Чӑваш Республикин культурӑн тава тивӗҫлӗ ӗҫченӗ Ирина Угаслова пурнӑҫран уйрӑлса кайнӑ. Лидия Филиппова журналист пӗлтернӗ тӑрӑх, вӑл тӑван чӑваш культурине, йӑли-йӗркине, чӗлхине упрас, аталантарас ӗҫе нумай ҫул халалланӑ, халӑхсен пӗрлӗхне ҫирӗплетес, ӳссе пыракан ӑрӑва тивӗҫлӗ воспитани парас ӗҫе пысӑк тӳпе хывнӑ. Вӑл «Пӗртӑван Малинасем» ушкӑна ертсе пынӑ. Ушкӑна Чӑваш Енре ҫеҫ мар, Раҫҫейри ытти регионта та лайӑх пӗлнӗ, хакланӑ, юратнӑ.
«Раҫҫей пики» илем конкурсне хутшӑнакансем наци тумне те кӑтартнӑ.
Аса илтерер: унта Чӑваш Енрен Алла Кадеева тата Валентина Алексеева хӑйсен пултарулӑхне кӑтартма тивӗҫлӗ пулнӑ.
Конкурса хутшӑнакан пикесем валли тума чӑваш эрешне тата тӗсне тӗпе хурса хатӗрленине ӗнентереҫҫӗ.
Сӑмах май каласан, илем конкурсне паян, юпа уйӑхӗн 5-мӗшӗнче, пӗтӗмлетмелле.
Чӑваш Ен Элтеперне Олег Николаева чарӑнусен ячӗсене чӑвашла вулаттарасшӑн. Ҫакӑн пек комментарие республика ертӳҫин пабликӗнчи постсенчен пӗрин айӗнчи комментарипе пӗри ҫырса хунӑ.
«Паян 1-мӗш маршрутпа ҫӳрекен 956-мӗш номерлӗ троллейбусра чарӑну ячӗсене чӑвашла, анчах чӑвашла мар акцентпа каланине илтрӗм. Олег Алексеевич, чарӑну ячӗсене сире чӑвашла вулама сӗнетӗп. Ку вӑл чӑвашла калаҫакан ҫын наци культурине витӗм кӳни пулӗ. Ку вӑл Раҫҫейре ҫук опыт пулӗччӗ. Чӑваш чӗлхи пире пӗрлештерет. Эпир чӑвашла калаҫассишӗн! Эсир шупӑр тӑхӑнсан эпир хамӑра тата мӑнаҫлӑрах туйӑттӑмӑр», — тесе ҫырнӑ.
Чӑваш патшалӑх гуманитари ӑслӑхӗсен институтчӗн ӗҫченӗ ҫӗнӗ кӗнекепе паллаштарнӑ. Кӑларӑм ҫинчен вӑл «Чӑваш Ен» наци телерадиокомпанийӗн эфирӗнче, «Ир пулсан» передачара каласа кӑтартнӑ.
Филологи наукисен кандидачӗ, гуманитари ӑслӑхӗсен институтчӗн аслӑ ӑслӑлӑх ӗҫченӗ Галина Ильина «Ыр-усал халапӗсем. Былички» кӗнекепе туллин паллаштарнӑ. Ӑна институтӑн фольклор ӗҫченӗсем хатерленӗ.
Кӗнекене Чӑваш кӗнеке издательствинче пичетлесе кӑларнӑ.
Чӑваш Ен делегацийӗ нумаях пулмасть Кабарда-Балкари Республикинче пулнӑ.
Йӑхташӑмӑрсене Нальчик чӑвашсен общество организацийӗн
председателӗ Алена Чернова ӑшшӑн кӗтсе илнӗ.
Чӑвашсене «Ҫӑлкуҫ» уйлӑхра
вырнаҫтарнӑ, республика тӑрӑх кӑтартса ҫӳренӗ.
Чӑвашсен делегацийӗ Кабарда-Балкари ҫӗрӗ ҫинче Чӳк ирттернӗ, юпа вырнаҫтарнӑ. Ӑна Алексей Казаков скульптор хатӗрленӗ.
Чӑваш Енре хутӑш чӑвашсен «Тапӑ» фестивалӗ иртнӗ. Вӑл Тӑвай округӗнче пулнӑ.
Фестивале тӗрлӗ округран килнӗ: Вӑрмар, Куславкка, Шупашкар, Сӗнтӗрвӑрри, Ҫӗрпӳ, Красноармейски тӑрӑхӗсенчен. Вӗсем историпе, йӑла-йӗркепе, ӳнерпе пайланма пухӑннӑ.
Фестивале хутшӑнакансем тӗрлӗ инструмент каланӑ, юрланӑ, историсем каласа кӑтартнӑ. «Алран кайми аки-сухи» юрлани чи хумхануллӑ самант пулнӑ.
Шупашкар хулинче ҫак уйӑхра чӑваш эпосӗнчи сӑнарсене вырнаҫтарнӑ.
Вӗсене Мускав ҫыран хӗрринче тата кӳлмек тавра лартса тухнӑ.
Ҫав сӑнарсем — чӑваш эпосӗнчен ҫеҫ мар, юмахсенчен те, литературӑран та.
Пурӗ 6 пӗчӗк кӳлепе. Вӗсенчен пӗри — мӑшӑрлӑ.
Вӗсен историйӗпе паллашас тесен кӳлепе патӗнчи qr-кода смартфон камерипе ӳкерсе илмелле ҫеҫ.
Шупашкарти кӳлмекре чӑваш кӗпине тӑхӑннӑ хӗрӗн мини-скульптури вырӑн тупнӑ. Хула 555 тултарнине халалласа ултӑ кӳлепе вырнаҫтарма палӑртнӑ. Ку – вӗсенчен пӗри.
Статуэтка тӗп пляж ҫывӑхӗнче ларать. Ӑна бетон карта ҫумне ҫирӗплетнӗ. Вӑл «Чиперук Пӑлаки» (вырӑсла «Красавица Плаги») ятлӑ. Ун ҫумӗнче QR-код пур, ун ҫине телефон камерипе тӗллесен вӑл чӑваш юмахӗнчи сӑнар пулнине пӗлме май пур.
Кӳлмекре мини-статуэткӑсем татах пур: Уйӑх ҫинчи хӗр, Нарспи тата Сетнер, Тилӗ.
Шупашкарта Хӗрлӗ тӳремре Раҫҫейӗн тӗрленӗ карттине тума 52 миллиона яхӑн тенкӗ уйӑрма хатӗр. Аукционра малтанхи хака палӑртнӑ: 51 миллион та 934,9 пин тенкӗ.
Саккас параканни - Чӑваш наци музейӗ. Аукционра ҫӗнтернӗ подрядчикӑн музея чӳк уйӑхӗн 10-мӗшӗччен туса пӗтермелле. Унӑн лаптӑкӗ 250 тӑваткал метр пулӗ.
Сӑмах май, чӳкӗн 26-мӗшӗнче республикӑра Чӑваш тӗррин кунне паллӑ тӑваҫҫӗ.
Ӗнер, авӑн уйӑхӗн 13-мӗшӗнче, Чӑваш патшалӑх академи драма театрӗ ҫӗнӗ сезона Александр Артемьевӑн «Салампи» пьесипе Чӑваш халӑх артистки Наталия Сергеева режиссёр лартнӑ спектакльпе уҫрӗ.
Пластика режиссёрӗ, балетмейстерӗ – Пушкӑрт Республикин искусствӑсен тава тивӗҫлӗ деятелӗ тата тава тивӗҫлӗ артистки Рамиза Мухаметшина. Художникӗ – Светлана Зверева, ҫутӑ лартакан художникӗ – Михаил Добрышин. Композиторӗ – Чӑваш Республикин искусствӑсен тава тивӗҫлӗ деятелӗ Лолита Чекушкина. Балетмейстерӗ, ташӑсене лартаканӗ – Раҫҫей Федерацийӗн тата Чӑваш Республикин культурӑн тава тивӗҫлӗ ӗҫченӗ Людмила Нянина.
Салампи ролӗнче Анна Цветкова, Алмазов — Арсентий Димитриев.
-5.7 °C