Чӑваш сӑрчӗ ҫинче. Н. Плотников тунӑ сӑн

Ӗнер утӑн 9-мӗшӗнче Чунҫӳрев–2014 8 200 ытла ҫухрӑм ҫаврӑнса ҫӳресе Шупашкара таврӑнчӗ. 25-мӗш хут йӗркеленнӗ ҫак ҫулҫӳрев иртнӗ уйӑхӑн 29-мӗш кунӗнче тапраннӑччӗ.

Чунҫӳрев кӑҫал Пушкӑрт республикинчи Сӑлакпуҫа кӗрсе концерт лартрӗ, унтан Чӑваш сӑрчӗ патнелле ҫул тытрӗ. Кунта ҫитсен икӗ пӑшӑрхануллӑ хыпар кӗтсе илчӗ — пӗрре сӑрт ҫамкине пӑсса 7 метр ҫӳллӗш саспаллисем ҫырнӑ иккен, тепре — археологи палӑкӗсене ҫӗмӗрсе темле труба бетонласа лартнӑ. Кунта юпа лартсан та ӑна никам та сыхламӗ тесе вара Абалак текен кану базине лартма йышӑнчӗҫ. Сӑмах май, Ермак пырса кӗнӗ вӑхӑтра Абалакра та чӑваш ялӗ пулнӑ. Халӗ вара кунта паллӑ мӑнастир вырнаҫнӑ тата ӗлӗкхилле йӗркеленӗ кану бази. Юпана така пуссах, кунта пуҫ хунӑ мӑн асаттесене асӑнсах лартрӗҫ.

Унтан чунҫӳревҫӗсем Алтай республикинче иртекен Эл ойын уява ҫул тытрӗҫ. Ҫул хӗрринчех Василий Шукшинӑн ялӗ вырнаҫнӑран унта та кӗрсе тухрӗҫ. Пирӗн тӗпчевҫӗсем ӑна чӑваш юнӗллӗ тесе шутлаҫҫӗ пулсан, вырӑнтисем вӑл мӑкшӑ халӑхӗнчен теҫҫӗ. «Эл ойын» уявӗнче чунҫӳревҫӗсем концерт программине хутшӑнчӗҫ, икӗ ҫул маларах лартнӑ юпа патӗнче чӑвашла ятсем йышӑнчӗҫ.

Каялла таврӑннӑ май Пушкӑртстанри Чӑваш Хурамалне кӗрсе концерт лартрӗҫ. Хапӑлласа кӗтсе илнӗ ял халӑхне 3 сехет тӑршшӗ концерт лартса пачӗҫ.

Ҫулҫӳреве вӗҫлекен чарӑнусем Тутарстанри Пӳлерте тата Пӑлхарта пулчӗҫ. Пӳлерте Валем Хуҫа ҫӑлкуҫӗнчи сивӗ шывпа сапӑнчӗҫ, Пӑлхарта — ҫулсерен улшӑнса пыракан музей комплексӗпе паллашрӗҫ.

Сӑнсем: 1-мӗш пай (1 135 сӑн), 2-мӗш пай (510 сӑн, Эл Ойын). Ҫавӑн пекех «Пӗркласрисем» халӑх тетелӗнчи Чунҫӳрев ушкӑнӗнче (854) паллашма май пур.

#Пӑлхар, #Пӳлер, #Учук, #чӑвашлӑх, #Алтай, #Тӗмен, #Тобольск, #Слакпуҫ, #Пушкӑртстан, #Чунҫӳревсем, #Тутарстан, #Чӑваш Хурамалӗ, #концертсем