Телей йăмри


Пурăннă тет пĕр ялта,

Икĕ пĕчĕк хĕр ача.

Иккĕш те пĕр урамра

Иккĕшĕ те улттăра.

Пĕрин ячĕ Урине

Теприн вара Кулине.

Ирпе-ирех выляма

Тухса кайрĕ Кулине

Урине тусне чĕнсе

Чупса кайрĕç улăха.

Улăх çаранне çитсен

Тытăнчĕç пăхкалама.

Кулине курать — йăмра

Питĕ ватă хăй тата,

Çил пек чупрĕç унталла

Икĕ туслă хĕр ача.

Акă çитрĕç вырăна

Хашка-хашка сывласа.

Малалла тăсмастăп-ха

Эпĕ хамăн халапа,

Кăшт каям-ха каялла…

Уйрăмлăх нумай питех

Çакă икĕ хĕр ачан.

Кулине пуян пурăнать

Унăн пурнăçĕ аван.

Анчах укçи çук пачах,

Питĕ чухăн ун юлташ.

Анчах Урине нихçан

Каппайланма юратман.

Кулинешĕн ку — çавах

Мухтанмашкăн вăл пуçах.

Унăн тусĕ апла мар

Пурăнать вăл пит начар.

Виç çулта пĕрре кăна

Илкелеççĕ япала

Урине хĕрĕ валли

Ашшĕ-амăш тăхăнма.

Ĕçлеме вăл юратать

Йăмăкне те пăхкалать.

Кулине килте пачах

Пĕр ĕç те тытман алла.

Çавăнпа та кахалрах

Уринейĕн çак юлташ…

Халь тăсам-ха малалла

Эпĕ хамăн юмаха.

Виçĕ çаврăм çаврăнсан

Йăмра тавра ут утсан

Курчĕç икĕ хĕр ача

Тĕлĕнтермĕш япала

Йăмра умĕнчи çынна

Унпа пĕрле лашана.

Лаши шурă çунатпа

Тăнине, ик хĕр курсан

Хытса тăчĕç пĕр самант.

«Ырă кун, — илтĕнчĕ сас

Çак йăмра тавра утса

Çаврантăр пулсан апла

Иксĕр те хĕр-пĕрчисем

Пĕршер ĕмĕт каласам».

Кулине сăмах хушма

Тухса тăчĕ чи мала.

Мĕн пур капăр япала,

Укçа-тенкĕ, ик лаша

Пама хушрĕ хĕр ача

Çакă юнашар çынна.

Анчах пирĕн шур сухал

Пачĕ çак хĕр пĕрчине

Ылтăн уçă йăл кулса,

Ăшă сăмах каласа.

Телей çăрине тупма

Хушрĕ вăл Кулинене:

— Çав çăрана эс уçсан

Мĕн ыйтни йăлт пулĕ сан!

Тупма ăна йывăр мар,

Çăри санран инçех мар.

Ыр ĕçсем тусан кăна

Тупăн эсĕ çăрана.

Килĕшрĕ ак хĕр ача

Çын каланă сăмахпа…

...Каçару ыйтсан кăна

Хушрĕ Урине сăмах.

Телей ыйтрĕ вăл çынтан

Анчах хăйне валли мар,

Пур тĕнчери çын валли.

Туртăнчĕ ыр çын алли

Хăй кĕсйи патне вара.

Ак кăларчĕ вăл унтан

Çамрăк, вăйсăр хунава.

«Çитĕнтерме пултарсан

Телей пулĕ пур çынна,

Вилчĕ пулсан çак хунав

Хуйхă пулĕ халăха».

Ватă çын çак сăмахпа

Хăвăрт кайрĕ пăрăнса,

Икĕ тус та вырăнтан

Утрĕç пĕрле çавтăнса.

Кулине яла çитсен

Эх, пуçларĕ мухтанма:

— Эп пуян та пит маттур,

Манăн ылтăн уçă пур!

Ылтăн уçă пулнăран

Пулăп эп тата пуян!

Çак сăмаха илтсенех

Уçă ӳкрĕ çĕрелле.

Сив çĕлен пулса тăрса

Шуса тарчĕ чашкăрса.

Ырă ĕçсем туманран

Уçă тарчĕ ачаран.

Çынсем тăчĕç тĕлĕнсе,

Лĕх-лĕх кулчĕç айванран.

 

Ку вăхăтра Урине

Имшер вăйсăр хунава

Лартрĕ тарăн вар хĕрне,

Меллĕ, терĕ, шăварма.

Хӳтĕлерĕ сив çилтен,

Нӳрĕк пачĕ кунсерен,

Сурăх-путек кăшласран

Тытрĕ тавралла çатан.

Парка çитĕнчĕ хунав,

Илемленчĕ пур тавра.

Пулса тăчĕ çак хунав

Ешĕл çулçăллă йăмра.

Лайăх пăхрĕ хĕрача

Хăйне панă парнене,

Çырма хĕрне çулсерен

Татах лартрĕ хунавне.

Йăмра пычĕ хунаса,

Вăйланса, мăнаçланса.

Кĕçех тарăн çырмана

йăлтах лартрĕ картласа.

Çурхи шывсем юхнă чух

Тек шавлаймасть çак çырма,

Пултараймасть çурхи шыв

Ыр тăпрана юхтарма.

Пулăхли юлать уйрах,

Тыр-пул ӳсет аванрах.

Ял халăхĕ çулсерен

Тухăç илет ытларах.

Тухăç илсен аванрах

Кил-çурт тулăх яланах.

Çăкăр шăрши пӳрт тулли!

Çиçет çынсен йăл кулли!

Ӳссе çитрĕ Урине,

Тава тивĕçрĕ ĕçпе.

Вăл та тулăх пурăнать

Ашшĕпеле-амăшпе.

Ас илет вăл пĕрмаях

ача чухне пулнине,

Тав тăвать Шур сухала

Тата ешел йăмрине.

Кашни чăваш ялĕнче

Халь ӳсет лаштра йăмра.

Шурсухалсем сак синче

Сăмах ваклаç сулхăнра.

Хисепре çав ĕлĕкрен

Йывăçа ӳстерекен.

Тавралăха упрасан

Ялан телей пулĕ сан!

Çавăн пекех пăхăр

Вулавçăсен шухăшĕ Вулавçăсен шухăшĕ


Любовь Шашкина (2013-11-01 20:31:18):

Маттур, Марина! Пултарулăхна аталантарсах пымалла сан. Юмахри шухăшсем аван.

Шухăшĕ: вăйлă

 

89656807504 (2013-11-02 12:02:50):

Юмаха пуян чĕлхепе çырнă. Вулама кăмăллă, ансат. Ăнăçусем сунатăп сана, Марина!

 

М.Никитина (2013-11-06 18:34:29):

Юмахри шухăшсем паянхи куншăн вырăнлă. Ăмăртура ăнăçу сунатăп.

Чĕлхе илемлĕхĕ: илемлĕ | Шухăшĕ: вăйлă | Содержанийĕ: тарăн

 

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: