Нумаях пулмасть Етӗрне районӗнчи Кӑкшӑм ял тӑрӑхӗнчи Пӑчанар ялӗнче ҫуралса ӳснӗ Чечен Республикинче службӑра тӑнӑ чухне пуҫне хунӑ Анатолий Геннадьевич Иванова (1976–1996) асӑнса йӗлтӗрпе чупассипе ӑмӑртусем иртрӗҫ.

Малтанах Кӑкшӑмри шкул ачисемпе тӗлпулу иртрӗ. Ачасем умӗнче районти салтак амӑшӗсен комитечӗн председателӗ Л. Егорова, салтакӑн амӑшӗ Калиса Иванова тата унӑн пиччӗшӗ Зиновий Иванов интернационалист ҫинчен каласа пачӗҫ.

Кӑҫалхи ӑмӑрту Анатолий ячӗпе 11-мӗш хут иртрӗ. Ӑмӑртӑва район шайӗнче ирттернӗ, унта районти тата кӳршӗри Хӗрлӗ Чутай тата Элӗк районӗсенчи 100 ытла спортсмен хутшӑннӑ.

VIP-ӑмӑртура малти вырӑнсене пурне те Хӗрлӗ Чутай районӗнчи «Нива» СХПК-ра тӑрӑшакансем ҫӗнсе илнӗ (ертӳҫи Владимир Мурайкин). Вӗсем Кӑшӑмри шкул директорне Андрей Иванова тата салтакӑн тӑванӗсене ӑмӑртӑва интереслӗ йӗркеленӗшӗн тав тунӑ.

Ӑмӑрту ҫӗнтерӳҫисене ЧР Патшалӑх Канашӗн депутачӗ Валерий Павлов, райадминистраци пуҫлӑхӗ Владимир Кузьмин, Етӗрне районӗнчи ЧРООООИВА (чӑв. Афган вӑрҫин сусӑрӗсен пӗтӗм Раҫҫейри халӑх пӗрлешӗвӗн Чӑваш Республикинчи уйрӑмӗ, АВСПРХПЧР) пуҫлӑхӗ Н. Кириллов кубоксем, парнесем, Хисеп хучӗсем парса чыс тунӑ.

Хӑнасем Кӑкшӑмри шкулта вырнаҫнӑ музейри экспонатсемпе те хаваспах паллашнӑ.

#Хӗрлӗ Чутай районӗ, #Элӗк районӗ, #шкулсем, #Етӗрне районӗ, #Кӑкшӑм ял тӑрӑхӗ, #спорт, #йӗлтӗрпе чупасси, #Пӑчанар, #Кӑкшӑм, #Чечен вӑрҫи, #вӑрҫӑсем