Тĕкĕр умĕнче


Халь мĕн калам сана, айван тăванăм,

Халь сĕн сунам сана, ыр çын, пичче?

Санпа эп ай мĕн чухлĕ муталаннă

Çак вăрăм пурнăç урлăш-тăршшĕнче!

 

Вĕл-вĕл вĕçет те сарă-хăмăр çулçă

Çавăрăнса ӳкет хура çĕре.

Çапла-çке улшăнуллă тĕнчере:

«Чăнах та ĕмĕт çитрĕ, ĕмĕт тулчĕ,

Мĕскер шутланă — пурте-пурте пулчĕ»

Теекенсем сайра-хутра пĕрре.

 

Шуса килсессĕн анăçран сар пĕлĕт,

Сив пăр та, ăшă çумăр та сапать...

Мĕскер ăрăмлама-ши ĕнтĕ пĕлĕп —

Ăш-чик вăркать-çке, вут ăша хыпать,

Чĕрем те, атнă ут, ылмаш тапать.

 

Халь тем калас ĕнтĕ сана, тăванăм,

Халь тем тесе вăрçас сана, пиччем.

Тем тĕрлĕ путсĕр-нĕрсĕр хушшинче

Мĕне кура санпа эп муталаннă —

Çĕмрен пек харсăр ĕмĕт вĕçевне,

Мана турăсемех пилленине,

Мĕн-ма час-час эп суккăррăн тăлланă?

 

Эп хирĕç тăнă вăрă-хурахпа,

Эп татăк çăкăр панă кĕлмĕçе те.

Ларса калаçнă тăп-тăр ухмахпа,

Ак халь ăсчахсемпе сим-пыл ĕçетĕп.

 

Таса пирĕштисем пек пикесем те

Ман чунăма пĕрре çеç йăпатман,

Уç кăмăллă, чăп-чăмăр инкесем те

(Калатăп пытармасăр, çĕр çăтман)

Мана тулли куркасăр хăварман.

Пăхсам халь: ылтăн тĕшĕпе пĕрле

Тулнах-мĕн хывăх та ман кушеле.

 

Мĕнех вара, сывлар-и ĕнтĕ ассăн?

Çук-çук, мĕн курнă-туйнă — йăлт усса.

Пиччем, ниме те усалпа ан асăн,

Ан лар пуçна пĕксе, ална усса.

 

Калатăп-çке: ак, çуралсан тепре,

Преэидента та суйлĕç, тен, пире.

Ну... президент ытла та пысăк чин,

Унтах çитеймĕпĕр те кармашса,

Чăнах та инкарнаци пур пулсан,

Ма пулас мар-ха пирĕн — чăн-чăн çын?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: