Кăмăл сăвви1

Кăмăл сăвви

Сар саппунлă, сарă тутăрлă,

Çут куççуллĕ кĕркунне

Ылтăн туй тăвать те хурлăхлăн

Майĕпен хывать тумне.

Сарă питлĕх янăрать-и ку? —

Пат! ӳкет те панулми,

Кунсерен те талăк-талăкăн

Тем каять ним таврăнми.

Кайăк хур кас-кассăн иртрĕ те,

Сассинче мĕн? Илтрĕр-и? —

Те малашлăхăн кĕвви ĕнтĕ,

Те асаилӳ юрри?

Сар саппунлă, сарă тутăрлă,

Çут куççуллĕ кĕркунне,

Тунсăхпа килен те тунсăхлăн

Хăваратăн чĕрене.