«Хура пĕлĕтсене каса-каса...»
Хура пĕлĕтсене каса-каса,
Çурла пек уйăх тухрĕ тӳпене.
Çут тĕнчене чĕркĕмĕлĕ сапса,
Илем вăл кӳчĕ тăлăх уйсене.
Сĕм вăрманта пĕччен упа темччен
Чĕвен тăрса, сăнаре уйăха.
Шутларĕ пуль вăл: «Эсĕ те пĕччен,
Атя, пайлар-ха манăн хуйăха».
Ĕнер кăна упа хăй çурипе
Çак вăрманта çӳретчĕ савăнса,
Сунарçăсем тискер йыттисемпе
Вĕлерчĕç çурине тулаттарса.
Пит йӳçĕ куççулли куçĕсенчен
Унăн юхать çын куççулли пекех.
Пит шеллесе çут уйăхĕ çӳлтен
Пăхать упа çине çури пекех.
04.12.06.
Вулавçăсен шухăшĕ
Çĕнĕ комментари хуш
Тутъяр (2024-04-17 09:46:50):
Питĕ чуна пырса тивекен сăвă. Автор чунĕ те питĕ çӳхе те çепĕç