Шупашкарти пӗр шкул юсав ӗҫӗсене пула авӑн уйӑхӗн 1-мӗшӗ тӗлне уҫӑлайман. Вӑл - 4-мӗш лицей.
Унта юсав ӗҫӗсем ҫулла пуҫланнӑ. Вӑхӑт иртнӗҫемӗн пӗлӳ ҫуртӗнче хушма ӗҫсем тупӑннӑ. Ҫавна май вӑл Пӗлӳ кунӗнче ачасене йышӑнайман.
Ҫакна кура авӑн уйӑхӗн 1-мӗшӗнчен 331-мӗш маршрута кӗске ҫулпа ҫӳреттерме пуҫлӗҫ. Кӑна ачасем 12-мӗш шкула ӗлкӗрччӗр тесе тӑваҫҫӗ.
Паян Шупашкарти хӑш-пӗр шкулта, аслӑ шкулта, техникум-колледжра савӑнӑҫлӑ линейка вӑхӑтӗнче эвакуаци пулнӑ. Йӑлтах – мина хунӑ тесе килнӗ анонимлӑ хыпара пула.
Тӗслӗхрен, Лебедев урамӗнчи 59-мӗш шкулта вӗренекенсем тата педагогсем чечек ҫыххисене йӑтса картиш тулашӗнче тӑнӑ.
«На связи» форумра комментари ҫыракансем пӗлтернӗ тӑрӑх, 39-мӗш шкулта, И.Н.Ульянов ячӗллӗ Чӑваш патшалӑх университечӗн тӗп корпусӗнче эвакуаци пулнӑ.
Ҫулла вӗҫленсе пырать. Шыва кӗрекенсем вара халӗ те пур. Ара, ҫанталӑк шӑрӑх тӑрать.
Паян каҫхи 7 сехет тӗлӗнче Шупашкарта Атӑл хӗрринче ҫын виллине асӑрханӑ. «Про Город» хаҫата халӑх корреспонденчӗ пӗлтернӗ тӑрӑх, ӑна шывран илсе тухнӑ. Ку Афанасьев пляжӗнче пулнӑ. Малтанлӑха палӑртнӑ тӑрӑх, арҫын путса вилнӗ.
Следстви комитечӗн Чӑваш Енри следстви органӗсем кун тӗлӗшпе тӗрӗслев ирттереҫҫӗ.
Шупашкарта кӑларакан трактор ҫинчен Индире те пӗлеҫҫӗ. Телесюжета асӑннӑ ҫӗршыври телеканалсенчен пӗри кӑтартнӑ. Унта, эпир ӑнланнӑ тӑрӑх, Шупашкарти вӑй агрегачӗсен заводӗнче кӑларакан «Силант» электротрактор ҫинчен сӑмах пырать. Ун ҫинчен эпир те каласа кӑтартнӑччӗ.
Аса илтерер: ҫӗнӗ машина дизельпе ӗҫлекен машинӑсенчен нимӗнпе те уйрӑлса тӑмасть. Телесюжетра уҫӑмлатнӑ тӑрӑх, трактор аккумуляторӗ 8 сехет ӗҫлет, унтан ӑна 6 сехетлӗхе зарядкӑна лартмалла.
Шупашкарта пурӑнакан хӗрарӑм ултавҫа 600 пин тенкӗ куҫарса панӑ. Ҫитменнине, ҫав палламан ҫын унран кулмаллипех кулнӑ.
Хӗрарӑм патне «банк ӗҫченӗ» шӑнкӑравланӑ. Ӑна ӗненсе вӑл 600 пин тенкӗ куҫарса панӑ. Ултавҫӑ тӗлне лекнине ӑнлансан хӗрарӑм полицие кайнӑ. Темиҫе кунран ҫав ултавҫӑ ун патне каллех ҫырса янӑ. «Сире укҫа мӗн тума кирлӗ?» тесе ҫырнӑ вӑл. Палламан ҫын куҫарса панӑ нухрат Раҫҫейре йӗркелеме юраман организацисене тытса тӑмашкӑн каяссине пӗлтернӗ.
Иртсе кайнӑ канмалли кунсенче пирӗн республикӑра икӗ ҫын путса вилнӗ. Кун пирки Чӑваш Енӗн Инкеклӗ ӗҫсен министерствин пресс-службинче пӗлтернӗ.
Авӑн уйӑхӗн 27-28-мӗшӗнче 18 ҫулти каччӑ Афанасьев пляжӗнче хӑйӗн тусӗпе каннӑ. Вӑл шыва кӗрсе кайнӑ та ҫухалнӑ. Ҫыран хӗрринче унӑн япалисем тӑрса юлнӑ. Тепӗр кунне водолазсем каччӑн виллине шырама тытӑннӑ, анчах тупайман.
Ҫурла уйӑхӗн 29-мӗшӗнче Куславкка районӗнчи Елчӗк ялӗнче ҫӑлавҫӑсем 2008 ҫулта ҫуралнӑ ача виллине Енӗш юханшывӗнче туртса кӑларнӑ. Сӑмах май каласан, Атӑлта арҫын виллине тупнӑ. Пӑхсан, арҫын 45 ҫулсенче...
Шупашкарта чикансем ушкӑнӗ тӑватӑ арҫынна хӗненӗ. Пӑтӑрмах пирки массӑллӑ информаци хатӗрӗсем хыпарланӑ. Хамӑр регионтисем ҫеҫ мар, ҫӗршыврисем те.
Пӑтӑрмах ҫурла уйӑхӗн 27-мӗшӗнче каҫхи вунӑ сехетре Шупашкарти Гоголь урамӗнчи магазинтан инҫех мар вырӑнта пулса иртнӗ.
Ҫапӑҫнине куракансем каланӑ тӑрӑх, чикансен ушкӑнӗ тӑватӑ арҫын ҫине сиксе ӳкнӗ. Кайран хушша-хуппа ыттисем те кӗнӗ. 15 ҫынтан кая мар хутшӑннӑ.
Пӑтӑрмах вырӑнне йӗрке хуралҫисем пырса ҫитнӗ ҫӗре ҫапӑҫакансем саланса пӗтнӗ. Хӗнесе пӗтернӗрен тухтӑрсенчен пулӑшу ыйтакансем пулман.
Ҫӗнӗ Шупашкарта та, Шупашкарти пекех, Республика кунне халалланӑ мероприятисене ирттересшӗн. Кун пирки ЧР Элтеперӗ Олег Николаев Ҫӗнӗ Шупашкар ҫыннисене хула кунӗпе саламланӑ май каланӑ.
Ҫитес ҫул Республика кунӗ Ҫӗнӗ Шупашкарта та иртӗ. Ҫавна май Элтепер хулара улшӑнусем пулассине каланӑ. Тӗслӗхрен, «Атӑл» кинотеатр ҫывӑхӗнчи лапама хитрелетесшӗн, хӑтлӑх кӗртесшӗн. Ҫавӑн пекех ҫӗнӗ шкул хута ярасшӑн, Атӑл ҫыранне илем кӳресшӗн, ҫурт картишӗсене лайӑхлатасшӑн.
Ҫакна та палӑртмалла: Ҫӗнӗ Шупашкарта водород перекиҫне кӑларакан савут тума тытӑнӗҫ.
Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче кино тӳлевсӗр кӑтартӗҫ. Ӑна культура учрежденийӗ «Ночь кино» (чӑв. Кино каҫӗ) пӗтӗм ҫӗршыври акцие хутшӑннӑ май йӗркелет.
«Ҫеҫпӗл» кинозалта кӗҫӗр, ҫурла уйӑхӗн 27-мӗшӗнче, пысӑк экран ҫинче 2021-2022 ҫулсенчи ӑнӑҫлӑ кинопремьерӑсене кӑтартӗҫ. Вӗсене хамӑр ҫӗршыври ӑстасем ӳкернӗ.
18 сехетре квест иртӗ. 19 сехетре «Последний Богатырь: Посланник Тьмы» (6+) приключени, 21 сехетре «Пара из будущего» (12+) камит, 23 сехетре «Чемпион мира» (6+) драма кӑтартӗҫ. Тӳлевсӗрех!
Шупашкарта чӑвашла калаҫакансен «Чӑн Чӑваш» клубӗн черетлӗ 20-мӗш тӗл пулӑвӗ иртнӗ. Кун пирки асӑннӑ клуб хастарӗ Виктор Чугаров тӗнче тетелӗнчи халӑх ушкӑнӗсенчен пӗринче йӗркеленӗ клубӑн пабликӗнче пӗлтернӗ.
Клуб хӑни Раҫҫей Журналистсен союзӗн членӗ, Раҫҫейӗн армреслинг енӗпе спорт мастерӗ Олеся Михайлова пулнӑ. Вӑл хӑйӗн пурнӑҫ ҫулӗ ҫинчен каласа панӑ.
Виктор Чугаров пӗлтернӗ тӑрӑх, клубӑн ҫитес тӗлпулӑвӗ авӑн уйӑхӗнче иртӗ.
+16.3 °C