Электронлă вулавăш

1

Шухăшлатăп хăш чух: çын мĕнпе пурăнать?

Тен, тăватă хăват этеме хураллать:

Пĕри — Сывлăх иккен, Мул теер теприне,

Авалтан Влаç тееççĕ çав виççĕмĕшне,

Тата мĕн-ши тепри? — Иăнăшмастăп пуль эп:

Вăл — çынсем хушшинче пире пӳрнĕ Хисеп.

Çылăхпа пархатар пур-мĕн çак вăйсенче,

Ыррине çеç илмест вĕсенчен халь тĕнче.

Çын чунне пĕтерме астарать-тĕр юри

Çынлăха маннисен çак тăватă турри!

 

2

Сывлăха асăнар. Мĕн унран пахарах?

Халь ак сывлăхсăрри — сыввинчен вăйлăрах.

Сывлăха астарать пур çĕрте те усал.

Мул пиркн — пуплем мар, уншăн çук ман вăй-хал.

Влаç — ик енлĕ хăват: кирлине йышăнар,

Ун тарçи пулар мар, çын хуçи пулар мар.

 

3

Чăн та, кирлĕ çынна кăшт управлă Хисеп,

Тен, айван ăсăмпа ăна суннăччĕ эп,

Туяс тенĕччĕ, тен, ун сыхчуллă вăйне!

Эп, хальччен пĕлменскер, пĕлес çук вăл мĕнне.

Ытларах та калам: чăнласа эп пĕлни —

Пур пек çынлăхăма çылăх евĕр туни.

Сăнарлам: пулăсем çуралаççĕ шывра,

Çавăн пек, пурăнатпăр эпир мăшкăлра.

Мăшкăл — пирĕн стихия тени, тăвансем,

Сывлăш çук! Антăхать çын чĕреллĕ этем.

Чыс-хисеп ыйтмăп эп, май пулсан та, кăчух,

Халь вăл — влаç йĕкĕрешĕ, халь унсăр вăл çук.

Чыс тени, çавăнпа, халь пăсать çеç çынна.

Митталла хисеп пур, вăл — вилсессĕн кăна.

 

4

Халь сунатăп хама çылăхсем нумайран:

Çав суя хăватсем вăй ан паччăр нихçан!

Çынлăх пултăр, чыс мар. Çăкăр пултăр, мул мар.

Ас-тăна упрама çеç халь сывлăх ыйтар.

Пур-ха шай халăхра... Асăнар çав шая, —

Вăрттăн шай пытанса пытăрах нумая!

Пурăнать-ха унра кĕтретпе пархатар,

Пурăнать-ха... Анчах сăмах çеç унра мар.

 

5

Чĕререн эп калатăп: тав сумсăрлăха!

Çав анчах-çке вĕрентрĕ кăштах çынлăха.

Çук, суя турăсен алтарьне эп курман.

Эп Иов Сăмахне çеç ăнкартăм аран,

Кăшт ăнлантăм ăна — нишлисен тăванне,

Чыссăр-сумсăр çынсен çĕр çинчи çулташне.

Ун Сăмахĕ анчах çутатсанччĕ чуна!

Антăлса та савса шанаймастăп çакна.

Çын курман Çути çеç, тен, ӳкет хут çине...

Чăн тĕрек шыраса пур ăс-хал ырнăçем

Калаçатпăр çапла, — вилнисем, чĕррисем.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн