Электронлă вулавăш

Çитеймен-тĕр шухăшăм çавăрса хума,

ватăлмасăр пурăнăп теттĕм пуль хама.

Пĕр ларса шутлатăп та паянхи куна –

юрату та, пурнăç та вăхăтлăх кăна.

Иртсе кайнă хыççăн тин çак кĕрет пуçа,

тĕлĕк курса пурăннăн халь уçап куçа.

Кашни кун ман кĕрешӳ теттĕм эпĕ те.

Ку мелпе пурнать чĕр чун, пурнĕ упăте.

Çитĕнтерĕ кайăк та чĕпĕ йăвара.

Çыншăн пурăннин пайти çакă-ши вара?

Йăвана чĕп таврăнмасть, çыншăн кил – тĕппи.

Пирĕн çĕр çинчи пайта урăхрах эппин.

Тăван кил, атте-анне паччăр пире пил,

халăхăмăрăн чĕлхи, эс нихçан ан вил.

Чăн чăваш, вут куçупа тĕнчене тĕлле –

Çеçпĕлтен çитен хĕлхем пултăр ман тĕллев.

Юрату та, пурнăç та хыçăма юлсан,

Халăхăмăр, эсĕ çеç вилĕмсĕр пулсам!

14.06.2007.