Патӑрьелте ҫӗнӗ морг тӑвасшӑн. Ҫавна май аукцион ирттереҫҫӗ. Морг тумашкӑн 41 миллион та 517,5 пин тенкӗ кӑларса хума хатӗр.
Аукцион ҫу уйӑхӗн 17-мӗшӗнче иртӗ. Унта ҫӗнтернӗ подрядчикӑн ӗҫсене кӑҫалхи раштав уйӑхӗн 3-мӗшӗччен туса пӗтермелле.
Морг пӗр хутлӑ пулӗ, ӑна кирпӗчрен тумалла. Вӑл Патӑрьел районӗн тӗп пульницин территоринче 1980 ҫулта туса лартнӑ ҫурт ҫумӗнче пулӗ. Палартмалла: районсен хушшинчи паталогоанатоми уйрӑмӗ Шӑмӑршӑ, Елчӗк, Патӑрьел округӗсене йышӑнать.
Шупашкарта Правительство ҫурчӗ умӗнчи лапама тата хӑтлӑлатасшӑн. Ҫавна май аукцион ирттереҫҫӗ.
Кун валли республика Правительстви 7 миллион та 347 пин тенкӗ уйӑрма хатӗр. Аукцион ҫӗнтерӳҫин килӗшӳ алӑ пуснӑ хыҫҫӑн ҫав территорие 30 кунра хӑтлӑлатмалла. Подрядчикӑн асфальт сармалла, борт чулӗсене улӑштармалла, брусчаткӑсене ҫӗнетмелле, газон курӑкне йӗркене кӗртмелле.
Муркаш мниципаллӑ округӗнчи Ҫатракасси ялӗнче 1,5 ҫухрӑм ҫул тума аукцион ирттереҫҫӗ. Ку тӗллевпе регионти хыснаран 109,66 миллион тенкӗ уйӑрма хатӗр.
Ҫатракассинче Привольнӑй тата Шкулҫум урамӗсенче асфальт ҫул сарасшӑн. Ӗҫе виҫӗ тапхӑрпа пурнӑҫлӗҫ: кӑҫал ҫӗртме уйӑхӗнче, 2025 ҫулхи ҫӗртме-утӑ уйӑхӗсенче тата 2026 ҫулхи ҫурла уйӑхӗсенче.
Халӗ ЧР Транспорт министерствин «Чӑвашупрдор» учреждени ҫул тумашкӑн подрядчик шырать.
Патӑрьел муниципаллӑ оркугӗнчи Ишлӗ ялӗнче ача пахчинчен пуҫламӑш шкул туса хурасшӑн. Ҫавна май аукцион ирттернӗ.
Документацире палӑртнӑ тӑрӑх, ача пахчинчен тунӑ пуҫламӑш шкулта шкул умӗнхи ушкӑн тата спортзал пулмалла. Контракт – 118,3 миллион тенкӗлӗх. Аукционра Патӑрьел тӑрӑхӗнчи «Булат» фирма ҫӗнтернӗ.
Подрядчикӑн пуҫламӑш шкула кӑҫалхи ҫурла уйӑхӗн 31-мӗшӗччен туса пӗтермелле.
Пермьри «Сатурн-Р-Авто» республикӑри тӳре-шарана 12 «Москвич 6» машинӑпа тивӗҫтерӗ. Фирма виҫӗ аукциона пӗччен кӑна хутшӑннӑ.
Кашни автомобиль 2,9 миллион тенке ларнӑ. 12 машинӑшӑн 34 миллион та 876 пин тенкӗ тӳленӗ.
Палӑртмалла: «Москвич 6» машинӑна 2023 ҫулхи авӑн уйӑхӗнченпе «Москвич» савутра кӑлараҫҫӗ. Сутлӑхра - 2023 ҫулхи юпа уйӑхӗн 12-мӗшӗнченпе.
Кӑҫал пуш уйӑхӗн 30-мӗшӗнче Муркаш муниципаллӑ округӗнчи Кашмаш шкулӗн территоринче ҫӗр ишӗлсе аннӑ. Ӑна халӗ те юсаман-ха. Ун чухне асфальт тата тимӗр карта сиенленнӗ.
Шкул территорине йӗркене кӗртекен подрядчике тупас тӗллевпе аукцион ирттерессине икӗ хутчен пӗлтернӗ. Пӗрремӗшне юпа уйӑхӗнче тин ирттерме палӑртнӑ. Анчах иккӗшне те никам та хутшӑнман. Малтанхи хак 9,8 млн тенкӗ пулнӑ.
Халӗ каллех аукцион ирттереҫҫӗ. Хакӗ унчченхи пекех.
Улатӑрта ача пахчи пулнӑ ҫурта каллех сутма лартнӑ. Кунта сӑмах – «Хӗвел» ятли пирки.
Ача пахчин территорине те пӗрлех сутаҫҫӗ. Малтанхи хака палӑртнӑ: 19 миллион та 785 пин тенкӗ. Чи пӗчӗк хак – 9 миллион та 892 пин те 500 тенкӗ. Ӑна аукционра чӳк уйӑхӗн 13-мӗшӗнче сутӗҫ.
Палӑртмалла: ача пахчине 2020 ҫулта авариллӗ лару-тӑрура тесе хупнӑ. Ӑна пӗлтӗр сутма хӑтланнӑ. Анчах туянакан пулманран аукцион иртмен.
Айӑплава пурнӑҫлакан федераци службин Чӑваш Енри управленийӗ 24 тонна маринадланӑ хӑяр туяннӑ. Ҫавна май ятарласа аукцион иртнӗ.
Чи малтанах ведомство 1 млн та 528 пин те 80 тенкӗ сӗннӗ. Мускаври «Платон» организаци 24 тонна хӑяра 1 млн та 107 пин те 438,4 тенкӗпе кӳрсе пама килӗшнӗ.
Хӑяр - 3 литрлӑ банкӑсенче, вӗсене тимӗр виткӗчпе питӗрнӗ, упрамалли срокӗ 15 уйӑхран кая мар. Организацин тавара Шупашкарти Лапсар тӑкӑрлӑкӗнчи 17-мӗш ҫурта илсе килмелле.
Патӑрьел районӗн тӗп пульницин инфекци уйрӑмне юсаса ҫӗнетӗҫ. Ҫавна май аукцион ирттереҫҫӗ.
Юсав ӗҫӗсене ирттерме 17,2 млн тенкӗ уйӑрма хатӗр. Подрядчике ҫурла уйӑхӗн 7-мӗшӗнче палӑртӗҫ. Чӳк уйӑхӗн 30-мӗшӗччен уйрӑма юсаса пӗтермелле: фасадне, шалтине ҫӗнетӗҫ, унитазсемпе умывальниксене, душ кабинисене улӑштарӗҫ, инженери сечӗсене юсӗҫ.
Палӑртмалла: пандеми вӑхӑтӗнче унта 20 койкаллӑ ковид-госпиталь пулнӑ.
Шупашкарти Хӗрлӗ тӳремре Раҫҫейӗн тӗрленӗ карттин музейӗ пуласси пирки сайтра хыпарланӑччӗ. ЧР Элтеперӗ Олег Николаев кун валли 80 млн тенкӗ кирлӗ пулассине пӗлтернӗччӗ. Проекчӗ кӑна 3 млн тенкӗ ытларах кайса ларӗ.
Ҫак кунсенче музей проектне хатӗрлемешкӗн аукцион ирттересси пирки пӗлтернӗ. Малтанхи хак - 3 млн та 179 пин те 449 тенкӗ. Аукцион ҫӗнтерӳҫин проекта 2023 ҫулхи авӑн уйӑхӗн 30-мӗшӗччен хатӗрлемелле.
Музей 250 тӑваткал метр пулӗ. Ҫывӑхра машинӑсем валли парковка та тӑвӗҫ.
-0.7 °C