Хӗрлӗ Чутай районӗнче Литература ҫулталӑкне уҫнӑ ятпа район центрӗнче вырнаҫнӑ Культура керменӗнче савӑнӑҫлӑ уяв иртрӗ.

Уява килнисем ӑна тӗплӗ хатӗрленине курчӗҫ. Ак, сӑмахран, хӑнасене те фойере «Нарспи» поэмӑри сӑнарсем кӗтсе илчӗҫ. Кунтах район центрӗнчи вулавӑш ӗҫченӗсем йӗркеленӗ тӗрлӗ куравсем: «Вӑрҫӑ ҫинчен ҫырнӑ кӗнекене вула», «2015 ҫулхи юбиляр писательсем», «2015 ҫулти юбиляр кӗнекесем», «Чӑваш ҫыравҫисем- юбилярсем», «Вырӑнти талантсем» тата ыттисем те. Кунтах Константин Ивановӑн вилӗмсӗр хайлавӗсем. Иккӗмӗш хута хӑпармалли картлашкасен айккинчи стенасем ҫине паллӑ ҫыравҫӑсемпе сӑвӑҫсен илемлӗ сӑнӗсене вырнаҫтарнӑ. Вырӑнти поэтсемпе ҫыравҫӑсем вара — Зоя Сывлӑмпи, Светлана Яруткина, Галина Зотова, Лев Медведев, Александр Трофимов, Оксана Коракова — хӑйсен кӗнекисен куравӗсене йӗркеленӗ. Вӗсен кӗнекисемпе хӑнасем интересленех паллашрӗҫ.

Литература ҫулталӑкне уҫма чӑваш халӑх ҫыравҫи, Чӑваш Республикин ҫыравҫисен пӗрлӗхӗн ертӳҫи Юхма Мишши килсе ҫитнӗ, вӑл пухӑннисене хӑйӗн сумлӑ хайлавӗсен пуххипе паллаштарчӗ. Чӑвашпотребсоюз председателӗ, Чӑваш Патшалӑх Канашӗн депутачӗ Валерий Павлов, Хӗрлӗ Чутай районӗн пуҫлӑхӗ Александр Степанов депутат, администраци пуҫлӑхӗ Александр Башкиров, районти культура пайӗн пуҫлӑхӗ Александр Самсонов тата ыттисем литература каҫалӑхӗнче тӑрӑшакансене литература ҫулталӑкӗнче татах та ӑнӑҫлӑрах ӗҫлеме чӗнсе каларӗҫ, май пулсан пулӑшма шантарчӗҫ.

Уява Хӗрлӗ Чутайри вӑтам шкул вӗренекенӗсем Наталья Храмова ертсе пынипе хатӗрленӗ Лев Толстой ҫырнӑ «Война и мир» романри Наташа Ростовӑн пӗрремӗш балне сӑнарланипе пуҫларӗҫ.

Уяв хӑнисем пухӑннисене Литература ҫулталӑкне уҫнӑ ятпа саламларӗҫ, культурӑра тӑрӑшса ӗҫлекенсене Хисеп хучӗсемпе чысларӗҫ. Юхма Мишши уява пуш алӑпа килмен, Чӑваш халӑх канашӗн депутачӗ Николай Малов районти шкулсемпе вулавӑшсем валли кӗнекесем парса янӑ иккен.

Уявра районти тӗрлӗ шкулсенчи тата Культура ҫурчӗсем ҫумӗнчи юрӑ-ташӑ ӑстисем чӑвашла тата вырӑсла сӑвӑ-юрӑпа, хитре ташӑсемпе савӑнтарчӗҫ. Константин Ивановӑн «Нарспи» поэмӑри сыпӑкӗсем, Ҫеҫпӗл Мишши ҫырнӑ сӑвӑсем, вырӑнти авторсем ҫырнӑ сӑвӑсем, лирика юррисем чуна тивмелле янӑрарӗҫ.

Сӑнсем (98)

#Хӗрлӗ Чутай районӗ, #кӗнекесем, #Литература ҫулталӑкӗ, #уявсем, #куравсем, #Константин Иванов ҫулталӑкӗ, #вулавӑшсем, #Хӗрлӗ Чутай