Хаваслă шутлав

Владимир Андреев | Куçару | 2008 | Самуил Маршак | вырăсларан | 3 853


(Пĕрререн вунна çити)

 

Ку, пĕрремĕшĕ, — пĕрре,

Çинçешке, хыткан сĕре.

 

Ку, ак, иккĕ текенни,

Лайăх ăйăр евĕрли,

Авнă хăй мăйне епле,

Перĕнет хӳри çĕре!

 

Иккĕ хыççăн, пăх та кур,

Виççĕ утрĕ пит маттур.

Çурма икĕ ункăпа

Виççĕ виççĕмĕш тăрать.

 

Виççĕ хыççăн тваттă тухрĕ,

Ун аллийĕ темшăн кукăр.

 

Авă, курăр, явăнса

Пиллĕк тухрĕ ташласа:

Аллисем таçта çӳлте,

Ури авăннă çĕрте.

 

Улттă мăн çăра пекех,

Тимĕрленĕ çеккĕлпех.

 

Çиччĕ калăн турчăка,

Пĕртен-пĕр кăна ура.

 

Саккăр икĕ сушкă пек,

Ма пулман-ши çыххипех?

 

Тăххăр цифра тĕнчипех

Кутăн тăнă улттă пек.

Вăл пуç хĕрлĕ тăрсанах

Улттăна каять куçсах.

 

О пек цифра пур иккен,

«Ним çук,» — тет пулсан пĕччен.

Хăй хитре вăл, çаврака,

Пĕлтерет çапах çукка.

 

Çырăн пĕрре ун умне,

Хытса кайăн тĕлĕнсе.

Ӳссе кайĕ нуль тени

Шăп та лăп вунна çити.

 

* * *

Эсĕ çак цифрăсене

Çырса хур-ха хут çине.

Эп кашни пирки вара

Юмах ярăп юптарса.

 

1

Пĕррепе пĕрре

Пурăннă пĕрле,

Пĕччене пĕччен

Çапăçнă вĕсем.

 

Çĕнтернĕ пĕре

Пĕррене пĕрре,

Çак ик пĕрререн

Юлать пĕр пĕрре.

 

Ма туслă пулман-ши

Çак икĕ пĕрре?

Хушăнсассăн икĕ пĕрре

Иккĕ пулĕчĕç пĕрле!

 

2

Икĕ алă, ик ура

Пурнăçа тытаççĕ.

Ир-ирех, ав, пахчара

Иккĕн çум çумлаççĕ.

Иккĕн кĕчĕçĕ киле,

Иккĕн чуста хучĕç,

Иккĕн йăтрĕç ик витре,

Иккĕн шыва утрĕç.

Иккĕ мăшăр та иккен

Иккĕн пурăнма пĕлсен.

 

3

Светофор — виç куçлă вăл.

Пĕлмелле пурин те:

Хĕрлĕ çутă —

Хупă çул,

Сарă çутă —

Хатĕр пул,

Симĕс çутă —

Уçă çул.

 

4

Тват кĕтеслĕ пӳлĕмре

Тват ураллă пĕтĕмпех:

Тват ураллă мăн сĕтел,

Тват ураллă сар пукан,

Тват ураллă вăрăм сак,

Тват ураллă ман кушак.

Çула тухрăн машшинпа,

Ун та тватă урапа:

Ик ура ик кун утать тăк,

Тваттăна — çур талăк.

 

5

Пиллĕк пирĕн пӳрнесем,

Яланах пĕрле вĕсем.

 

6

Улт кушак

Çиесшĕн ак.

Патăм пăтă сĕт ярса.

Ултă кашăк тасатса

Патăм ултă кушака.

Улт чĕлхе лаккать кăна,

Ма тиркеççĕ кашăка?

 

7

Çич каçпа çич кун — эрне.

Çӳрĕн çиччĕрен шкула,

Сумкăра çич япала

Ялан санăн пулмалла.

Ручка, кăранташ, тетрадь,

Кĕнеке унта выртать.

Кирлĕ сумкăра пенал,

Сăрă кирлĕ сăрлама,

Пĕр тасаткăч тасатма.

 

8

Сакăр йывăç пукане,

Илемлетнĕ вĕсене.

Саппун çакнă та умне

Пурăнаç сĕтел çинче.

 

Пукани, пĕрремĕш, пысăк,

Шал енчен çеç хăвăл, пушă.

Кăшт туртсассăн уйрăлать,

Шăп икке вăл пайланать.

Ăшĕнче пурнать тепри,

Пĕчĕкрех тус пукани.

 

Уçсан ку пуканене

Эс куран виççĕмĕшне.

Кĕлеткийĕн çуррине

Илейсессĕн кунăнне,

Тваттăмĕш курна каять,

Сан çине çиçсе пăхать.

Ил те пăх уçса ăна,

Пиллĕкмĕш ларать унта.

Пиллĕкмĕшĕнче вара

Ултмĕш пытанса тăрать,

Пушă ултмĕш ăшчикки

Шăпах çиччĕмĕш валли.

Çиччĕмĕш кулса пăхать,

Саккăрмĕш шалта ларать,

Саккăрмĕш — чи пĕчĕкки,

Мăйăр пек ун кĕлетки.

 

Речĕпех халь пукане,

Вырнаçтарнă йĕркипе.

«Миçен эсĕр,» — ыйтрăмăр.

Хуравларĕç: «Саккăррăн!»

 

9

Вун минутсăр тăххăрта,

Вун минутсăр тăххăрта,

Вун минутсăр тăххăрта

Шулта пул эс туххăмра,

Ма тесессĕн тăххăрта

Урока ларать ача.

 

Вун минутсăр тăххăрта

Çывăрма выртать ача.

Çывăрма вăл вырмасан

Урокаран юлать ыран.

 

0

Ку, ак, — нуль,

Е ним те çук,

Ман вара юмахăм пур.

 

Пĕрре нуль калать тусне,

Кӳршĕри хăр пĕррене:

„Кӳр санпа пĕрле тăрам,

Хам та пысăк курăнам.”

 

Леш пăхать те ун çине,

Тавăрать тӳрккесленсе:

Эсĕ, нуль,

Кăшт тайлăк пуль,

Хисеп çук вĕт сан ним чуль.

 

Нуль калать:

— Эп йăшăнап,

Хисеп çук ман, ăнланап.

Анчах пулăн вуннă эс

Тăма ман çума пĕлсен.

Халĕ эс — пĕччен, пĕрре,

Кĕмесессĕн тек чĕрре

Эп выраçăп сылтăма,

Тӳрех ӳсĕн вуннăна.

 

Çукран çуккă пулмалла?

Тĕрĕс мар ку япала!

Çирĕм тăвăп иккĕрен,

Вăтăр пулĕ виççĕрен,

Е кирлех сире пулсан

Утмăл тăвăп ултăран.

 

Икĕ нуль тăрсан пĕрле

Эсĕ çитĕнĕн çĕре,

Ик çĕр пулĕ иккĕрен.

Халĕ нуль мĕнне пĕлен,

Тен, пĕрле тăма чĕнен?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: