Чӑваш Енӗн Театр ӗҫченӗсен пӗрлешӗвӗ «Драма театрӗсен актерӗсем юрлаҫҫӗ» республикӑри конкурсне ирттернӗ. Икӗ ҫулта пӗрре йӗркелекен мероприятие хальхинче Чӑваш патшалӑх оперӑпа балет театрӗнче пухӑннӑ.

Конкурса драма театрӗсен, пуканесен, ҫамрӑксен театрӗнче ӗҫлекенсем хутшӑнаяҫҫӗ. Кашни конкурсант музыка программи е композици хатӗрлеме пултарать. Анчах 2 номертен ытла пулмалла мар. Артистсем дуэтпа та, триопа та, квратетпа та, уйрӑмшар та юрлаяҫҫӗ. Жанрне тата аккомпанементне хӑйсене суйлама ирӗк параҫҫӗ. Ҫулне те пӑхмаҫҫӗ. Конкурса йӗркелекенсем ҫапах та хӑйне евӗр тӗллев те лартнӑ-ха, кашни номер вӗҫленнӗ театр хайлавӗ пулма тивӗҫ.

Конкурса саккӑррӑн хутшӑннӑ. Вӗсем хушшинче солистсем те, ушкӑнсем те пур. Вӗсем тӗрлӗ темӑллӑ юрӑсене чӑвашла та, вырӑсла та, акӑлчанла та шӑрантарнӑ.

Тӳре йышне Чӑваш Республикин тава тивӗҫлӗ ӳнер ӗҫченне Ольга Нестерована (вӑл — тӳресен председателӗ) тата ытти паллӑ ҫынна кӗртнӗ.

Пӗрремӗш вырӑна К.В. Иванов ячӗллӗ Чӑваш патшалӑх драма театрӗн артисчӗ Анна Кудряшова йышӑннӑ. Ӑна 3 пин те 500 тенкӗ укҫан премипе тата дипломпа чысланӑ. Иккӗмӗш вырӑна тухнисен йышӗнче те асӑннӑ театр артисчӗ пур. Вӑл — Ирина Иванова. Иккӗмӗш вырӑнпа ҫавӑн пекех Вырӑс драма театрӗн артисчӗсем Оксана Ананьевапа Диана Яковлева тухнӑ. Вӗсене те дипломпа кӑна мар, укҫан та (2,5 пин тенкӗпе) чысланӑ. Виҫҫӗмш вырӑн йышӑннисене 2 пиншер тенкӗ лекнӗ. Кунта Чӑваш патшалӑх ҫамрӑксен театрӗн артисчӗ Ирина Архипова тата Вырӑс драма театрӗн артисчӗ Исмаил Махмутов палӑрнӑ. Клнкурса хутшӑннӑ ытти артиста та хавхалантарнӑ. 1000 тенкӗ укҫа Чӑваш патшалӑх ҫамрӑксен театрӗн артисчӗ Виталий Сергеев тата Чӑваш патшалӑх сӑнавлӑ театрӗн артисчӗ Ольга Степанова лекнӗ. Конкурса хутшӑннӑ Ҫамрӑксен тетарӗн тепӗр артистне Алевтина Семенована дипломпа йӑпатнӑ.

#театрсем, #оперӑпа балет театрӗ, #конкурссем, #академи драма театрӗ