«Ҫанталӑк 21» порталти сӑн

Ҫулла вӗҫленчӗ, кӗрхи ҫанталӑк ҫитрӗ тетӗр-и? Ун пек калама ан васкӑр – кӗҫех республикӑна ӑшӑ ҫитет.

«Ҫанталӑк 21» сайт пӗлтернӗ тӑрӑх, ыран пирӗн пата антициклон килет, хӗвел тухать, палӑрмаллах ӑшӑтать – термометр 20-25 градус кӑтартӗ. Ҫапах вырӑнӑн-вырӑнӑн ҫумӑр ҫума пултарать. Кӗҫӗр вара тӗтре карса илӗ.

Ыран ҫӗрле те ҫумӑр ҫума пултарать. Юнкун 23-28 градус ӑшӑ пулӗ. Ун чухне ҫӗрле те ӑшӑ ҫанталӑк тӑрӗ.

Кӗҫнерникун вара, ҫурла уйӑхӗн 20-мӗшӗнче, каллех сивӗтсе илӗ, ҫумӑр ҫӑвӗ. Эрне вӗҫӗнче пӗлӗтлӗ ҫанталӑк пулӗ, ҫумӑр ҫумӗ. Вырсарникун кӑна вырӑнӑн-вырӑнӑн ҫумӑр ӳкӗ. Эрнекун вара ҫил вӑйланӗ, кӑнтӑрла 20-22 градус ӑшӑ пулӗ, ҫӗрле – 13-15 градус. Сӑмах май, ку климат нормипе кишӗлсе тӑрать.

Малтанлӑха пӗлтернӗ тӑрӑх, ҫитес эрнере те ӑшӑ пулӗ. Уйӑх вӗҫӗнче кӑна ҫумӑр ҫума пӑрахӗ.

#ҫутҫанталӑк, #синоптиксем, #ҫанталӑк