассажирсем те пулнӑ. Ҫынсем салонран тухнӑ.
"Про Город" хаҫата халӑх корреспонденчӗ пӗлтернӗ тӑрӑх, ҫулӑм троллейбус тӑрринче курӑннӑ. Вырӑна пушарнӑйсем, васкавлӑ медпулӑшу ҫитнӗ.
+2.3 °C