Çеçпĕл Мишшипе калаçни

Светлана Асамат | Сăвă | Çеçпĕл Мишши | 2 368


1

Мишша пиччем...

Латсăр асар-писер, хăрушă каçхине,

Эс çеç пĕлетĕн, сĕм çĕрле е ир енне —

Ват çăкаран кайса çакăниччен,

Вилĕмӳпе тĕлме-тĕл пуличчен —

Ĕç вырăнне пусăрăнса ларса,

Сĕтел питне шăтăкласа, чăрмаласа —

Чĕртнĕ-чĕртмен, тӳрех, темрен хăранăн

Эс миçе шăрпăк сӳнтерме васкарăн?..

 

«Эй, Турăçăм, мĕн-ма мана пăрахрăн,

Хĕн танати туллать — чăтап хăраххăн,

Чурăс çынсен тетти эп», — терĕн-им?

Мăшкăл тӳсни пуссах антарчĕ-им?

 

Телей пӳрменшĕн ӳлесе хухленĕн

Ăшри хĕлĕхусем арканчĕç-им?

Пĕчченçĕ-пĕчченех пурăннăçемĕн

Юратăву чăл-пар саланчĕ-им?

 

«Инкек-синкек лутăркаса пĕтернĕ,

Чирлĕ, асаплă, чухăн чăваша

Шупашкарта та, Украинăра та

Çын вырăнне хумарĕç», — терĕн-им?

 

Ним юлмасса шанмин — юн тымарне татса:

«Юна пĕрĕхтерем хăть!» — терĕн-им?

Кантур пӳлĕмĕнче пăяв шыранăçем

Юн тумлатса утса çӳрерĕн-им?

 

«Эп — çутă тĕнчере çукпа пĕрех,

Эп никама та кирлĕ мар», — тесех,

Вилес шухăшупа тытăçнăçем,

Вилме кайма пуçна çĕкленĕçем —

Шăрпăк çутни — илемсĕр терĕн-им?

Шăрпăкăн çунтăн-пĕтрĕн-сунтĕн-им?

 

2

«Çĕн Кун акин шăтма вăхăт çитсен —

Çĕн хăватпа çĕн юрăсем юрларăм,

Юмахри пек çут кĕмĕл çурт лартса —

Пулассине — çĕн сăрăпа сăрларăм.

 

Хĕрсе туптаннă хурăç шанчăк — шанчĕ,

Юлашки чĕлĕн, ĕненӳ — чăмланчĕ.

Чăн чĕрĕлме хыпса паттăрланни —

Кĕпер айне! — хал пĕтрĕ, чун таптанчĕ.

 

Çăлăнăç çук. Йăлт — нуль. Пурăнаймастăп.

Ылханлă сывлăшпа тек сывлаймастăп.

Çăлăнăç тупăр! Кайрăм...» — терĕн-им?

«Ӳкнĕ юман-аттем, тăван чăваш,

Çăка-аннем каçарĕç...» — терĕн-им?

 

3

Кун-çулăн уттипе çĕклентĕн — Паяна,

Хастар, хыт утăмлă пулас — яланлăха.

Çил-тăвăл витĕр — йăлтăра çанталăка,

Пин-пин çынра утатăн — Ырана.

 

Чăваш çĕршывĕн капăр чĕлхине

Чăваш мухтав тума манса каймасть.

Чăваш чĕлхин хĕвеллĕ илемне

Вăл вырнаçтарнă чун-чĕри варне.

 

Чăн чĕрĕлетпĕр! — вилĕм хăратмасть,

Чăваш вучах-чĕри сӳнсе лармасть.

Çĕнĕ чăваш хăюллă, мĕскĕн мар,

Унăн ăс-тăнĕ — хурăç, вут-кăвар.

 

Сĕм вăрмансем, уйсем те улăхсем

Чăн чăвашла ташлаç — кашланăçем.

Кĕсле кĕввиллĕ кăмăллă чĕлхемĕр —

Сасси çунатлăн вĕçĕ — ĕмĕр-ĕмĕр.

 

Чаплăн янрать чăваш ĕç-хĕл юрри,

Чăваш çĕкленчĕ Космоса тари!

Йăлттам-таса — ялсем те хуласем,

Ята ямастпăрах, Мишша пиччем.

 

Чечекленсе çунать хĕвеллĕ Шанăç.

Эс — Хĕвелтухăç, çуккă саншăн анăç.

Пĕр! — эпĕ, тăван халăх ячĕпе,

Эс пурăнан кашни чăваш чун-чĕринче.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: