Йывăç куççулĕ

Аркадий Казанов | Сăвă | йывăç | 1 513


Эп кăнтăртан илсе килсеччĕ йывăç,

Ӳссе çĕкленчĕ дача-пахчара.

Мĕнле илем! Çулçи-турачĕ йăвă.

Пăхатăп та — куç-пуçăм алчăрать.

 

Кунсен черечĕ вăрăм, вĕçсĕр-хĕрсĕр —

Çул хыççăн çул чуптарчĕ сиккипе.

Анчах та йывăç тĕлĕнтерчĕ: «хĕсĕр»?

Кӳмерĕ савнăç пĕртте çимĕçпе.

 

Мĕне пула? Камра шырас-ши айăп

Çапла килсе тухнишĕн ун шăпа?

Ку ыйтăва нимле те хуравлаймăп

Пуçа хĕссе ватсан та шухăшпа.

 

Тăван çĕрне, тен, асилет салхуллăн

Кунта темле курсан та пархатар.

Лере мĕн чухлĕ тус-юлташĕ юлнă,

Пĕрне те халь кураймăн юнашар.

 

Чун-чĕрине çунтарнă тепĕр хурлăх:

Телейлĕ «амăш» кун-çулне паман,

«Ачи-пăчипе» киленсе сад тăрăх

Теветлĕ юрă шăратса курман.

 

Мана мĕн? Тутлă çимĕç параймасть тăк

Мĕскершĕн кирлĕ пуш илем пире?

Çак туйăмпа пĕррехинче сасартăк

Касса пăрахрăм йывăçа тĕпрен.

 

Ахлатрĕ мĕскĕн. Укрĕ лăстăр-лăстăр.

Тăр-тăр чĕтреннĕн туйăнчĕ тĕнче.

Сивлеккĕн сăрăлтатрĕ: «Ăссăр, ăссăр!»

Ара, каллех суран сăн-питĕнче...

 

Чăнах, мĕн турăм?! Ма капла тискерлĕх

Ăша тăрук хытарчĕ шатăртах?!

Умри ӳкерчĕк çав тери синкерлĕ:

Чĕре тапса тухас пек кăкăртан.

 

Ай, ку мĕскер? Шывланнă йывăç тĕпĕ:

Тумлам-тумламăн сăрхăнать сĕткен.

Куççуль вĕт ку! Çын евĕр ăппăн-тĕппĕн

Хăй мĕскĕн шăппăн макăрать иккен.

 

Анчах кăшт вăхăт иртрĕ те — пăхатăп:

Тухма пуçланă çамрăк хунавсем!

Вĕçме те хатĕр — шутсăр савăнатăп:

Çу тăршшĕнче çĕкленчĕ çĕн илем.

 

Çук, çук! Текех алла илместĕп пуртă.

Парать-и, çук-и çимĕç — пур пĕрех

Тĕнче ырришĕн кĕрешме вăй пур тăк

Ешертĕр йывăç ĕмĕр чĕп-чĕрех!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: