Блок çурчĕ умĕнче çырнă сăвă

Геннадий Айхи | Сăвă | 1958 | 1 423


1

Нишлĕхре ӳснисем, пĕлмĕр эсĕр

ăсăн мăн кăмăлне упрама,

хăвăра упрамашкăн пĕлмесĕр,

пурнăçран хăрамасăр çунма.

 

Блок пек, чăн-чăн стихия пулма-и? —

Лайăхрах пытанас тенĕ май,

пурăнмалăх кун-çул иртнĕ майăн

тытăнатăр сутма та суйма.

 

Сирĕн ĕмĕрĕр çилĕн те çĕрĕн

вăйлă çаврăнăвĕ пулнă пек,

сирĕн пулĕмĕр тинĕсĕн чĕрĕ

сассине упраса тăнă пек —

 

чĕтресе пурăнатăр — халь-халь ак

«шаккăканçă» тухас пек лифтран.

Хум сасси-и кунта? — Хупă алăк

кăшт çеç сас парасран хăрасан!

 

Пăрахасчĕ пурне те сасартăк,

çил пек, хум пек пуласчĕ ай-хай,

килсĕр-çуртсăр, çул-йĕрсĕр хăватăн

тупсăмне çеç уçасчĕ пĕр шай;

 

юн куçса çаврăнса çуталмалăх

вăхăта — ĕмĕртен пайласа —

пӳрнĕ-çке çын пулма çут çанталăк, —

юлăр çак вăхăтра çын пулса!

 

Хум пек сивĕ пулма хăрамасăр

ĕмĕре ирттерме пĕлейсен,

тен, вилейĕттĕмĕр — сутлашмасăр,

вак телей йăлăнмасăр та, тен!

 

Тунсăхпа антăхмасăр, хăй тĕллĕн

иртрĕ вăхăт — тав ту тӳпене!

Иртрĕ пурнăç — кам виçĕ, кам пĕлĕ

мĕн тума, мĕн хакпа иртнине!

 

Çук-çке, — аслă, хăватлă пулар-и —

иртме çук пур пĕр çын шайĕнчен,

эс мана та çуратнă, хĕрарăм,

эп виçме, шутлама пуçличчен —

 

эс мана хăнăхтарнă этемĕн

сывлăшне, ăшшине, сассине.

Халь ним те кирлĕ мар мана тем-и, —

пур пĕрех, шăпланас кунчченех —

 

хам нихçан пурнăçа ăшăтмашкăн

пĕлмесен те, çынна анратма

тивĕç çук теейсен те, — ыйтмашкăн,

«тепĕр чуншăн» — çак ĕмĕрĕм ман!

 

1958, Ленинград

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: