Манăн пурнăç

Анатолий Юман | Сăвă | Петĕр Хусанкай | Мĕтри Юман | 1 918


Аттеçĕм пулнă ман Юман, —

Паллах, ку ăнсăртран пулман.

 

Асаттепе ыр асанне

Чунтан юратнă ывăлне.

 

Юман пек — пурăнтăр пин çул,

Тесе çапла ят хунă пуль.

 

Анчах шутланă пек пулман, —

Ир хăрнă ман атте-юман.

 

Пач пулса тухнă урăхла —

Кĕç шĕкĕ çинĕ хурахла.

 

Кăра çил хуçнă силлесе,

Ăна тăман вăл шеллесе.

 

Аттеçĕм хăрнă вăхăтсăр, —

Пире хăварнă хăтлăхсăр.

 

Шăллăмпала мана анне

Пĕччен кăларчĕ çул çине.

 

Ай-хай тумхахлăччĕ çав çул,

Суратчĕ чун, ыратчĕ хул.

 

Мана, айван юманккана,

Тӳсме тивмерĕ мĕн кăна!

 

Анне те кĕчĕ час çĕре

Эпир ача чухнех, эре.

 

Çапах пурте начар пулман,

Ыйткалама тухса кайман.

 

Совет Союзĕ пулчĕ кил,

Ӳстерчĕ вăл, вăл пачĕ пил.

 

Çапла шăллăмпала мана

Çынна кăларчĕ. Тав ăна!

 

Тĕл пулчĕ Петĕр Хусанкай, —

Мĕтри Юман пек ӳссе кай, —

 

Тесе пиллерĕ вăл мана,

Поэзири çĕн Юмана.

 

Атте пек пăхрĕ ман çине,

Эп туйрăм сиплĕ ăшшине,

 

Ӳсес чухне, кĕтмен çĕртен,

Кĕç ӳкрĕм çĕр çине çӳлтен.

 

Хуран капланчĕ пĕлĕт пек,

Шуратрĕ яш пуçа элек.

 

Тĕп чăваш ячĕ — Юман ят

Пуç çине ячĕ хăямат.

 

Тĕл пулчĕ ман тĕле те мур,

Пĕр шĕкĕ, вăл кăтартрĕ хур.

 

Эп пултăм хуçăлнă турат —

Такам юри ура хурать.

 

Çавăнпала ăнмарĕ ĕç,

Хăрсах лараттăм пуль кĕç-вĕç

 

Ыр çын тĕлне пулман пулсан...

Çапла вăл пурнăç ăнмасан.

 

Çапах шанатпăр-ха ырра,

Тӳссе те хурапа шурра.

 

Этем пиçет кĕрешӳре, —

Ансат аваймĕç-ха пире.

 

Çав шанчăк вăй парать мана,

Поэзири çĕн Юмана.

 

Çĕнни те ĕмĕр çĕнĕ мар, —

Куратăр, тек эп хунав мар,

 

Тен, çитрĕм пулĕ кивелсе,

Юррăмсене кĕвĕлесе?

 

Ларасчĕ-ха тĕрĕс-тĕкел,

Тăкасчĕ кĕр енне йĕкел.

 

Юлашкинчен çакна калар:

Ĕç манăн кивĕ ятра мар,

 

Ешертĕр пин-пин çул вăрман

Чăваш юманлăхĕ ялан.

 

Чăваш Юманĕ — сумлă ят,

Унра пур шанчăклă хăват.

 

Вăл пур чухне — чăваш ыр-сыв,

Кал-кал сывлать Тăван çĕршыв,

 

Ман халăх çирĕп пултăрах,

Юман пек — пурăнтăр вăрах

 

Анчах шăпа вăл тĕрлĕрен, —

Пуласчĕ сыхă шĕкĕрен.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: