Шупашкарти депутатсен хула пухӑвӗн депутачӗ Дмитрий Евсеев пушӑн 4-мӗшӗнче троллейбуса ларса карточкӑпа билет туянасшӑн пулнӑ. Анчах терминал ӗҫлемен. Депутат хӑйӗн интереслӗ ҫулҫӳревӗ пирки «Фейсбукри» хӑйӗн страницинче пӗлтернӗ.

«Халӑх тарҫин» ҫумра вак укҫа пулман, ҫавӑнпа вӑл билет туянайман. Дмитрий Евсеев кондуктора ҫакна ӑнлантарма тӑрӑшнӑ: терминал ӗҫлемесен вӑл пӗр хутчен тӳлевсӗр кайма пултарать. Анчах лешӗ ниепле те ӑнланасшӑн пулман. «Ты тута не эта давай!» - тесе ҫеҫ тӑнӑ кондуктор вырӑсла.

Транспортра терминал ӗҫлемесен мӗн тумалла? Кунашкал лару-тӑрӑва кӗрсе ӳкнисен ҫакна астумалла: карточкӑпа тӳленӗ чухне терминал ӗҫлемест тӗк пӗр хутчен тӳлевсӗр кайма юрать.

#Шупашкар, #депутатсем, #троллейбуссем