Паян, авӑнӑн 7-мӗшӗнче, Чӑваш халӑх сайчӗ хӑйӗн черетлӗ ҫуралнӑ кунне паллӑ тӑвать. Пӗлтӗрхи пек ҫавра ҫул мар-ха ӗнтӗ, ҫавах та «Чӑваш халӑх сайчӗ» кун ҫути курнӑранпа 16 ҫул ҫитрӗ.

Черетлӗ ҫул пысӑк улшӑнусемпе палӑрмарӗ. Нимӗнле ҫӗнӗлӗх те ҫук. Ҫӗнӗлӗх мар, ҫухатусем пур темелле. Калӑпӑр, пӗлтӗр вырӑсла хыпарсене ҫырма эпир ятарлӑ ҫынна тытса тӑраттӑмӑр пулсан, кӑҫал, укҫа-тенкӗ ҫитсе пыманран, вырӑсла версине хыпарсемпе тултаракан ятарлӑ ҫын ҫук.

Ҫак сӑлтавсем эпир паянхи кун хамӑр вӑя ытларах енӗпе Чӑваш чӗлхи лабораторине янипе ҫыхӑннӑ. Чӑвашла-вырӑсла пуплевӗшсен йышне 1 миллиона ҫитерме тӗллев лартнӑччӗ те кӑҫал вӑл плана пурнӑҫласа ҫитересшӗн. Нумаях та юлмарӗ ӗнтӗ — тата 50 пин тӑвасси ҫеҫ юлчӗ. Юрать-ха, ҫак ӗҫе туса пынӑ май кӑҫал «Литература кӗтесӗ» кӑшт пуянланчӗ — хайлавсем нумаях мар пулин те, ҫавах хушӑнчӗҫ.

Апла-и, капла-и — 16 ҫул ӗҫлени сахал вӑхӑт мар. Сайт хӑй еккипе ҫеҫ пынин сӑлтавӗ те ҫавӑнтах. Сайт аталанмасть тесен те йӑнӑш пулӗ — кӗрекенсен йышӗ ӳссех пырать. Ҫуллахи вӑхӑтра та вулакансен йышӗ кӑҫал талӑкра 300 ҫынран чакмарӗ. Кӗр кунӗсем ҫитнӗ хыҫҫӑн вӗсем пирӗн нумайланаҫҫӗ — 400–500 таран ҫитеҫҫӗ (хӑш-пӗр кун ку кӑтарту 700 урлӑ та иртет). Сӑмах май, хальхи вӑхӑтра эпир хӑш чухне чӑвашла версине кӗрекенсем вырӑслинчен те ытларах пулнине сӑнатпӑр.

Чӑваш халӑх сайтне черетлӗ ҫуралнӑ кунӗ ячӗпе саламлатпӑр! Пӗр вырӑнта тӑрас тапхӑр вӗҫленессе шанатпӑр, хӑйӗн кӑтартӑвӗсене татах та ӳстерессе ӗненсе тӑратпӑр! Ӑнӑҫупа ҫитӗнӳсем сунатпӑр!

Хушса калани. Чӑваш халӑх сайтне ҫӗнӗ варкӑш кӗртмелле те, анчах питӗ шел, ҫав варкӑша кӗртес шухӑшлисем ҫук. Сайтӑн тӗп редакторӗ улшӑнмалли пирки тахҫанах сӑмах хускатнӑ пулин те, ку тивӗҫе хӑй ҫине илме хатӗр ҫын тупӑнаймарӗ. Ҫавах шанчӑка ҫухатман, вӑл ҫынна кӗтетпӗр.

Хушса калани 2. Чӑваш халӑх сайтне укҫа-тенкӗ енчен пулӑшу кӳрес текенсем тӗп редакторӑн телефон номерӗпе куҫарма пултараҫҫӗ: +79050276137. Сбербанк карточки: 4276 7500 2767 1261.

#чӑвашлӑх, #сайтсем, #саламсем, #МИХсем