Электронлă вулавăш

Парăр-ха мана чăваш пулмашкăн!

Нимĕн те тек кирлĕ мар мана!

Çуралман эп халăха сутмашкăн,

Тикĕтпе варалама чуна!

Парăр-ха мана чăваш пулмашкăн!

Çакна çеç ыйтатăп эп сиртен!

Хам Çулпа эп Мал Енне утасшăн,

Вăй-хăват илсе Тăван Çĕртен.

Парăр-ха мана чăваш пулмашкăн,

Хам куçпа курмашкăн Тĕнчене!

Чăвашла эп юрă шăратасшăн

Саламланă чух Çăлтăрсене!

Эп — Чăваш! Чăваш пулса вилетĕп!

Хăп, тархасшăн, пур йăх-ях манран!..

Çуралман эп халăха сутмашкăн,

Култармашкăн çич юта хамран!

09.11.21

Тискер фашист таптасшăн пулчĕ

Мĕнпур пек чĕрĕ пурнăçа.

Унăн çулне картларĕ, пӳлчĕ

Пирĕн мухтавлă Улăп-çар.

Авалхине аса илсессĕн —

Кун пек вăл пулнă пĕрре мар...

Çичĕ ютран тăшман килсессĕн,

Пур халăх пирĕн тăнă кар!

Тапăнакан сахал-и пулнă

Авалтанпа тăван çĕре?!.

Юнпа-тарпа-çке халăх çунă

Хăй утса тухнă çул-йĕре.

Ĕмĕртенпех эпир утатпăр

Тăван вырăссемпе пĕрле.

Руç йыхăрсан, тăрса тухатпăр

Хĕрӳллĕ çапăçу хирне.

Хаяр Иван патша васкавлăн

Пуçтарнă чух вырăс çарне,

Эпир те, чăвашсем, хускалнă

Хӳтĕлемешкĕн Русь çĕрне.

Тискер вăр-хурахла Ливони,

Хальхи ултавлă пруссаксен

Ылханлă авалхи тăванĕ,

Ун чух та ют çĕре ăмсаннă,

Юнланнă сăмсине чиксе...

Çав йытă-рыцарь йăхне хирĕç

Чăваш та вырăспа пĕрле

Тăван çĕршывшăн тăнă çирĕп,

Ливонсене тинĕселле

Хирсе пăрахнă месерле.

Чăвашсене унтан куратпăр

Малалла

Шупашкарта шурă пӳрт,

Сарă вырăс пурăнать.

Сарă вырăс пурăнать,

Хура чунпа туслашать.

Пирĕн ялта хура пӳрт

Хура чăваш пурăнать.

Хура чăваш пурăнать,

Таса чунпа туслашать.

«Чăваш» тесен çынсем мана,

Питĕ савăнатăп.

Хĕвел çутатнăн çулăма

Малалла утатăп.

Шутламанччĕ ку кунччен

Çĕнĕ çул тупассине,

Ĕçлесе вăй юлмиччен

Чăн телей курассине.

Канас тесе куçа хупатăп...

Умра ял-йыш та хурăнташ.

Чи ăшă сăмахсем тупатăп,

Çумрах ман шĕвĕр кăранташ.

Хам пĕлнĕ пек хайлав хайлатăп,

Тен, вулĕç хаклă тăвансем.

Тăван сăмах вăйне çĕклетĕп,

Шанатăп: пĕтмĕç чăвашсем.