Электросамокатсем каллех Шупашкар урамӗсене тухса ларнӑ. Унпа ҫӳрекен ҫын нумай.
Ӗнер 22 сехет те 5 минутра Миттов бульварӗнчи 20-мӗш ҫурт картишӗнче 42 ҫулти водитель электросамокатпа пыракан 36-ри арҫын ҫине пырса кӗнӗ. Иккӗмӗшӗ аманнӑ. Ӑна медпулӑшу парсан киле янӑ.
Патшалӑх автоинспекцийӗ пӗлтернӗ тӑрӑх, ҫулталӑк пуҫланнӑранпа электросамокатсемпе ҫыхӑннӑ 6 авари пулнӑ. Вӗсенче 3 ҫын аманнӑ.
Паян 19 сехет те 14 минутра Шупашкарти Патрис Лумумба урамӗнче 10-мӗш ҫурт ҫывӑхӗнче хӗр виллине тупнӑ. Малтанлӑха пӗлтернӗ тӑрӑх, 15 ҫулти хӗр 13-мӗш хутран ӳкнӗ.
Вырӑна оперативлӑ службӑсем ҫитнӗ. Следстви комитечӗн Чӑваш Енри следстви органӗсем ӗҫ-пуҫа тишкернине пӗлтернӗ.
Ака уйӑхӗн 30-мӗшӗнче Шупашкарти "Байконур" микрорайонти Кӑкшӑм пӗви ҫывӑхӗнче хӑйне евӗр ӑмӑрту иртӗ. Унта хутшӑнакансем ҫӳп-ҫап пуҫтарса уншӑн балл илӗҫ. Ҫӗнтерӳҫӗсемпе призерсене парнесемпе хавхалантарӗҫ.
Конкурс "Таса вӑйӑ" ятлӑ. Унта хутшӑнас тесен 1-2 ҫынран тӑракан командӑна регистрацилемелле. Кӑкшӑм пӗвинчи ятарлӑ конкурса та хутшӑнма май пулӗ. "Крокодилсене тытни" ятлӑскерте пӗвере шинӑсем тытмалла.
Юлашкинчен вӗри апатпа хӑналӗҫ.
Кӗҫех Шупашкарта Ҫуркуннепе Ӗҫ уявне тата Ҫӗнтерӳ кунне паллӑ тӑвӗҫ. Ку уявсенче массӑллӑ мероприятисем пыракан вырӑнсенче эрех-сӑра сутма чарӗҫ. Ҫапла йышӑннӑ Шупашкар хула администрацийӗ.
Мероприяти пуҫланиччен 2 сехет маларах тата ун хыҫҫӑн 1 сехет эрех-сӑра сутмӗҫ. Массӑллӑ мероприятисем ҫу уйӑхӗн 1-мӗшӗнче, 5-мӗшӗнче, 6-мӗшӗнче, 7-мӗшӗнче, 8-мӗшӗнче тата 9-мӗшӗнче иртӗҫ.
Аса илтерер: кӑҫал «Вилӗмсӗр полк» пулмӗ. Акци урӑхларах йӗркепе иртӗ: вӑрҫа хутшӑннӑ паттӑрсене потречӗсене машина, чӳрече ҫине ҫирӗплетме сӗнеҫҫӗ.
Мускаври "Халӑх фрончӗн" хастарӗсем Шупашкара килнӗ. Вӗсем Чантӑр ҫывӑхӗнче тума хатӗрленнӗ крематори вырӑнне тӗрӗсленӗ. Аса илтерер: унта пурӑнакансем крематори тӑвассине хирӗҫ. Вӗсем каланӑ тӑрӑх, ку вӗсен сывлӑхӗшӗн сиенлӗ пулӗ.
Хастарсем вырӑнти влаҫпа пӗрле Шупашкарти кӑнтӑр-хӗвеланӑҫ районне те ҫитсе курнӑ. Унти халӑх унччен маларах РФ Президенчӗ Владимир Путин патне видеоҫӑхав янӑ: унта ҫӗнӗ ҫуртсем тӑвассишӗн ӗмӗрхи юмансене касаҫҫӗ.
Чӑваш Енӗн Ӗҫ тата социаллӑ хӳтлӗх министерстви ертӳҫӗсен кадр резервне йӗркелеме конкурс ирттерет.
Кадр резервне Патӑрьелти, Шупашкарти, Ҫӗрпӳри халӑхӑн социаллӑ ыйтӑвӗсене тивӗҫтерекен центрсем тата Шупашкарти ачасен реабилитаци центрӗ валли хатӗрлеҫҫӗ.
Конкурса хутшӑнас кӑмӑллисен заявленийӗсемпе докуменчӗсене ака уйӑхӗн 21-мӗшӗнче йышӑнма тытӑннӑ, ҫу уйӑхӗн 12-мӗшӗнче йышӑнса пӗтерӗҫ.
Атӑл тӑрӑх пӑрахутсем ҫӳреме тытӑнӗҫ. Ку хыпара Шупашкарти юханшыв портӗнче пӗлтернӗ. Круизсене ҫу уйӑхӗнче йӗркелеме палӑртса хунӑ ӗнтӗ.
Ҫу уйӑхӗн 7, 21, 27-мӗшӗсенче ирхи 9 сехетрен пуҫласа 19 сехетчен «Шупашкар – Шереметев керменӗ (Юрино) – Шупашкар» маршрутпа ҫула тухма май килӗ; ҫу уйӑхӗн 14 тата 28-мӗшӗсенче — «Шупашкар – Чикме – Шереметев (Юрино) керменӗ – Шупашкар» маршрутпа; ҫу уйӑхӗн 13 тата 20-мӗшӗсенче — «Шупашкар – Ҫӗнӗ Шупашкар – Сӗве – Куславкка – Сӑр чикки – Кайӑк вӗҫевӗ — Шупашкар» пӑрахутпа автобус турне.
Ҫӗнӗ Шупашкарта ҫурт стени ҫине Совет Союзӗн Паттӑрӗн портретне ӳкереҫҫӗ. Спутник хулара пурӑнакансенчен чылайӑшне килӗшет вӑл.
Винокуров урамӗнчи 26-мӗш "а" ҫурт стени ҫинче Вячеслав Винокуровӑн портречӗ пулӗ. Вӑл — 30 метр ҫӳллӗш. Портрета кӗҫех ӳкерсе пӗтерӗҫ.
Сӑмах май, Шупашкарти Хевеш урамӗнчи ҫурт ҫинче Андриян Николаевӑн портретне ӳкернӗ.
Шупашкарта кӗҫех фонтансем ӗҫлеме тытӑнӗҫ. Урамсене илем кӳрекен тата халӑха савӑнтаракан ҫав вырӑнсем ҫу уйӑхӗн 1-мӗшӗнче ӗҫлесе кайӗҫ. Кун пирки хула администрацийӗнче пӗлтернӗ. Атӑл кӳлмекне вара акӑшсем илсе кайса ярӗҫ.
Иртнӗ ҫул хулара 14 фонтан ӗҫленӗ, вӗсене юпа уйӑхӗн 1-мӗшӗнче ӗҫлеме чарнӑ.
Шупашкар хули ҫывӑх вӑхӑтра татах та илемленсе кайӗ. Вӑл республика хӑнисене те килӗшет.
Шупашкарта ака уйӑхӗн 29-мӗшӗнче «Йытӑсен парачӗ» социаллӑ мероприяти ирттереҫҫӗ. Ӑна килсӗр чӗрчунсен ҫивӗч ыйтӑвне ҫӗклес тесе йӗркелеҫҫӗ.
Мероприяти кӳлмекре «Юрӑ уйӗнче» пулӗ. Парада хутшӑнас тесе проект сайтӗнче регистрациленмелле.
Мероприяти пуҫланиччен, 10 сехетре, регистраци пуҫланӗ. Кайран йытӑсемпе хуҫисем «Юрӑ уйне» кайӗҫ. 10 сехет ҫурӑра концерт пуҫланӗ.
+14.3 °C