Шупашкарта арҫыннӑн питӗ эрех ӗҫес килсе кайнӑ та вӑл лавкка алӑкне ҫӗмӗрсе кӗнӗ. Унтан вӑл икӗ кӗленче йӑтса тухнӑ.

Супермаркетра сигнализаци ӗҫлесе кайни пирки ҫур ҫӗр иртни 2 сехет те 45 минутра полицие пӗлтернӗ. Пакунлисем вырӑна ҫийӗнчех ҫитнӗ. Вӗсем юр ҫинче ура йӗррисем пулнине асӑрханӑ. Ун тӑрӑх кайнӑ та – ҫывӑхри ҫурт патне, Николаев урамне, илсе ҫитернӗ.

Подъзда кӗрсен йӗпе йӗрсем хваттер патнех илсе ҫитернӗ. 42 ҫулти арҫын эрех вӑрланине тунман та, сӗтелӗ ҫинче ҫав ике кӗленче ларнӑ, пӗрне уҫса ӗҫме ӗлкӗрнӗ. Ӑна полици уйрӑмне илсе ҫитернӗ, ӗҫ-пуҫа уҫӑмлатаҫҫӗ.

#Шупашкар, #лавккасем, #вӑрӑсем, #эрех, #полицейскисем