Шупашкар хули «Волжский вояж» (чӑв. Атӑл вояжӗ) чукун ҫул туризм маршрутне лекнӗ. Ӑна «Раҫҫейӗн чукун ҫулӗсем» акционерсен обществи йӗркеленӗ.
Туристсем валли хатӗрленӗ ҫӗнӗ маршрут ҫапларах: «Мускав — Шупашкар — Йошкар-Ола —Чулхула».
«Атӑл вояжӗ»
круиз поезӗ ҫула ҫитес ҫулхи ака, ҫурла тата юпа уйӑхӗсенче тухӗ.
Билета Раҫҫейӗн чукун ҫулӗсен официаллӑ сайтӗнче ҫитес вӑхӑтра сутма тытӑнӗҫ.
«Раҫҫейӗн чукун ҫулӗсем» организаци ҫул укҫине хаклатассине пӗлтернӗ.
Билет хакӗ раштав уйӑхӗн 1-мӗшӗнчен ӳсӗ.
Плацкарт пуйӑспа тата пӗтӗмӗшле вакунпа инҫе ҫула тухакансен хальхинчен 11,6 процент ытларах тӑкакланма тивӗ.
Чукун ҫулпа груз турттаракансен те ытларах тӳлеме лекӗ. Пурӗ 13,8 процент.
Авӑн уйӑхӗн 16-мӗшӗнче Ҫӗмӗрлери чукун ҫул ҫинче 1997 ҫулта ҫуралнӑ хӗрарӑма тиев турттаракан пуйӑс ҫапса кайнӑ. Вӑл ӳсӗр пулни паллӑ.
Машинист ӑна таптаса каяс мар тесе пуйӑса чарма хӑтланнӑ. Анчах ӗлкӗреймен. Юрать-ха, хӗрарӑм чӗрех юлнӑ. Ӑна пульницӑна илсе ҫитернӗ.
Ку тӗслӗх тӗлӗшпе халӗ следстви умӗнхи тӗрӗслев ирттереҫҫӗ.
Паян ирхи 6 сехет те 56 минутра Шупашкарта Ишлей ҫулӗ ҫинче машина тавар пуйӑсӗпе ҫапӑннӑ. Водитель светофор хӗрлӗ ҫутнӑ вӑхӑтра каҫса кайма ӗлкӗрессе шаннӑ-тӑр - анчах пуйӑс ытла та ҫывӑхра пулнӑ.
Руль умӗнче 69 ҫулти арҫын ларнӑ. Тӗлӗнмелле майпа вӑл чӗрӗ юлнӑ. Ӑна пульницӑна илсе кайнӑ. Вӑл аяк пӗрчине хуҫма пултарнӑ.
Кӑҫалхи ака уйӑхӗнче «Хусан — Канаш» пуйӑсра Тутарстанри пӗр хӗрарӑм пуҫтахланма тапранса кайнӑ.
Вӑл эрех ӗҫсе ӳсӗрӗлнӗ те пассажирсем ҫумне ҫулӑхнӑ. Билет кассирӗ ӑна лӑплантарма тӑрӑшнӑ, анчах май килмен. Унран та ытларах: ӳсӗр хӗрарӑм кассир ҫине алӑ ҫӗкленӗ.
Кибеч станцийӗнче хӗрарӑм стоп-крана туртса антарнӑ.
Чӑркӑш хӗрарӑма транспорт полицейскийӗсем тытса чарнӑ. 47 ҫулти хӗрарӑма ҫывӑх вӑхӑтра суд тӑвӗҫ.
Ака уйӑхӗн 13-мӗшӗнченпе Канашпа Шупашкар хушшинче икӗ пуйӑс ҫӳреме тытӑнӗ. Хальхи вӑхӑтра унта пӗр маршрут кӑна. Вӑл Канашран 14 сехет те 42 минутра тапранса Шупашкара 17 сехет те 4 минутра ҫитет.
Акан 13-мӗшӗнченпе пуйӑс ирхи 3 сехет те 54 минутра та пулӗ. Вӑл Шупашкара 6 сехет те 15 минутра ҫитӗ.
Шупашкартан Канаша пуйӑс 7:10 сехетре каять. Кӗҫех 18:45 сехетре тапранса каяканни те пулӗ. Ҫул ҫинче 2,5 сехет иртет. Билет 402 тенкӗ тӑрать.
Пуш уйӑхӗн 18-мӗшӗнченпе «Улатӑр - Канаш» маршрутпа ҫӳрекен пуйӑс Йӗпреҫре чарӑнма пуҫлӗ. Ҫакна пассажирсене меллӗ пултӑр тесе тунӑ.
Йӗпреҫре мӗн чухлӗ тӑрасси пуйӑсран килет. 6390-мӗш тата 6393-мӗш номерли 3 минут тӑрать, 6392-мӗш номерли вара - 1 минут.
Палӑртмалла: унччен Йӗпреҫре пуйӑссем чарӑннӑ-ха, анчах поселокран 5-6 ҫухрӑмра.
Раҫҫейре плацкарт вакунсене сарлакарах туса кӑларма тытӑнасшӑн. Ҫӗнӗ состав 2024 ҫул вӗҫӗнче ҫула тухӗ.
Плацкарт вакунсене анлӑлатсан пассажирсене ҫул ҫӳреме тата меллӗрех пулӗ. Кун пирки «ТМХ Пассажирский транспорт» компанин гендиректорӗн ҫумӗ Валерия Шарафутдинова пӗлтернӗ.
«Вакунти ҫывӑрмалли вырӑн 28 сантиметр сарлакарах пулӗ. Инҫе ҫула тухакансемшӗн ҫывӑрмалли вырӑн питӗ пӗлтерӗшлӗ», — тенӗ Шарафутдинова.
Вакуна кӗмелли алӑк 5 сантиметр сарлакарах пулӗ. Вӑл пысӑк чӑматанлисемшӗн меллӗ пулӗ.
Виҫӗ уйӑхра Чӑваш Енри тата Мари Элти пуйӑссемпе самолётсем ҫинчен ӳсӗр 100 ытла ҫынна антарса хӑварнӑ. Транспортра эрех ӗҫме тата ӳсӗр пуҫа ларма юрамасть. Ун пеккисене административлӑ майпа явап тыттараҫҫӗ.
Транспорт полицейскийӗсем пӗлтӗрхи юпа-раштав уйӑхӗсенче 118 ҫынна явап тыттарнӑ — 500 тенкӗрен пуҫласа 1500 тенкӗ таран штраф хурса панӑ. Унсӑр пуҫне ӳсӗрсене 1 талӑкран пуҫласа 15 талӑк таран хупса хума та пултараҫҫӗ.
Авӑн уйӑхӗн 5-мӗшӗнче 19 сехетре Канашра хоппер йышши тӑхӑр вакун рельсран тухса кайнӑ. Ку, ахӑртнех, тиев ӗҫӗсене тӗрӗс мар йӗркеленипе пулса тухнӑ.
Станци ертӳлӗхӗ вакунсем рельсран тухса кайнине вӑрттӑнлӑхра хӑварма шутланӑ. Анчах тепӗр ирхине вырӑна вакунсене тӑратма пулӑшакан пуйӑс чӗнсе илнӗ. Ҫавна май ку пулӑм пирки ыттисем те пӗлнӗ.
Вырӑна транспорт прокурорӗн пулӑшуҫи ҫитнӗ. Ведомство ӗҫ-пуҫа тишкерӗ.
+1.3 °C