Чӑваш Республикин Вӗренӳ институчӗ чӑваш чӗлхипе, литературипе тата культурипе интернет олимпиада ирттернӗ.
Олимпиадӑна 5-11 классенче вӗренекен 679 ача хутшӑннӑ. «Пӗтӗмӗшле илсен, интернет-олимпиадӑна ҫулсерен Шупашкар, Ҫӗнӗ Шупашкар хулисенчи, Патӑрьел, Ҫӗрпӳ, Елчӗк, Муркаш, Комсомольски, Хӗрлӗ Чутай, Тӑвай, Сӗнтӗрвӑрри районӗсен шкул ачисем хастар хутшӑнаҫҫӗ», — хыпарланӑ институтра.
Интернет-олимпиадӑн тӗллевӗ — ачасене халӑх культурипе, ӑс-хакӑлпа шухӑш-кӑмӑл пуянлӑхӗпе паллаштарасси, шкул ачисене чӑваш чӗлхипе, литературипе тата культурипе тӗпчев ӗҫне явӑҫтарасси.
Шупашкарта ҫынсем газпа наркӑмӑшланнӑ тӗслӗх нумайланнӑ. Ав раштав уйӑхӗн 12-мӗшӗнче тепӗр тӗслӗх пулнӑ.
Хальхинче – Карл Маркс урамӗнчи 46-мӗш ҫуртра. 41 ҫулти хӗрарӑм, унӑн 12-ри ачи газ сӗрӗмӗпе наркӑмӑшланнӑ. Вӗсене Васкавлӑ медпулӑшу пульницине илсе ҫитернӗ. Пациентсен сывлӑхӗ йывӑр.
Аса илтерер: нумаях пулмасть Кривов урамӗнчи 9-мӗш ҫуртра тата Энтузиастсен урамӗнчи 7-мӗш ҫуртӑн 1-мӗш корпусӗнче ҫынсем газпа наркӑмӑшланнӑ. Кривов урамӗнче пурӑнакан ҫемьере 8 ҫулти арҫын ача вилнӗ.
Чӑваш Енри педагогсем Раҫҫейре иртекен тӑван чӗлхе учителӗсен ҫӗршыври съездне хутшӑнаҫҫӗ.
Съезда Шупашкарти 40-мӗш вӑтам шкулта ӗҫлекен Александр Степанов, Ҫӗнӗ Шупашкарти 2-мш вӑтам шкулти Оксана Ильина, Шупашкарти сывлӑх енчен хавшак ачасене вӗрентекен 2-мӗш шкулти Ираида Матьянова тата Йӗпреҫри 2-мӗш вӑтам шкулти Алёна Ядрицова тухса кайнӑ.
Мероприятире педагогсем «Тӑван чӗлхе тата тӑван литература», «Тӑван чӗлхе тата тӑван чӗлхепе литература вулавӗ» предметсене вӗрентессине, ҫак ӗҫ пахалӑхне ӳстерессине сӳтсе явӗҫ.
Паян Шупашкарта громкоговорительпе калакан автобус иртсе ҫӳренине асӑрхаман-и? Нумайӑшӗ илтнӗ пулӗ.
ҪҪХПИ ку эрнере хӑйне евӗр акци ирттерет. Шупашкарта 15-17 сехетсенче ятарлӑ автобус ҫӳрӗ. Унта вырнаҫтарнӑ аппаратурӑпа аудиоролик ярӗҫ. Вӑл - ҫуран ҫӳрекенсен хӑрушсӑрлӑхӗ пирки.
Ҫавӑн пекех автобусри инспекторсем ҫуран ҫӳрекенсене хытӑ илтӗнекен ҫыхӑнупа ҫул-йӗр правилисене пӑсни пирки асӑрхаттарӗҫ.
Чӑваш Енри энергосбыт компанийӗ Арбитраж судне тавӑҫ тӑратнӑ. Вӑл Шупашкарти троллейбус управленийӗнчен 14 миллион та 768 пин те 612 тенкӗ шыраса илесшӗн. Ку – вӗсен парӑмӗ.
Суд тавӑҫа йышӑннӑ. Малтанхи суд ларӑвне кӑрлачӑн 12-мӗшӗнче ирттерме палӑртнӑ.
Палартмалла: энергосбыт компанийӗ кӑҫал авӑн уйӑхӗнче те троллейбус управленийӗнчен 13 миллион тенкӗ шыраса илме тавӑҫ тӑратнӑ. Ун чухне Арбитраж сучӗ йышӑнӑва ун майлӑ тунӑ, парӑма татмалла тесе йышӑннӑ.
Юр нумай ҫунипе, пӑрлӑ ҫумӑра пула пуйӑссем те вӑхӑтра ҫӳреймеҫҫӗ. Чукун ҫул тытӑмӗнче те электричество пӗтнӗ.
"Шупашкар" чукун ҫул вокзалӗ пӗлтернӗ тӑрӑх, пуйӑссем 5 сехет те 10 минут кая юлса ҫитӗҫ. Ӗнер тата паян "Арзамас - Канаш" чукун ҫулӗ ҫинче пассажирсене илсе ҫӳрекен темиҫе пуйӑс тытӑнса тӑрать. "Мускав - Хусан" тата "Мускав - Шупашкар" пуйӑссене 3 сехет ытла тытса тӑнӑ. Унсӑр пуҫне тепӗр 7 пуйӑс 2-7 сехет кая юлса пынӑ.
Ҫак эрнере Шупашкарти 4-мӗш лицей умӗнче пӗр арҫын ача ҫумне ҫулӑхнине эпир пӗлтернӗччӗ-ха. Ӗнер РФ Следстви комитечӗн Чӑваш Енри управленийӗнче пӗлтернӗ тӑрӑх, халӗ ҫав арҫынна тытса чарнӑ. Вӑл 36 ҫулта, Шупашкартан. Управлени сайтӗнче унтан ытла нимӗн те пӗлтермен.
«Ҫыхӑнура» форумра вара Шупашкарӑн кӑнтӑр-хӗвеланӑҫ районӗнче пӗр арҫын хӗрарӑмсем ҫумне унччен те ҫулӑхнине, вӗсене хӗненине пӗлтернӗ. Арҫын амӑшӗпе пурӑнать, ӑна амӑшӗ хӳтӗлет тесе хыпарланӑ. Арҫын пирки йӗрке хуралҫисене пӗлтернин усси пулман имӗш.
Ӗнер, раштав уйӑхӗн 9-мӗшӗнче, Шупашкарта паллӑ мар пӗр арҫын хӗрача ҫумне ҫулӑхнӑ.
«Ҫыхӑнура» форумра пӗлтернӗ тӑрӑх, пӑтӑрмах хулари 4-мӗш лицей умӗнче (вӑл хулан кӑнтӑр-хӗвеланӑҫ районӗнче вырнаҫнӑ) пулса иртнӗ.
Видео тӑрӑх хакласан, ирхи 8 сехет те 18 минут тӗлӗнче вӗренӳ учрежденийӗн Чернышевский урамӗнчи 1-мӗш корпусӗ патӗнче пӗр хӗрача хыҫҫӑн хура тӗслӗ, шурӑ йӗрлӗ куртка тӑхӑннӑ арҫын утса пырать. Хӗрача шкула кӗрсе каяс умӗн вӑл ӑна айккинелле илсе каять. Унтан вӑл ӑна ыталама хӑтланать, аллине хӗрачан куртки ӑшне чиксе ярать. Кайран вӑл ҫаврӑнса утать, васкамасӑр шкул картишӗнчен тухса каять.
Шупашкар хулинче пурӑнакан 63 ҫулти хӗрарӑм ют ҫӗршывра пурӑнакан «савнине» 5 миллион ытла тенкӗ куҫарса панӑ.
Ҫулланнӑ хӗрарӑм арҫынпа тӗнче тетелӗнче паллашнӑ. Пӗр-пӗрин патне ҫыру хыҫҫӑн ҫыру ӑсатнӑ. Хайхи этем хӑйӗн пирки Канадӑран, халӗ Йемен хулинче службӑра тӑратӑп тесе каланӑ. Арҫын авланас кӑмӑллине (хӗрарӑм ҫемье ҫавӑрма ӗмӗтленнине сиснӗ пуль ҫав ӗнтӗ) пӗлтернӗ.
Арҫын ӗнентернӗ тӑрӑх, хӗрарӑмпа ҫывӑхрах паллашма тата ҫемье ҫавӑрма Раҫҫее килме ӗмӗтленет. Анчах ҫул укҫине тата ытти тӑкака саплаштарма хӗрарӑмран ыйтнӑ вӑл. Вӑхӑтлӑха. Кайран йӑлтах саплаштарма шантарнӑ.
Ултавҫа хӗрарӑм 5 миллион та 200 пин тенкӗ куҫарса панӑ. Вӑл укҫана хӗрарӑм хӑйӗн ҫуртне сутса ярсан пухнӑ иккен.
Шупашкарта Хӗл мучи пек ҫӳрекен таксист пур. Унӑн машининче юрӑ-кӗвӗ янӑрать, ӑна гирляндӑпа илемлетнӗ. Кун пирки «Про Город» хаҫата хыпарлать.
Хӑйне евӗр такси нумаях пулмасть ҫӳреме тытӑннӑ. Хитре машина ҫынсене питӗ илӗртет. Водитель «Ренона» ҫутӑ кӗввипе илемлетнӗ.
Ку кӑна мар-ха, Хӗл мучи таксист хӑйӗн пассажирӗсене пылак ҫимӗҫпе хӑналать.
-8.7 °C