Тамăкран тарни


Мăкшă каччи – Девятаев,

Чăвашла вăл – Тăхăркка.

Кунта çуках нимле айăп,

Хуть те чĕнсе хур «кăркка».

Чăн сăмахăн суйи çук,

Суявçийĕн – чăнни çук.

Чăн сăмах çынна вĕтет,

Патшалăха сĕвĕртет.

Мĕнех вара хушамат?

(Кунтан килмĕ хăямат).

Хуть те ăвăс шалчи ларт –

Пурпĕр чаплă ырă ят.

Ăна выçлăх килтен хăвнă

Пирĕн шĕкĕр Хусана –

Ал парса Хусанĕ хывнă

Мăшăр çунат – «Пил сана!»

Юрĕ пирĕн Тăхăрккамăр

(Сăмахăм ман ун çинчен),

Паттăр-çке вăл: пăхăр, кам?

Тĕнчере пулман хальччен!

Тăхăркканăн пики пулнă

Пирĕшти пек Фейзиэ.

Мăшăрне кĕтсе вăл юлнă

Чун хăвалĕпе – килте.

Эсрел пире тапăнсан

Хурçă кайăк çине ларнă –

Инкек килсе вăрансан,

Çапла савнине хăварнă.

Вутлă çумăрсем çутарнă

Тӳперен аçтахасем,

Ялĕ-хулине çунтарнă

Чунсăр тимĕр кайăксем.

Тăхăрккана вăй пилленĕ

Çил çунат хывма Хусан,

Атăлçи хумпе сийленĕ

Килме, тăшмана Хусан.

Хурçă кайăк Тăхăрккан

Пайтах вĕтнĕ ютсене,

Анчах вилĕм, ав, хыткан,

Этем халĕ пĕтсенех

Çитет çивчĕ çавипе,

Çав тер паттăр çынсене

Илсе кайма çăвине

Пĕр айăпсăр чунсене.

... Чĕр юнпа кĕвĕлсе тулнă

Хăрах унтти Тăхăрккан.

Васкать Вилĕм: «Çитет, пулнă,

Эс, этемми, вырт та кан!»

Шăп та лăп: канмашкăн тĕл-мĕн,

Суранланнă Тăхăрккан.

Тăнне шав çухатнăçемĕн

Çывхарса килет хыткан.

Çӳлти Пӳлĕхçĕ Архангел

(Михаил çакна курать):

«Çын тăшманĕ, хушша ан кĕр!» –

Вилĕмне хуса ярать:

«Эп сана пиллетĕп хытă

Тӳрленмешкĕн, сывалма,

ӳлĕмрен тивеймĕ йытă:

Хатĕрлен герой пулма», –

Çапла çеç калани пулчĕ –

Тăхăркка пĕчченех юлчĕ,

Кайрĕ шăппăн çывăрса,

Тутлă тĕлĕксем курса.

Темле, хăвăрт вăрансан,

Курать: эсрелĕ тăрать,

(Тĕлĕк йăнăш пулчĕ ман:

Çумра пăшалăм пулсан!).

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: