Электронлă вулавăш

Вĕçсĕр-хĕрсĕр тӳперен

Ахах-мерчен сапакан

Ушкăн çăлтăр вăйăран

Саланать пит ерипен.

Уйăх, кĕмĕл питлĕскер,

Çурла евĕр авăкскер,

Шупкаланса майĕпен

Çухалать куç умĕнчен.

Пĕчĕк, ачаш ача пек,

Канлĕ, лăпкă ыйхăран

Çутçанталăк карăнса

Вăранать чаршав илсе.

Шурăм пуçĕ хĕм сапса

Çутă куна парнелет.

Сар хĕвел çĕкленнĕçем

Шăплăх сирĕлсе пырать.

Çут хĕвел шевлипеле

Тăр-тăри хĕпĕртесе

Чарăнмасăр, пикенсех

Юррипе çĕклентерет.

Çепĕç шăпчăк тавлашса

Юррине янраттарать.

Путене пĕтĕлтетет,

Унăн сасси иксĕлмест.

Чĕвĕл чĕкеç вĕçнĕрен

Тĕкĕ юлать вĕлкĕшсе.

Тавра тулать илемпе,

Чуна çывăх кĕвĕпе.

Çаран ешĕл улăхра,

Сиплĕ уçă сывлăшра.

Çутă сывлăм пĕрчисем

Ялтăраççĕ кĕмĕлле.

Çăлтăр куçлă чечексем

Черченкĕ чеченлĕхпе

Астараççĕ куç хĕссе

Ант¹ тунăнах илĕртсе.

Шăнкăр-шăнкăр шыв юххи —

Янăравлă шыв юрри.

Вăйлатать чун хĕлхемне,

Телей кĕвви парнелет.

Кĕтмен-туман çĕртенех

Çакă лăпкă вырăна

Килчĕ вĕçсе урхамах,

Шурă Çамка ятлăскер.

Хулăн саспа кĕçенсе

Анса тăчĕ çĕр çине.

Пăхрĕ йĕри-тавралла,

Туйрĕ селĕм вырăна.

Паллă пулчĕ куçĕнчен

Хутлăх² ăна килĕшни.

Сарчĕ çирĕп çунатне,

Çĕкленчĕ тӳпене çити.

Шурă Çамка пит часах

Чăмрĕ пĕлĕт ăшнелле.

Ушкăн лаша кĕтĕвне

Ертсе килчĕ çакăнтах.

Пурте вĕçсе ансанах

Шур Çамка кĕтӳ тавра

Çиçĕм пек вĕçсе çаврнать,

Тĕрĕслет пур лашана.

Çуллакалать чĕлхипе,

Тутипеле ачашлать,

Кĕлеткипе сĕртĕнет,

Яваплăха вăл туять.

Кĕçех эшкер³ варрине

Мăнаçлăн утса кĕрет.

Ăслă сăмахĕсемпе

Унтан пуçлать вĕрентме:

«Хаклă янаварăмсем⁴,

Ырă ĕçсен хуçисем,

Вашават кăмăлăрсем,

Хамăр телей хуçисем.

Инкек-синкек мĕн пулсан,

Вăрă-хурах тапăнсан

Пĕр чĕлхеллĕ пулмалла,

Кашнишĕн кар тăмалла.

Тăшмана тус-юлташран

Чăн пĕлсе уйăрмалла.

Пĕр-пĕрне пулăшмалла

Çăлмалла йывăрлăхран.

Сире никам тивес çук

Çумра Шур Çамка пур чух.

Чун пĕрлĕхĕнче тивлет⁵,

Чун хĕлхемĕнче сипет⁶.

Тăпăртатса ташласа,

Сиккипеле ыткăнса

Эп суйланă вырăнпа

Паллашсамăр кăмăлпа».

Ирĕк илнĕ лашасем

Вĕрентӳçĕ шухăшне

Çирĕплетрĕç ĕçпеле

Мухтаса ертӳçĕне.

Юханшывăн авкăчĕ⁷

Патĕнчи пĕр çаврара

Ушкăн лаша лăпланса

Ешĕл апат чĕпĕтет.

Вăштăр çилĕ вĕрнипе

Чӳхентерен курăка

Çăвар туллин васкавар⁸

Савăнса кĕтӳ çиет.

Çав вăхăтра йăпшăнса

Выçă Кашкăр Кашаман

Кантарма ăш хыппине

Тытрĕ çул кĕтӳ патне.

Шурă Çамка самантрах

Сисрĕ инкек пуласса.

Хăлхине чăнк! тăратса

Чĕнчĕ пурне тулхăрса:

«Кашкăра пăвăртмалла⁹,

Сехрине хăпартмалла,

«Ăса кĕртсе» илмелле

Килнĕшĕн нехетсĕрех¹⁰».

Çил кăларнăн çилхине

Вĕлкĕштерсе вĕçтерсе

Сиккипе тăват уран

Чупрĕ васкаса хыçран.

Çитрĕ кĕту туххăмрах¹¹

Хăваласа Кашкăра.

Çатлаттарчĕ çунатпа,

Кăрслаттарчĕ урапа.

Ыратăва тӳсеймен

Кашаман чатанланса¹²

Хăй мĕн ятлине манса

Тарчĕ хӳре хĕстерсе.

Эсремет пырне вара,

Тĕпсĕр катка хырăмне,

Яраймарĕ тĕпчĕм¹³ те

Шăл шаккакан Кашаман.

Шурă Çамка пухура

Кĕтĕве ыр хахатпа¹⁴

Харсăр чунлă пулнăран

Рахмат¹⁵ турĕ мухтаса.

Ыр ут хыççăн пинĕпех

Савăнса ут шыв ĕçет.

Ăс хывакан¹⁶ нихăçан

Юлмасть пăрăнса çултан.

Шурă Çамка ушкăнпа

Шут тытрĕ юлма кунта.

Туслăх пытăр ĕмĕре,

Пысăк вăй — пĕрлешӳре!