Правлени пайташӗсем

Нумай пулмасть Красноармейски район центрӗнчи Халӑх пултарулӑх ҫурчӗн вулав пӳлӗмӗнче Нестер Янкас ячӗллӗ пӗрлӗх правленийӗн черетлӗ ларӑвӗ иртрӗ. Пӗрлӗх правленийӗн председателӗ Г.Л.Ефимов ҫуллахи тапхӑрта туса ирттернӗ ӗҫсем ҫинче чарӑнса тӑчӗ, пӗрлӗх умӗнче ҫитес вӑхӑтра кун йӗркинче тӑракан тӗллевсене палӑртрӗ. Ҫитес тапхӑрта пурнӑҫа кӗртмелли ӗҫ планне ҫирӗплетес ыйтупа юрӑ-кӗвӗ секцийӗн ертӳҫи Никоноров Н.М., правлени председателӗн ҫумӗ Ершов Н.Г., ӳнер искусствисен секцийӗн ертӳҫи Серафимов В.С. тата краеведени секцийӗн ертӳҫи Константинов В.З. тухса калаҫнӑ. Правлени членӗсем ҫитес вӑхӑтра ирттермелли мероприятисен шутне хӑй тӗллӗн вӗреннӗ И.Р.Степанов композиторӑн (Кушкӑ ялӗ) юрӑ кӗнекине презентацилессипе, хӑй тӗллӗн вӗреннӗ Н.Г.Григорьев композиторӑн (Красноармейски ялӗ) 85 ҫулхи юбилейне паллӑ тӑвассипе, Вархуш Эншей поэтӑн (Еншик Чуллӑ ялӗ) 90 ҫулхи юбилейне паллӑ тӑвассипе тата М.И.Юрьева-Нямань ҫыравҫӑ-публицист ҫуралнӑранпа 100 ҫул ҫитнине паллӑ тӑвассипе ӗҫсем мӗнле пынине сӳтсе яврӗҫ.

Правлени членӗсем Совет Союзӗн Геройӗ, Асла Аттелӗх вӑрҫин паттӑрӗ В.В.Васильев ҫуралнӑранпа 100 ҫул ҫитнине халалласа шкул ачисен пултарулӑх конкурсне ирттерме йышанчӗҫ, ку мероприятие районти культура ӗҫӗсен планне кӗртме сӗнӳ пачӗҫ.

Правлени ларӑвӗн ӗҫне район администрацийӗн культура, спорт тата ҫамрӑксен ӗҫӗсен пайӗн начальникӗн ӗҫӗсене туса пыракан Аркадий Лебедев хутшӑнчӗ.

#Красноармейски, #Красноармейски районӗ, #ларусем, #Еншик Чуллӑ, #Кушкӑ