«Сахаллантӑмӑр эпӗр, атьсемӗр...»


Сахаллантăмăр эпĕр, атьсемĕр, -

Çирĕ вăхăт пиртен çуррине!

Шав чĕнмесĕр ларсассăн пĕлеймĕр

Тĕнчере эпĕ те пуррине.

 

Çăвара уçмасассăн - илтеймĕр,

Тăвансем, ман чĕрем юррине.

Тăрăшсассăн - аса та илеймĕр,

Кайнă пек эп тĕнче хĕррине...

 

Ĕнтĕ куртăмăр темĕн те тепĕр, —

Хурине, хĕрлине, шуррине...

Ма апла ухмахлантăмăр эпĕр?

Ак манатпăр чĕлхе пуррине.

 

Маяк пек çутататчĕ чĕлхемĕр,

Пĕлтеретчĕ чăваш чĕррине.

Пăтрашать — тĕтĕмленнĕ пек ĕмĕр,

Мул-пуянлăх юрлать юррине...

 

Интернет аллинче халь чĕпсемĕр,

Якатаççĕ тĕнче уççине.

Ĕсĕклеççĕ-хӳхлеççĕ чунсемĕр,

Тăкăнаççĕ чулсем пуç çине.

 

Сахаллантăмăр эпĕр, атьсемĕр,

Çирĕ вăхăт пиртен çуррине!

Сывă чух хамăр вутлă Чĕлхемĕр

Эп юрлатăп чăваш юррине!

Вулавçăсен шухăшĕ Вулавçăсен шухăшĕ


Влад Маскай (2020-01-18 00:01:23):

...зх! ма кĕске-ши кунашкал сăвă?! Çӳçентерет вуланăçемĕн...Пирĕн менталитет çакнашкал ĕнтĕ: асăнатпăр, астăватпăр, хурланатпăр... та юрлатпăр! Пулсан та капла - чăвашсем сывах-ха! Эпир - пур! Пуласчĕ те!!!

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: