Етӗрне районӗнче иртекен Анисим Асламас ячӗпе иртекен халӑх фесивальне хутшӑнса Кӑкшӑм ял тӑрӑхӗнчи артистсем «Человек славен трудом» (чӑв. «Этем ӗҫӗпе илемлӗ») ятлӑ ятарлӑ программа хатӗрленӗ.

Кӑкшӑмри Культура ҫуртӗнче ӗҫ ҫыннине халалласа ятарлӑ стенд йӗркеленӗ. Кунта вырӑнти ӗҫченсене халланӑ «С любовью к родной земле» (чӑв. Тӑван ҫӗре юратса) сӑнсен стенчӗ те, алӗҫ ӑстисен ӗҫӗсем те пур. Кӑкшӑмри «Родничок» (чӑв. Ҫӑлкуҫ) ача пахчинче ӗҫлекенсем курава чӑваш тумӗсем тӑхӑннӑ пуканесем илсе килнӗ. Людмила Гордеева «Чечексем — сире валли!» ятлӑ композици ӑсталанӑ. Людмила Максимова, Ильина Людмила, Андреева Зинаида, Мазюкина Елизавета, Федорова Алина, Семенова Ирина та тӗрлӗ мелпе ӑсталанӑ чечексемпе куракансене савӑнтарнӑ.

Кӑкшӑм ял тӑрӑхӗнче темӗн тӗрлӗ ӑстаҫӑ та пур иккен! Салфетка, алшӑлли, панно, коврик, тӗрлӗ ҫипуҫ ӑстисем Римма Артемьева, Тамара Миронова, Нина Иванова, Оксана Ильина, Инесса Иванова, Мария Матвеева тата ыттисем. Вӗсен пултарулӑхӗпе куракансем хаваспах паллашрӗҫ.

Концерт «Улах каҫӗпе» пуҫланчӗ. Артистсем улахра Ираида Вдовина репертуарӗнчи тата Федор Васильев, Николай Сандров, Филипп Лукин кӗвӗленӗ юрӑсене шӑрантарчӗҫ. Концерта Кӑкшӑмри шкулти вӗренекенсем те хутшӑнчӗҫ, ӗҫ ҫыннисене халалланӑ сӑвӑ-юрӑпа саламларӗҫ.

Кӑкшӑм ял тӑрӑхӗнче 8 ял, ҫак ялсенчи халӑх Кӑкшӑмри Культура ҫурчӗ ҫумӗнче темиҫе ансамль йӗркеленӗ: «Салам», «На завалинке», «Поченарочка», «Звездочки». Концертра кашни ушкӑн хӑйӗн ташӑ-юррипе куракансене савӑнтарчӗ.

#культура, #Етӗрне районӗ, #Ӗҫ ҫыннин ҫулталӑкӗ, #Кӑкшӑм ял тӑрӑхӗ, #Кӑкшӑм, #пултарулӑх, #фестивальсем