Ҫӗнӗ Шупашкарта пӗр хӗре шыраҫҫӗ.
28 ҫулти Валентина Кузьмина килӗнчен юпа уйӑхӗн 1-мӗшӗнче тухса кайнӑ та килне халӗ те таврӑнман.
Ҫывӑх ҫыннисем уншӑн пӑшӑрханаҫҫӗ, ӑна шырама тытӑннӑ. Ку ӗҫе «Лиза Алерт» шырав отрячӗн хастарӗсене явӑҫтарнӑ.
Хӗр 165 сантиметр ҫӳллӗш, вӑтам пӳ-силлӗ, ҫӳҫӗ хура, куҫӗ симӗҫ.
Хӗр ҫутӑ хӑмӑр сумкӑпа пулнӑ.
Ҫухалнӑ хӗр ӑҫтине пӗлекенсене (800) 700-54-52 е 112 номерпа шӑнкӑравласа пӗтерме ыйтаҫҫӗ.
Паян Шупашкарта кӑнтӑр-хӗвеланӑҫ районӗнче тӗтӗм мӑкӑрланма пуҫланӑ. Ӑна ҫынсем кӑнтӑрла иртни 3 сехет ҫурӑра асӑрханӑ.
Унта Ҫӗнтерӳ лапамӗнчи 3-мӗш ҫуртра вырнаҫнӑ 7-мӗш шкул ҫуннӑ-мӗн. Кун пирки «Про Город» хаҫата халӑх корреспонденчӗ пӗлтернӗ. Чӳречинчен ҫӑра тӗтӗм тухнӑ.
Сӑмах май, шкул ҫуркуннеренпе хупӑ, унта юсав ӗҫӗсем тӑваҫҫӗ.
Пушарнӑйсем вырӑна ҫийӗнчех ҫитнӗ. Хальлӗхе пушар пирки урӑх нимӗн те пӗлтермен.
Кӳкеҫре хуҫасӑр йытӑсене вӑхӑтлӑх тытмалли пункт пур. Тӗнче тетелӗнчи халӑх ушкӑнӗсенчен пӗринчи «Кугеси | Общественный совет» (чӑв. Кӳкеҫ | Общество канашӗ) пабликра ҫырнӑ тӑрӑх, унтан чирлӗ йытӑсене урама кӑларса яраҫҫӗ имӗш. Кун пирки йытӑсене хӗрхенекен нимеҫӗсем систернӗ-мӗн.
Вӗсем каланӑ тӑрӑх, йытӑсене вакцинациленӗ тата стерилизациленӗ хыҫҫӑн хӑшӗсен ҫурӑмӗ ҫинче юхан-суран пулса каять, ҫавна пӑхмасӑрах чӗрчунсене ирӗке кӑларса яраҫҫӗ.
Вырӑнти хастарсем асӑннӑ пунктра пулнӑ, яваплисемпе калаҫнӑ. Вӗсем лару-тӑрӑва тишкерме шантарнӑ.
Канаш районӗнче пурӑнакан ҫамрӑк арҫын савнин упӑшкине вӗлернӗ.
РФ Следстви комитечӗн Чӑваш Енри управленийӗнче пӗлтернӗ тӑрӑх, Аксарин ялӗнче пурӑнакан 23 ҫулти ҫамрӑка РФ Пуҫиле кодексӗн 111-мӗш статйин 4-мӗш пайӗпе килӗшӳллӗн явап тыттарнӑ.
2021 ҫулхи раштавӑн 21-мӗшӗнче ӳсӗрскер хӑйӗнпе арлӑ ҫыхӑнура пурӑннӑ хӗрарӑм патне пырса кӗнӗ. Анчах савнин килӗнче упӑшки пулнӑ. Кӗвӗҫнипе ҫамрӑк арҫын арҫынпа хирӗҫме тытӑнса кайнӑ. Ӑна вӑл пуҫӗнчен чышкӑпа 13 хутран кая мар ҫапнӑ. Суранланнӑ арҫын кӑштахран пульницӑра вилсе кайнӑ.
Ҫынна вӗлернӗ арҫынна суд 8 ҫул та 30 кунлӑха ҫирӗп режимлӑ колоние ӑсатма йышӑннӑ.
Республикӑн тӗп хулинче пурӑнакан пӗр хӗрача шкула ҫӳреме пӑрахнӑ.
Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн специалисчӗсем ҫемьере темиҫе хутчен те пулнӑ. Хӗр шутне кӗнӗ ачапа темиҫе хутчен те калаҫнӑ, ашшӗпе те сӑмахланӑ, анчах усси пулман.
Комплекслӑ центрӑн специалисчӗсем пӗлтернӗ тӑрӑх, ҫемьере хальхинче «Полици тата ачасем» акци ирттернӗ май кайнӑ. Йышра ҫул ҫитменнисемпе тата ашшӗ-амӑшӗпе ӗҫлекен тӗрлӗ специалист пулнӑ.
Маларах асӑннӑ ача пӗчӗк чухнех амӑшӗсӗр тӑрса юлнӑ, вӑл ашшӗпе пурӑннӑ. Анчах юлашки ҫулсенче арҫын воспитани енӗпе ҫителӗксӗр вӑй хунӑ – пике уроксене сиктерме пуҫланӑ. Нумаях пулмасть ӑна хулари Социаллӑ реабилтаци центрне вырнаҫтарнӑ.
Паян Ҫӗнӗ Шупашкарта Промышленноҫ урамӗнче вырнаҫнӑ склад ҫуннӑ. Унта сӑрӑсем туса кӑлараҫҫӗ.
Ҫулӑм 100 тӑваткал метр лаптӑк ҫинче алхаснӑ. Тӳпенелле хӑпаракан ҫӑра хура тӗтӗм таҫтанах, Шупашкартан та, курӑннӑ. Ҫулӑма пушарнӑйсем хӑвӑрт сӳнтерме пултарнӑ.
Пушар склад ҫуртне сиенлетнӗ. Сӑрӑсем те ҫуннӑ.
Юпа уйӑхӗн 16-мӗшӗнче 17 сехет те 10 минутра Муркаш районӗнчи Иштерек ялӗнче трактор ҫунма пуҫланӑ. Унта МТЗ-80 трактора ҫулӑм ярса илнӗ.
Транспорт кабинин шалти отделки сиенленнӗ. Халӗ пушар мӗн чухлӗ тӑкак кӳнине шутлаҫҫӗ, ҫулӑм мӗнрен тухнине тишкереҫҫӗ.
Шупашкарти таксист пӗр кунхине ултавҫӑ капкӑнне ҫакланнӑ.
Юпа уйӑхӗн 13-мӗшӗнче вӑл палламан икӗ ҫамрӑка хула тӑрӑх турттарса ҫӳренӗ. Вӗсем малтан пӗр ҫӗре, унтан тепӗр ҫӗре кӗрсе тухма ыйтнӑ. Ҫамрӑксенчен пӗри ҫула май тенӗ пек хӑйӗн чуна ыраттаракан историне каласа кӑтартма тытӑннӑ: унӑн ачи чирлӗ имӗш, ӑна васкавлӑн сиплеме эмел туянас тесе укҫа пухать.
Таксист ҫамрӑк ашшӗне хӗрхеннипе ҫав ҫыннӑн банк картти ҫине 5 пин укҫа куҫарса панӑ. Тата тепӗр ҫӗре ҫитсен ҫамрӑксем таксиста ҫул укҫи тӳлеме тата кивҫен илнӗ укҫана тавӑрса пама шантарса машинӑран тухнӑ. Анчах водитель вӗсене кӗтсе илеймен. Унтан вӑл йӗрке хуралҫисенчен пулӑшу ыйтнӑ.
Улталаканни судпа унччен темиҫе хутчен те айӑпланнӑ (наркотикпа ҫыхӑннӑ пӑтӑрмахшӑн, вӑрланӑшӑн тата улталанӑшӑн) 20 ҫулти каччӑ пулнӑ. Унӑн ача-пӑча тавраш пулман. Пакунлисем ҫав каччӑ ҫавӑн пек мелпе тата ытти ҫынна та улталаман-ши тесе шанмаҫҫӗ.
Юпа уйӑхӗн 14-мӗшӗнче Хӗрлӗ Чутай районӗнчи Йӳҫпан ялӗнче ирхине грузовик каялла чакнӑ чухне 65 ҫулти хӗрарӑм ҫине пырса кӗнӗ. Аманнӑскере пульницӑна илсе кайнӑ. Анчах, шел те, вӑл реанимацире вилнӗ.
Машина ГАЗ-53 пулнӑ. Халӗ ҪҪХПИ инспекторӗсем ӗҫ-пуҫа уҫӑмлатаҫҫӗ.
Канаш районӗнче пӗр ҫамрӑк ҫулпа пынӑ чухне машина айне пулнӑ.
Инкек юпа уйӑхӗн 13-мӗшӗнче ҫурҫӗр иртсен Карӑклӑ ялӗ тӗленче пулса иртнӗ. Шупашкар хулинче пурӑнакан каччӑ (вӑл тӑрӑха ҫамрӑк хӑнана кайнӑ курӑнать) ҫулпа утса пынӑ. Ун ҫине «Лада Гранта» машина пырса кӗнӗ.
Суранланнӑ каччӑна больницӑна ӑсатнӑ.
+2.3 °C