Тахҫантанпах кӗтни тинех пурнӑҫланчӗ теме юрать — Чӑваш Енре пӗрремӗш хут Ҫамрӑк ҫыравҫӑсен форумӗ иртрӗ. Юлашки ҫулсенче чылайӑшне хумхантаракан тӑван литературӑри проблемӑсене (ҫамрӑк авторсем сахалланни, литература ӑшӑхланса пыни, аслӑ тата кӗҫӗн ӑрури ҫыравҫӑсен хушшинче пултарулӑх ҫыхӑнӑвӗсем татӑлни тата ыт.те.) татса парас тӗллевпе пӗр сӗтел хушшине ларса канашлас самант ҫитнине кашниех туятчӗ пулӗ. Малалла та ҫаплах ним тумасӑр пурӑнсан пур пек ҫыравҫӑсем те сапаланса пӗтме пултарасса Культура Министерстви тата чӑваш писателӗсен икӗ союзӗ (професионал-писательсен тата М.Юхма ертсе пыраканни) вӑхӑтра асӑрханӑ. Чӑваш оперӑпа балет театрӗн керменӗнче уҫӑлнӑ Форума культура министрӗ Р.М.Лизакова ертсе пычӗ. Ҫамрӑк авторсене хумхантаракан ыйтусемпе "Хресчен сасси" Пичет ҫурчӗн директорӗ С.Л.Павлов, писательсен пӗрлешӗвӗсен председателӗсем И.Д.Вутланпа М.Н.Юхма, Чӑваш кӗнеке издательствин директорӗ В.П.Комиссаров сӑмах илчӗҫ. Хӑюллӑ ҫамрӑк ҫыравҫӑсем те ыйтусене сӳтсе явнӑ чух айккинче тӑрса юлмарӗҫ: Дима Моисеевпа Валентина Беляева ҫивӗч шухӑшсем каларӗҫ. Форума ирттерекенсем ҫамрӑк писательсен конкурсне йӗркелеме, лайӑх хайлавсене уйрӑм кӗнекен пичетлеме, писательсен союзӗ ҫумӗнче литература секцийӗсене (проза, поэзи, драма, ача-пӑча литератури) ертсе пыма, час-часах пӗрле пухӑнса тӗрлӗ ыйтусене сӳтсе явмалли вырӑн уйӑрма (литература музейӗпе наци библиотекинче) йышӑнса хӑварчӗҫ. Форумӑн пленарлӑ ларӑвӗ хыҫҫӑн секцисем ӗҫе пуҫӑнчӗҫ. Проза, поэзи, драма тата ача-пӑча литературин секцийӗсенче аслӑ ӑрури ҫыравҫӑсем кӗҫӗннисемпе илемлӗ сӑмахлӑхри вӑрттӑнлӑхсем ҫинчен калаҫрӗҫ.

#Шупашкар, #ҫыравҫӑсем, #литература, #Чӑваш оперӑпа балет театрӗ