Çурла

Николай Ишентей | Сăвă | 1 603


Колхозăн хирĕнче ыраш выратчĕ халăх.

Кĕретĕп çын шутне — эп тытнă çĕн çурла.

Анне вĕçлерĕ ĕнтĕ виççĕмĕш каçалăк.

Ĕçлетĕп эпĕ те унпа ăмăртмалла.

 

Юнашарти ана çинче те пĕр канмасăр

Хул-çурăмне авса Ануш аппа вырать.

Пĕччен пулин те, пирĕнтен хăлаç юлмасăр

Çурлипеле пĕр тикĕссĕн çаварттарать.

 

Кĕлте çыххи пĕтĕрнĕ чух пуçне çĕклет те

Ануш сăмах хушать:

— Хăпмасть нуша çумран.

Çурла якалчĕ-çке, шăллаттарма тивет пуль.

Çынран юлатăп ĕнтĕ тимĕрçе кайсан.

 

Хăш вăхăтра кĕлти тулать ун — чухлаймастăн.

Каллех вылянтарать ӳпкевсĕр сăмаха:

— Эй, ĕнерхи хул-çурăм халĕ ыратасшăн...

— Куля, сан пилĕк-çурăму сурмасть-и-ха?

 

Сăмах чĕнместĕп. Пилĕке сăтăркалатăп —

Хуллен выляткалатăп хытнă шăм-шака.

Ануш аппа каплех тем шахвăртса калать ав:

— Терт-нушари юлташ хурăнташран паха.

 

Те вăйă, те вăлту сăмах астарнăран-ши —

Ача ăсĕпеле сĕнетĕп эп:

— Анне,

Ануш аппан кив çурлине шăллаттарам-и?

Наччас çитсе килетĕп тимĕрçĕ патне.

 

— Çук, çук, хамах, сире чăрмав пулать ку темĕн, —

Чарать Ануш. — Кун вăрăм, ĕлкĕретĕп, кин.

Анне ман майлă пулчĕ:

— Нумаях çуремĕ.

Хул-çурăмне кăшт çемçетмелĕх чуптăрин.

 

Тем самантра эп тимĕрç лаççине çитетĕп,

Паратăп тимĕрçе кивелнĕ çурлана.

— Ануш аппа шăллаттарма каларĕ, — тетĕп.

— Куля, эс пысăк ĕç шанса паран мана.

 

Çурлан пĕр кукăр çеç, анчах та пурнăç тертлĕ —

Пĕлетĕн-и, тăрать пин те пĕр пăрнăçран, —

Текелесе мучи мăлатукне çĕклерĕ,

Çитменнине çитерчĕ шаккаса аван.

 

Çав кун Анна аппан çурли ĕçре хĕмленчĕ,

Мухтарĕ тимĕрçе каçчен кăчăртатса.

Пин те пĕр пăрнăçран пĕри паян турленчĕ.

Эппин, май пур-иç юсама çук пурнăçа.

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: