«Елчӗк ен» хаҫат вулаканӗсем Валентина Кириллова ҫыравҫӑн статйисене, корреспонденцийӗсене, калавӗсене аван пӗлеҫҫӗ темелле. Ял ҫыннисем унӑн хайлавӗсене юратса вулаҫҫӗ. Мӗншӗн тесен хӑйӗн сӑнарӗсене вӑл пурнӑҫран тупать. Этем кун-ҫулӗн кукӑр-макӑрӗсене витӗрех курса тӑнӑран ку е вӑл персонажа калӑпламашкӑн вулаканшӑн ҫывӑх та ҫӑмӑл чӗлхепе, пурне те кӑсӑклантармалла ҫырать. Нумаях пулмасть В.Кириллован Елчӗкри типографире «Савӑнӑҫ куҫҫулӗ» ятлӑ кӗнеки пичетленсе тухрӗ. Унӑн пултарулӑхне хаклакансемшӗн ку парне вырӑнӗнчех пулчӗ.

Валентина Алексеевна Кириллова (Смирнова) 1963-мӗш ҫулхи авӑн уйӑхӗн 23-мӗшӗнче Комсомольски районӗнчи Нӗркеҫ ялӗнче ҫуралса ӳснӗ. Кӳршӗллӗ Кипеҫ шкулӗнче вӗреннӗ. Валентинӑн илемлӗ чӗлхепе ҫырнӑ сочиненийӗсене шкулти чӑваш чӗлхипе литературине вӗрентекен В.П.Ермаков та яланах ырланӑ, ыттисемшӗн тӗслӗх пулнине палӑртнӑ. Пулас ҫыравҫӑ хайлавӗсем, аслисем хавхалантарнине кура, «Каҫал ен» («Октябрь ялавӗ») хаҫатра, республикӑра тухса тӑракан «Самант» («Хатӗр пул») журналта, «Тантӑш» («Пионер сасси») хаҫатра кун ҫути курнӑ. Ачалӑхра ҫуралнӑ ӗмӗт-тӗллевне пурнӑҫланӑ теме пулать ӑна. Малашлӑх ҫул-йӗрӗ пӗтӗмпех хаҫат ӗҫӗпе ҫыхӑннӑ.

В.Кириллова И.Н.Ульянов ячӗллӗ Чӑваш патшалӑх университетӗнчи чӑваш чӗлхипе литература уйрӑмӗнче вӗреннӗ. 1988-мӗш ҫултанпа Елчӗк район хаҫатӗнче вӑй хурать. 1991-мӗш ҫултанпа хаҫат редакцийӗн ҫырусен пайӗн редакторӗ, Раҫҫей Федерацийӗн Журналистсен Союзӗн членӗ (2004 ҫ.) Вӑл ҫырнисем республикӑри «Чӑваш хӗрарӑмӗ», Тутар Республикинчи «Сувар» хаҫатсенче те пичетленеҫҫӗ.

«Савӑнӑҫ куҫҫулӗ» — Валентина Алексеевнӑн пӗрремӗш кӗнеки. Пӗтӗмӗшле илсен, хайлавсенче ҫемьепе мораль теми тӗп вырӑн йышӑнса тӑрать. Сюжет ҫӑмхи те интереслӗ. Вулакана тӳрех тыткӑнлать.

Хамӑрӑн юратнӑ автора кӗнеке тухнӑ ятпа ӑшшӑн саламлатпӑр. Пурнӑҫра ырлӑх –сывлӑх, ҫемьере телей, пултарулӑх ӗҫӗнче ӑнӑҫу сунатпӑр.

#Елчӗк районӗ, #кӗнекесем, #Нӗркеҫ, #Комсомольски районӗ