Пăшăл-пăшăл

Çулçăсем

Чăштăр-чăштăр пăшăлтатрĕç,

Вăштăр-вăштăр çил вăркать.

Çăлтăрсем

Каччă куçенче çуталчĕç —

Хĕрен пуçĕ çаврăнать.

Кăкшăмра

Туй сăри ăнса алхасрĕ,

Пăчăр-пăчăр çĕкленет.

Урамра

Яш каччă купăс тăсрĕ —

Метр çурă сиктерет.

Пăянам

Ывăнмасăр çимĕç лартрĕ,

Кăштăр-кăштăр чупкалать.

Пăятам

Ĕнсине йĕрсем хăварчĕ,

Кăтăр-кăтăр хыçкалать.

Йĕкĕреш,

Тĕнчене сăнаççĕ иккĕн

Лăстăр-лăстăр сăпкара.

Шĕкĕрех,

Пурăнатпăр улттăн-çиччĕн

Шăкăл-шăкăл кил-йышра.

Çĕнĕ комментари хуш