Кӗркунне1

Кӗркунне

Ĕнтĕ уй-хирсем пушаннă,

Тырă-пулă пӳлмере.

Çĕрулми эпир кăларнă,

Сухаланă уй-хире.

Йывăçсем çинче, эс кур-ха,

Йышлă-йышлă панулми.

Йăтăнса ларать — ку пурлăх —

Пуçтарасчĕ ним юлми.

Тăрнасен сасси пит хурлă,

Тен, вĕсен каяс килмест.

Çитнĕ вăхăт — ан кĕт урăх,

Вăхăт никама кĕтмест.

Типнĕ чечексем. Калатăп:

Йĕрки çавăн пек тĕнчен.

Кĕркуннесĕр те юрамĕ,

Унăн пур хăйле тивлет.

Килчĕ йăпшăнса кĕр кунĕ,

Вăл утать халь таврара...

Çĕнĕ пурнăçшăн эп çунăп,

Çамрăклăх тапать чунра.