Юлашки вӑхӑтра ҫынсем паллӑ мар ҫынсене укҫа куҫарса пани пирки массӑллӑ информаци хатӗрӗсем пӗлтерсех тӑраҫҫӗ. Тимлӗ пулмалли пирки йӗрке хуралҫисем киле пырсах асӑрхаттараҫҫӗ. Ҫак йӗркесен авторӗ патне (тӗрӗсрех, пирӗн ҫурта), сӑмахран, икӗ хутчен те килсе кайрӗҫ.
Шел те, улталанакансем тупӑнсах тӑраҫҫӗ. «Банкра ман укҫа ҫук-ха, улталанмӑп», — темелле мар. Счет ҫинче пӗчӗк сумма пуррисемех кредит илсе укҫа куҫарса параҫҫӗ. Ара, вӗсене: «Сирӗн ятпа такам кредит илет, ултавҫӑсен ҫулне часрах пӳлсе хумалла», — йышши шӑнкӑравсемпе аптӑратса яраҫҫӗ те...
Ҫӗмӗрле хулинче вӑтам ҫулсенчи пӗр хӗрарӑм банкоматра Мускав номерӗсем ҫине 10 пин тата 15 пин тенкӗшер куҫарнӑ. Ҫавна асӑрахакан тупӑннӑ. Хӗрарӑма асӑрхаттарасан лешӗ тарӑхсах кайнӑ. Апла пулин те тимлӗ ҫын хӗрарӑма пӑрахса утман, йӗрке хуралҫисене чӗнсе илнӗ. Лешӗсене те хӗрарӑма айван утӑмран тытса чарма ҫӑмӑл пулман. Кайран та вӑл шанмасӑртарах тӑнӑ, иккӗленнӗ. Нумай сумма куҫарса ӗлкӗреймен те, анчах «кӗмӗлӗн» пӗр пайне ултавҫӑсене куҫарса панӑ.
Чӑваш Енре ӗҫлесе пурӑнакансем уйӑхсерен вӑтамран 35 пине яхӑн тенкӗ ӗҫлесе илеҫҫӗ.
Ку цифрӑна курсан: «Ман вӑл укҫана илес тесен икӗ уйӑх тар тӑкмалла» е тата: «Ун чухлӗ укҫана икӗ уйӑхра та илейместӗп!» — тесе тарӑхакансем тупӑнасси иккӗлентермест пулин те статистикӑна хирӗҫ каяймӑпӑр. Маларах эпир асӑннӑ цифрӑна Чӑвашстат кӑҫалхи ҫу уйӑхне пӗтӗмлетнӗ хыҫҫӑн пӗлтернӗ.
Ака уйӑхӗнчипе танлаштарсан ҫу уйӑхӗнче шалу виҫи 1,4 процент ӳснӗ, унчченхи ҫулхи танлаштаруллӑ тапхӑртипе танлаштарсан тата та сумлӑрах — 9,1 процент хӑпарнӑ.
Кӑҫалхи кӑрлач-ҫу уйӑхсенче Чӑваш Ен ҫыннисем уйӑхсерен вӑтамран 33 038,8 тенкӗ ӗҫлесе илнӗ.
Шупашкарти филармоние юсама пуҫӑннӑ Питӗрти «Спецстрой» организаци республикӑн Культура, национальноҫсен ӗҫӗсен тата архив ӗҫӗн министерствипе судлашнӑ. Тавӑҫпа строительство организацийӗ республикӑн Арбитраж судне ҫитнӗ. Ҫапла тума ӑна юсав ӗҫӗшӗн укҫа тӳлесе татманни хистенӗ.
«Спецстрой» тулли мар яваплӑ обществӑпа республикӑн Культура министерстви контракта 2019 ҫулхи раштав уйӑхӗнче алӑ пуснӑ. Ӗҫ хакне 149,5 миллион тенкӗ тесе кӑтартнӑ. Организаци хӑйӗн тивӗҫне пурнӑҫланӑ, анчах саккасҫӑ ӑна тӳлесе пӗтермен-мӗн. Парӑм виҫи 6,651 миллион тенкӗ тӑрса юлнӑ.
Суд парӑма шыраса илме йышӑннӑ.
Икӗ ҫамрӑк аслашшӗн /е кукашшӗн/ банк картти ҫинчен укҫа вӑрланӑ. Сахал мар – 244 пин тенкӗ. Вӗсен тӗлӗшпе пуҫарнӑ пуҫиле ӗҫе кӗҫех Ҫӗнӗ Шупашкар хулин сучӗ пӑхса тухӗ.
Хӗрпе каччӑ 15-ре тата 16-ра. Вӗсем аслашшӗн карточкине сӑн ӳкернӗ те сарӑмпа усӑ куса счет ҫинчен тепӗр карта ҫине укҫа куҫарнӑ та куҫарнӑ. Ака уйӑхӗн 1-мӗшӗнчен тытӑнса ҫу уйӑхӗн 9-мӗшӗччен вӗсем 244 пин тенкӗ ытла йӑкӑртнӑ. Укҫана хӑйсем пӗлнӗ пек тӑкакланӑ.
Ватӑ ҫын укҫа ҫухалнине курсан полицие кайнӑ. Вӑрӑсене часах тупнӑ.
| ҪУР | 06 |
Ҫӗнӗ Шупашкар хулинчи кафесенчен пӗринчен икӗ ещӗк сӑра тата кассӑри 2 пине яхӑн тенкӗ укҫа ҫухалнӑ. Кафере ӗҫлекенсем апатлану заведенине питӗрнӗ чухне пӗрре ҫеҫ ҫавӑрса илнӗ. Ҫӑрана икӗ арҫын ҫӑмӑллӑнах уҫса кӗме пултарнӑ.
Алӑка уҫнӑ хыҫҫӑн вӗсем кафене икӗ хутчен хутласа икӗ ещӗк сӑра тата кассӑри 2 пине яхӑн тенкӗ укҫана вӑрласа кайнӑ.
Кафене вӑрӑсем кӗни пирки унта ӗҫлекенсем йӗрке хуралҫисенчен пулӑшу ыйтнӑ.
Усал ӗҫе тунӑ тесе 20-22 ҫулсенчи икӗ ҫамрӑка тытса чарнӑ. Вӗсенчен пӗрине унччен пуҫиле майпа явап тыттарнӑ иккен. Халӗ каллех суд тенкелӗ ҫине ларма тивӗ.
«Чӑваш бройлерӗ» акционерсен обществин производствӑпа технологи комплексне пӗтӗмпех сутса янӑ. Пурӗ 108 миллион та 941 пин тенкӗпе. Кун пирки Борис Литти арбитраж управляющийӗ пӗлтернӗ.
Предприятин пурлӑхне хака пӗчӗкшерӗн чакарса сутнӑ. Маларах 435,5 миллион тенкӗ ыйтнӑ. Кайран, ав, ӑна 108,9 миллион тенкӗпе сутнӑ. Пурлӑха туянаканни — Ҫӗрпӳ районӗнчи Чурачӑкри «ВДС» предприяти.
«ВДС» тулли мар яваплӑ общество «Чӑваш бройлерӗн» кредиторӗсенчен пӗри пулнӑ.
«Чӑваш бройлерӗ» кредиторсем умӗнче 207,6 миллион тенкӗ парӑма кӗрсе кайнӑ.
«Россельхозцентр» федерацин патшалӑхӑн хысна учрежденийӗн Чӑваш Енри филиалӗн пуҫлӑхӗ коррупци ҫинчен калакан саккуна пӑснӑ. Ку хыпара Чӑваш Енӗн прокуратуринче ӗнер пӗлтернӗ.
Филиал ертӳҫи хӑйӗн тӑванне (надзор органӗн вырӑсла хыпарӗнче «брат» тенӗ. Те пиччӗшӗ ӗнтӗ, те шӑллӗ — ӑна пӗлместпӗр) лешӗ пульницӑра сипленнӗ вӑхӑтра та ӗҫ укҫи тата преми тӳленӗ. Ҫапла вара саккуна пӑсса 90 пин тенкӗ ытла куҫарса панӑ.
«Россельхозцентр» учрежденийӗн филиалӗнче йӗркене пӑснине прокуратура тата Федерацин хӑрушсӑрлӑх службин республикӑри управленийӗн ӗҫченӗсем тупса палӑртнӑ.
Прокуратура директор ячӗпе асӑрхаттару хучӗ ҫырса панӑ. Филиал ертӳҫи халӗ ӗҫлемест ӗнтӗ, унпа ӗҫ килӗшӗвне енсем калаҫса татӑлнипе пӑрахӑҫланӑ. Следстви органӗсем вара пӑтӑрмах тӗлӗшӗпе тӗпчев ирттереҫҫӗ.
Хӗрарӑм таксире телефон тупнӑ та ӑна хӑйӗнпе пӗрле илсе кайнӑ. Хуҫипе ҫыхӑнсан унран 40 пин тенкӗ ыйтнӑ. Телефонӗ вара 15 пин тенкӗ тӑраканскер пулнӑ.
Арҫын таксипе кайнӑ та телефонне манса хӑварнӑ. Таксист номерне шыраса тупнӑ ҫӗре телефон урӑх ҫын аллине лекнӗ. Ку ҫапла пулса иртнӗ: 29 ҫулти хӗрарӑм такси чӗннӗ, водитель вара ӑна йытӑпа лартма килӗшмен. Ку тухса кайнӑ. Таксист ларкӑч ҫинче телефон выртнине курсан хӗрарӑма чӗннӗ. Лешӗ ним пулман пек тав тунӑ та ют ҫын телефонне илсе кайнӑ.
Телефон хуҫи 40 пин пама килӗшмесен вӑл ӑна пӗлӗшне тыттарнӑ. Полици 29 ҫулти хӗрарӑма шыраса тупнӑ тӗле телефон тата тепӗр ҫын аллине лекнӗ. Ҫапла ӑна тупайман та.
Хӗрарӑм тӑкака саплаштарма шантарнӑ, анчах сӑмахне тытайман. Ӑна суд кӗтет.
Банкоматра тепӗр ҫын хӑварнӑ укҫана кӗсьене чикнӗ икӗ арҫынна шыраҫҫӗ. Кун пирки ШӖМ пӗлтерет.
Ҫӗртме уйӑхӗн 10-мӗшӗнче Шупашкарти 9-мӗш Пилӗкҫуллӑх проспектӗнчи чарӑнура пӗр ҫын банкоматра укҫа манса хӑварнӑ. Ун хыҫҫӑн икӗ арҫын кӗнӗ. 4 пин тенке шӑпах ҫавсем илсе кайнӑ тесе шутлаҫҫӗ. Вӗсен сӑнӗсем видеокамера ҫине лекнӗ.
Ку арҫынсене палласа илтӗр пулсан ҫак номерсемпе шӑнкӑравлӑр: 89176594360, 24-09-88.
Кӑҫал та, пӗлтӗрхи пекех, РФ Президенчӗ Владимир Путин шкул ачисене 10-шар пин тенкӗ пама йышӑннӑ. Ку укҫапа ашшӗ-амӑшӗ вӗсене тумлантарӗ, шкул хатӗрӗсем илсе парӗ.
Малтан 10 пин тенке ҫурлан 15-мӗшӗнче пама тытӑнасси пирки пӗлтернӗ. Анчах Президент ку ӗҫе хӑвӑртлатма ыйтнӑ – ашшӗ-амӑшӗ кирлӗ хатӗр-хӗтӗре, тумтире хыпаланса ан туянтӑр.
Утӑ уйӑхӗн 29-мӗшӗнче Владимир Путин ӗҫлев министрӗпе Антон Котяковпа тӗл пулсан шӑпах кун пирки калаҫнӑ. Владимир Владимирович тӳлеве маларах куҫармашкӑн сӗннӗ. Министр укҫана ҫурлан 2-мӗшӗнчен куҫармашкӑн пуҫлама хатӗр пулнине пӗлтернӗ.
Сӑмах май, Чӑваш Енре ку тӳлеве 158 пин ача тивӗҫӗ.
+16.3 °C